Jaku Benabi 3. Penyakit

“Penyakit deka balat nyadi ba mayuh bengkah endur.”—LUKE 21:11.

● Ba menua Afrika ke bisi perang dalam menua, mega bisi virus Marburg * ke balat berampit di entara pekereja lombong. Bonzali, seiku pegawai pengerai, bebendar deka ngubat bala pekereja ke sakit dia. Taja pan iya udah mayuh kali minta bantu ari pegawai ba bandar ke besai, peminta iya enda dikibuhka. Empat bulan udah nya, baru meh bantu datai. Tang sayau, Bonzali udah dirampit virus Marburg lalu ngujungka iya nadai.

NAMA FAKTA IYA? Jangkitan peparu (baka pneumonia), penyakit ke ulih ngasuh chirit-birit, HIV/AIDS, tuberkulosis (TB), enggau malaria nya entara penyakit ke ulih ngujungka pemati. Kena taun 2004, penyakit ke dalam lima kategori tu udah nabanka kira-kira 10.7 juta nyawa. Reti iya, bisi seiku orang ke mati dalam tiap tiga saat ketegal penyakit tu tadi.

NAMA RUNDING SEKEDA ORANG? Penyampau mensia ba bumi majak niki-seniki. Nyadi, penyakit endang senang berampit lalu penyampau kes pan majak nambah.

KATI RUNDING TU BETUL? Penyampau mensia ba bumi endang majak mayuh. Tang, mensia mega ngembuan teknologi ke canggih kena nemu, ngubat, sereta nagang penyakit berampit. Nyadi, nama kebuah penyampau kes enda ulih kurang?

NAMA RUNDING NUAN? Kati orang ke benung merinsa ketegal penyakit amat baka ke disebut dalam Bup Kudus?

Amat, tanah berenyang, lapar pungkang sereta penyakit berampit ulih mai pemerinsa ngagai bejuta iku orang. Utai ke ngenyinuka ati, bejuta iku orang merinsa ketegal mensia ke jai, nyengkaum orang ke patut ngelindung sida. Peratika jaku benabi Bup Kudus ke nangkanka tu.

[Nota Kaki]

[Blurb]

“Nadai orang ka mati ditegam singa, laban tu amat ngenakutka. Tang, enti virus ngelekai dalam tubuh nuan, lalu belubah-lubah ngemedis nuan nyentukka nuan mati, nya pan amat ngenakutka ati.”—MICHAEL OSTERHOLM, PAKAR EPIDEMIOLOGI.

[Picture Credit Line]

© William Daniels/​Panos Pictures