Jaku Benabi 4. Nadai Ngembuan Pengerindu

‘Orang kasar enggau orang.’—2 TIMOTI 3:1-3.

● Seiku indu ke benama Chris, gawa ba Wales di pertubuhan kena mantu mansa ke dijamah ba menua nya. Iya madah, “Bisi sekali, seiku indu ke kala ditulung aku datai baru minta tulung. Tang iya dijamah enggau balat, nyentukka aku enda ulih ngelala iya agi.” Chris nampung, “Trauma ba emosi ke ditapi sekeda indu ngasuh sida enggai malik ngagai orang bukai. Sida semina tunduk lalu malik ke baruh aja.”

NAMA FAKTA IYA? Ba menua Afrika, 1 ari 2 iku indu dijamah ba seksual maya agi mit. Nitihka siti pansik, lebih ari satu pertiga lelaki ba menua nya ngasaika diri bisi hak malu bini. Kebendar iya, lelaki mega ulih nyadi mansa kena jamah. Chunto iya ba Kanada, nyauka 3 ari 10 iku lelaki dipalu tauka dijamah kaling sida.

NAMA RUNDING SEKEDA ORANG? Kenyau ari suba, kes bejamah endang udah bisi. Tang kemayaharitu, kes tu nyau majak balat-sebalat.

KATI RUNDING TU BETUL? Orang mayuh majak nemu-senemu pasal kes bejamah ba diri sebilik. Tang, kati hal tu ulih nulung ngurangka penyampau kes jamah? Enda. Tu terang nunjukka, pengerindu ba entara pangan diri nyau majak kurang.

NAMA RUNDING NUAN? Kati utai ke dipadahka ba 2 Timoti 3:1-3 benung nyadi ngelingi nuan? Kati nuan setuju, majak mayuh orang nadai ngembuan pengerindu ba diri sebilik?

Ba jaku benabi ke nangkanka tu, nuan deka belajar pasal utai ke deka dipadah pasal bumi kitai.

[Blurb]

“Pengasar ba diri sebilik siti ari jenayah ke jarang diriput. Nitihka purata, seiku indu udah dijamah kaling iya 35 kali sebedau ngeriput ngagai polis.”—JURUCAKAP KENA MANTU MANSA KE DIJAMAH BA WALES.