Jaku Benabi 6. Pengawa Nginjil Dipejalaika di Serata Dunya

‘Berita Manah pasal Perintah Petara deka ditusui di serata dunya.’—MATTHEW 24:14.

● Vaiatea, diau ba siti ari pulau Tuamotu ba Tasik Pasifik. Semina dalam urung 16,000 iku orang ke diau ba 802,900 kilometer persegi. Taja pan kampung tu jauh ari bandar, Saksi-Saksi Jehovah udah datai ngagai endur tu bekunsika Berita Manah ari Bup Kudus. Nama kebuah? Enda ngira dini alai orang, Saksi-Saksi Jehovah naka ulih ngiga sida.

NAMA FAKTA IYA? Kena taun 2010, Saksi-Saksi Jehovah udah nginjil ba 236 iti menua enggau endur, lalu udah ngena lebih ari 1.6 juta jam ba pengawa tu. Reti iya, ba purata tiap iku Saksi udah ngena 30 minit ninting hari alai nginjil. Sepemanjai 10 taun ti udah, sida udah ngasil sereta nyadung lebih ari 20 juta litaricha Bup Kudus.

NAMA RUNDING SEKEDA ORANG? Kenyau ari beribu-ribu taun ti udah, pesan Bup Kudus udah dikerembaika.

KATI RUNDING TU BETUL? Endang amat, udah mayuh orang udah nginjil pasal pesan Bup Kudus. Tang mayuh ari sida, enda ngemesaika pengawa nya sereta ngereja nya dalam timpuh ti pandak. Tang, Saksi-Saksi Jehovah bejalaika pengawa nginjil enggau teratur, lalu nginjil ngagai bejuta iku orang ba serata dunya. Taja pan pengawa tu disakal perintah ti jai sereta gerempung bukai, Saksi-Saksi Jehovah tetap enda ngalahka diri. (Mark 13:13) Kelimpah ari nya, sida enda digaji lebuh ngereja pengawa nginjil. Indah, sida nyadung litaricha enggau pechuma. Semua nya dipejalaika enggau sukarela sereta disukung ari pemeri sukarela.

NAMA RUNDING NUAN? Kati ‘Berita Manah pasal Perinta Petara’ benung ditusui di serata dunya? Kati tu reti iya, pengidup jemah ila ti manah benung nganti nuan?

[Blurb]

“Seagi-agi Jehovah ngemendarka nya, kitai deka terus nginjil enggau ransing sereta ngena sebarang chara kena ngiga orang.”—BUKU TAHUNAN SAKSI-SAKSI YEHUWA 2010, DALAM JAKU INDONESIA.