Bup Kudus Ngubah Pengidup

NAMA KEBUAH seiku indu ke beumur 60-an badu nyembah engkeramba? Nama kebuah seiku imam Shinto badu bekereja ba rumah sembiang iya, lalu nyadi seiku penginjil Kristian? Baka ni seiku indu ke ditinggal apai indai iya, ulih tan napi pemedis ba ati? Peratika utai ti dipadah sida.

“Aku Ukai Agi Ulun Engkeramba.”—ABA DANSOU

TAUN ADA: 1938

MENUA ASAL: BENIN

SEJARAH: PENYEMBAH ENGKERAMBA

PENGIDUP AKU SUBA: Aku dibesaika ba kampung So-Tchahoué. Kampung nya ba tanah paya, ke semak enggau danau. Orang ba din berikan sereta nupi sapi, kambing, bedus, babi enggau burung. Ba endur nya nadai jalai biasa, nyadi semua orang ngena perau kena mindah kin kitu. Kesuah agi, sida ngaga rumah sida ari kayu enggau rumput, tang bisi mega orang ti ngena batu bata. Taja pan orang ba menua tu amat seranta, jenayah ba endur tu kurang agi enti dibanding enggau bandar besai.

Lebuh aku agi mit, apai aku nganjung aku enggau menyadi indu aku ngagai sekula ti ngajar kami nyembah engkeramba. Lebuh aku udah besai, aku milih Dudua (Oduwa) ari adat orang Yoruba nyadika petara aku. Aku ngaga rumah ke petara tu lalu suah meri piring ngagai iya, ti nyengkaum ubi, minyak sawi, siput, manuk, burung achang, enggau jelu bukai. Utai ti dikena miring tu mar magang, lalu ngasuh aku nyau nadai duit belanja.

BAKA NI BUP KUDUS NGUBAH PENGIDUP AKU: Lebuh aku berengkah belajarka Bup Kudus, aku baru nemu semina bisi seiku Petara ti bendar, iya nya Jehovah. Aku mega belajar Jehovah begedika engkeramba lalu utai nya enda patut dikena ba sembah kitai. (Pemansut 20:4, 5; 1 Korint 10:14) Pengudah aku nemu utai ti patut digaga, aku muai semua engkeramba ti dikemisi aku, lalu nuchi rumah ari semua utai ti bekaul enggau engkeramba. Aku badu begulai enggau manang, lalu aku enda agi enggau adat lama sereta pengerami ke ngintu orang mati.

Enda senang ba aku—seiku indu ke beumur 60 taun lebih—ngaga ubah tu. Bala bakih, kaban belayan, sereta orang ke diau berimbai enggau aku nyakal sereta ngeleseka aku. Tang aku besampi ngagai Jehovah minta pengering ngereja utai ti betul. Aku berasai lantang lebuh macha Jaku Dalam 18:10, ti madah: ‘Jehovah baka menara ti tegap, endur alai orang ke lurus tau datai lalu diau enggau likun.’

Aku mega amat diperansang lebuh aku datai ngagai gempuru Saksi-Saksi Jehovah. Aku ulih ngasaika pengerindu Kristian ba dia, lalu aku rindu meda semua sida bebendar nitihka standard moral Bup Kudus. Utai ti dipeda aku ngasuh aku pechaya Saksi-Saksi Jehovah endang bisi pengarap ti bendar.

PENGUNTUNG KE DIULIH AKU: Jaku lalau ari Bup Kudus udah nulung aku ngembuan kaul ti manah enggau bala anak aku. Aku mega berasai lempung agi. Suba aku ngena semua duit aku nyembah engkeramba ti nadai guna sereta enda ulih nulung aku. Diatu aku nyembah Jehovah, ke deka mutarka semua penanggul kitai belama iya. (Pemandang 21:3, 4) Aku amat gaga ati laban aku ukai agi ulun engkeramba. Diatu aku bekereja ke Jehovah! Ba baruh jaga Iya, aku ulih ngasaika pengelikun ti bendar.

“Kenyau ari Mit Aku Deka Ngiga Petara ti Bendar.”—SHINJI SATO

TAUN ADA: 1951

MENUA ASAL: JEPUN

SEJARAH: IMAM SHINTO

PENGIDUP AKU SUBA: Aku dibesaika di nengeri Fukuoka. Apai indai aku amat kering ba pengarap sida. Nyadi, kenyau ari mit, aku diajar nyembah petara Shinto. Aku suah berundingka chara ngambika ulih selamat lalu aku bisi pengingin deka nulung orang bukai ke napi penusah. Aku agi ingat maya aku sekula rendah, pengajar nanya kami pasal juluk ati ke jemah ila. Bala ke sekelas enggau aku semua bisi juluk ati ti manah, baka deka nyadi pakar sains. Aku madah, aku deka nyembah Petara. Semua sida ketawaka aku.

Pengudah tembu sekula menengah, aku tama ngagai sekula pengarap ngambika ulih nyadi pengajar pengarap. Ba din, aku betemu enggau seiku imam Shinto ke selalu macha siti bup ti chelum. Bisi sekali, iya nanya aku, “Sato, kati nuan nemu nama bup tu?” Aku kala meda bup ke dibacha iya, nyadi aku nyaut, “Bup Kudus.” Ku iya, “Semua orang ti deka nyadi imam Shinto patut macha bup tu.”

Aku terus meli Bup Kudus. Aku nyimpan Bup Kudus nya ba rak bup lalu nyaga iya enggau manah. Tang aku nadai awak macha Bup Kudus, laban aku amat kisuk ba sekula. Pengudah tembu sekula, aku berengkah nyadi imam ba rumah sembiang Shinto. Aku udah nyapai juluk ati aku.

Tang, enda lama pengudah nya aku asa ati laban pengawa imam Shinto enda baka ke dijangka aku. Mayuh ari imam nya nadai pengerindu ke orang bukai. Pia mega, mayuh ari sida kakang ati enggau pengarap sida empu. Seiku imam ke bisi penuduk ti tinggi madah ngagai aku: “Enti nuan deka mujur, nuan semina ulih bejaku pasal penemu mensia. Enda ibuh bejaku pasal pengarap.”

Ketegal jaku ti baka nya aku asa ati enggau pengarap Shinto. Taja pan aku terus gawa ba rumah sembiang dia, aku berengkah ngaga pansik pasal pengarap bukai. Taja pia, semua pengarap nyau sama aja. Lebuh aku belajar pasal pengarap bukai, aku berasai balat agi asa ati. Ba runding aku, nadai pengarap ti ngajar pemendar.

BAKA NI BUP KUDUS NGUBAH PENGIDUP AKU: Ba taun 1988, aku betemu enggau seiku orang ke megai pengarap Buddha ti meransang aku macha Bup Kudus. Maya nya, aku teringatka imam Shinto ke kala meransang aku ngereja utai ti sama. Aku mutus deka nitihka jaku lalau sida. Lebuh aku berengkah macha Bup Kudus, aku berasai amat lantang ati. Kekadang aku macha sepemanjai malam nyentukka ngagai rarak tawas.

Utai ti dibacha meransang aku besampi ngagai Petara ti ditulis dalam Bup Kudus. Aku berengkah ngena sampi ti ditulis ba Matthew 6:9-13. Aku ngulang sampi tu tiap dua jam—indah ba maya aku gawa ba rumah sembiang Shinto.

Aku bisi mayuh tanya pasal utai ti dibacha aku. Maya nya, aku udah bebini lalu aku nemu Saksi-Saksi Jehovah ngajar orang pasal Bup Kudus laban sida kala ngabas bini aku. Aku ngiga seiku Saksi lalu nanya iya mayuh utai. Aku alit ati laban iya ulih nyaut semua tanya aku ngena Bup Kudus. Iya ngasuh seiku Saksi lelaki belajarka Bup Kudus enggau aku.

Enda lama udah nya, aku berengkah enggau gempuru Saksi-Saksi Jehovah. Semua orang dia ngelaluka aku enggau gaga ati, indah sida ke kala dianu aku.

Ba gempuru Saksi-Saksi Jehovah, aku belajar pasal Petara ke dekaka bala laki ngayanka pengerindu sereta basa ngagai diri sebilik. Nyentukka maya nya, aku seruran kisuk ba pengawa imam lalu enda ibuhka bini enggau dua iku anak aku. Aku nyau sedar, aku seruran ninga serebana orang ke datai ngagai rumah sembiang, tang aku enda kala ninga serebana bini aku.

Seraya aku belajarka Bup Kudus, aku nyau nemu mayuh pasal Jehovah. Ayat ba Rome 10:13 amat negu ati aku. Ku iya: “Genap iku orang ke ngangauka nama Tuhan, deka diselamatka.” Aku bebendar ngiga Petara kenyau ari mit, lalu diatu, aku udah mujur tetemuka Iya!

Aku berengkah berasai enda nyamai ati ba rumah sembiang. Keterubah iya, aku irauka asai ati orang bukai enti aku ninggalka pengarap Shinto. Tang aku udah besemaya enggau diri empu, aku deka ninggalka pengarap Shinto enti aku tetemuka Petara ti bendar. Nya alai, ba taun 1989, aku ninggalka rumah sembiang Shinto lalu bepanggai ba Jehovah enggau pengabis ati.

Ninggalka rumah sembiang nya enda senang. Bala tuai pengarap ba rumah sembiang nya nganu aku lalu nguji nagang aku ari ninggalka sida. Tang, ba aku, utai ti tusah agi iya nya madahka pemutus aku ngagai apai indai aku. Lebuh aku mupuk ngagai rumah sida, aku amat irau, nyentukka dada aku pedis lalu kaki aku nadai pengering. Aku ngetu mayuh kali lalu besampi minta pengering ari Jehovah.

Lebuh aku datai ba rumah apai indai, aku amat takut deka madahka pemutus aku ngagai sida. Aku patut suah besampi minta pemerani. Pengudah bejam-jam, aku nyau nerangka semua utai nya ngagai apai aku. Aku madah ngagai iya, aku udah tetemuka Petara ti bendar lalu deka ninggalka pengarap Shinto ngambika aku ulih nyembah Iya. Apai aku amat tekenyit sereta asa ati. Kaban belayan aku mega datai lalu nguji nagang aku ari ninggalka pengarap Shinto. Taja pan aku enggai ngasuh diri sebilik aku tusah ati, tang aku nemu aku patut nyembah Jehovah. Belubah-lubah, diri sebilik nyau nerima sereta bebasaka pemutus ke digaga aku.

Taja pan aku udah ninggalka rumah sembiang Shinto, aku agi patut ngaga ubah ba runding aku. Aku udah teleba enggau jalai pengidup seiku imam. Aku bebendar nguji muai runding ti lama, tang aku seruran dikingatka pasal pengidup lama aku.

Bisi dua iti utai ti nulung aku muai runding ti lama. Keterubah, aku ngiga semua utai dalam rumah aku ti bisi kaul enggau pengarap lama aku. Udah nya, aku nunu semua utai nya—bup, gambar, indah utai ti mar. Kedua, aku seruran ngiga peluang begulai enggau bala Saksi. Sida nyadi bakih aku ti manah sereta bebendar nyukung aku. Belubah-lubah, aku nyau enda ingatka jalai pengidup ti lama.

PENGUNTUNG KE DIULIH AKU: Suba, aku nadai awak begulai enggau bini sereta bala anak aku, lalu sida berasai amat sunyi. Tang lebuh aku berengkah ngiga awak begulai enggau sida, nitihka ajar Bup Kudus ke bala laki, kaul kami majak rapat. Nyau kelama, bini aku mutus deka sama enggau aku nyembah Jehovah. Diatu, kami duai begulai nyembah Jehovah enggau anak lelaki, anak indu kami, sereta laki iya.

Lebuh ngenang baru juluk ati aku ari mit, ke deka nyembah Petara sereta nulung orang bukai, aku gaga ati laban aku udah bulih semua utai ti dikinginka aku—lebih ari utai ti dijangka. Aku amat beterima kasih ngagai Jehovah.

“Aku ngasaika bisi utai kurang ba pengidup aku.”—LYNETTE HOUGHTING

TAUN ADA: 1958

MENUA ASAL: AFRIKA SELATAN

SEJARAH: BERASAI TUSAH ATI KETEGAL DITINGGALKA APAI INDAI

PENGIDUP AKU SUBA: Aku diadaka ba Germiston, siti nengeri alai mayuh pengawa ngelumbung, lalu nadai mayuh jenayah. Ketegal apai indai aku enda ulih ngibun aku, sepasang laki bini ngambi aku nyadi anak iru sida. Maya nya aku baru beumur 14 hari. Tang, pengudah aku nemu pasal utai ke nyadi, aku berasai amat tusah ati ketegal ditinggalka apai indai aku suba. Taja pan apaí indai iru aku amat sayauka aku, tang aku enda agi ngasai diri semak enggau sida, lalu ngumbai sida enda meretika asai ati aku.

Lebuh aku beumur 16 taun, aku berengkah ngirup ai bisa ba bar. Aku enggau bala kaban rindu betanda sereta ninga lagu ba dia. Lebuh aku beumur 17 taun, aku berengkah nginsap. Aku deka nyadi kurus baka model ba iklan insap. Lebuh aku beumur 19 taun, aku berengkah gawa ba Johannesburg, lalu bekaban enggau orang ke enda entu manah. Nyau kelama, aku berengkah bejaku kasar, balat nginsap, lalu ngirup mayuh ai bisa ba ujung minggu.

Aku rindu sesais lalu suah main bol, aerobik, sereta sukan bukai. Aku mega kisuk gawa ba bidang komputer, lalu nyau kelama, mayuh orang nemu pasal pengelandik aku. Ketegal nya, aku bulih mayuh duit, lalu mayuh orang ngumbai aku mujur ba pengidup. Tang aku agi berasai tusah ati—baka pengidup aku nadai reti. Aku ngasaika bisi utai ti kurang ba pengidup aku.

BAKA NI BUP KUDUS NGUBAH PENGIDUP AKU: Lebuh aku berengkah belajarka Bup Kudus, aku nyau nemu Jehovah nya Petara ti bepengerindu. Jehovah ngayanka pengerindu Iya nengah Bup Kudus sereta meri kitai jaku lalau pasal pengidup. (Isaiah 48:17, 18) Aku nemu enti aku deka nerima penguntung ari iring Jehovah, aku enda tau enda ngaga ubah ti besai ba pengidup aku.

Keterubah iya, aku patut bejimat lebuh milih bakih. Aku belematika jaku ba Jaku Dalam 13:20, ti madah: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” Jaku lalau tu nulung aku ninggalka bala bakih aku ke suba, lalu ngiga bakih ti baru ke nyembah Jehovah.

Ba aku, utai ti pemadu tusah nya lebuh aku deka badu nginsap; aku amat gian. Lebuh aku belubah-lubah muai tebiat ti enda manah tu, aku napi siti agi penusah ti balat. Ketegal aku badu nginsap, berat tubuh aku niki nyauka 14 kilo! Tu amat ngenusahka ati aku, lalu aku begunaka 10 taun kena nguruska diri baru. Taja pia, aku nemu badu nginsap nya pemutus ti betul. Maya nya, aku seruran besampi ngagai Jehovah lalu Iya meri aku pengering ngambika ulih mujur.

PENGUNTUNG KE DIULIH AKU: Diatu pengerai aku manah agi. Aku mega berasai puas ati—aku nemu nadai guna ngiga pengelantang ba pengawa sekular, penuduk tauka pengaya. Tang bulih pengelantang lebuh aku nusui berita manah ngagai orang bukai. Diatu, aku enggau laki aku sereta tiga iku orang ke sama gawa enggau aku suba, begulai nyembah Jehovah. Aku mega bisi peluang madah ngagai apai indai iru aku pasal pengangkat ari pemati sebedau seduai iya mati.

Ketegal aku semak enggau Jehovah, tu nulung aku napi pemedis ba ati ketegal ditinggalka apai indai aku suba. Jehovah nulung aku berasai dikerindu lalu Iya udah mai aku tama ngagai ruang bilik ti besai ba serata dunya. Dalam ruang bilik tu, aku bisi mayuh indai, apai, menyadi lelaki enggau menyadi indu.—Mark 10:29, 30.

[Gambar]

Aku ngasaika pengerindu Kristian lebuh aku begulai enggau Saksi-Saksi Jehovah

[Gambar]

Rumah sembiang Shinto alai aku bekereja suba