• TAUN ADA: 1941

• MENUA ASAL: BENIN

• SEJARAH PENGIDUP: NITIHKA CHARA PENGIDUP POLIGAMI, NGELABAN SAKSI-SAKSI JEHOVAH

PENGIDUP AKU SUBA:

Asal aku ari Cotonou, siti bandar ti besai ba Benin. Ari mit aku udah nyadi orang Katolik tang aku jarang ngagai gerija. Mayuh orang Katolik ba endur asal aku bisi lebih ari seiku bini maya nya. Pengawa tu dikumbai poligami lalu tu enda ngelanggar undang-undang. Aku empu bisi empat iku bini.

Lebuh revolusi politik nyadi ba taun 1970-an, aku ngumbai menua aku deka bisi pemaik sereta lantang agi. Nya alai, aku nyukung pengawa tu enggau pengabis ati, lalu berengkah enggau politik. Orang ke enggau revolusi tu enda rinduka Saksi-Saksi Jehovah laban bala Saksi mengkang neutral ba politik. Aku mega enggau sida bejaika bala Saksi. Lebuh pengerintis seberai tasik Saksi Jehovah diburu ari menua kami ba taun 1976, aku pechaya, sida enda datai agi.

BAKA NI BUP KUDUS NGUBAH PENGIDUP AKU:

Pengudah revolusi nya abis ba taun 1990, pengerintis seberai tasik Saksi-Saksi Jehovah pulai kitu baru. Aku berunding, engka Petara bisi enggau sida. Urung maya nya, aku berengkah bekereja ba endur bukai. Seiku ari orang ke sama gawa enggau aku nya Saksi. Iya berengkah berandauka utai ti dipechaya iya enggau aku. Iya nunjukka aku ayat ari Bup Kudus ke ngambarka Jehovah nya Petara ti lurus sereta bepengerindu. (Ulang Adat 32:4; 1 John 4:8) Aku amat rinduka kualiti nya lalu deka belajar mayuh agi pasal Jehovah. Nya alai, aku pan berengkah belajarka Bup Kudus.

Enda lama udah nya, aku berengkah datai ngagai gempuru Saksi-Saksi Jehovah. Utai ti negu ati aku nya pengerindu ti diayanka sida. Sida enda bechiping lalu ngintu orang enggau manah, enda ngira bansa tauka penuduk. Aku nyau sedar, sida nya meh murid Jesus Kristus ti bendar.—John 13:35.

Aku nemu enti aku deka nyembah Jehovah, aku patut pansut ari Gerija Katolik. Tang utai tu tusah amat laban aku irau pasal runding ke deka dikembuan orang bekaul enggau pemutus aku. Pengudah siti timpuh ti panjai, aku nyau ulih pansut ari gerija laban bisi tulung ari Jehovah.

Bisi siti agi ubah ti besai ke patut digaga aku. Nitihka Bup Kudus, Petara semina deka kitai ngembuan seiku kaling pengidup. (Pemungkal 2:18-24; Matthew 19:4-6) Ba runding Jehovah, semina tikah aku ti terubah nya meh ke sah. Nyadi, aku ngerejista tikah enggau bini aku ti terubah lalu beserara enggau tiga iku bini aku kebukai. Aku udah ngatur ngambika utai ti diguna sida mega dijaga. Pengujung iya, dua iku ari bini aku ke suba udah nyadi Saksi.

PENGUNTUNG KE DIULIH AKU:

Taja pan bini aku enggau tetap nitihka ajar Katolik, tang iya bebasaka pemutus aku ke deka nyembah Jehovah. Ajar ari Bup Kudus udah nulung aku nyadi laki ti manah agi.

Suba, aku ngumbai pengawa politik ulih nulung orang ba endur aku. Tang diatu, aku sedar, semina Perintah Petara ke ulih mutarka semua penanggul mensia. (Matthew 6:9, 10) Aku amat beterima kasih laban Jehovah udah ngajar aku chara ngembuan pengidup ti lantang.

• TAUN ADA: 1977

• MENUA ASAL: BRASIL

• SEJARAH PENGIDUP: PADERI GERIJA PENTAKOSTA

PENGIDUP AKU SUBA:

Aku dibesaika ba bandar Itu, di São Paulo. Pengawa jenayah dia amat mayuh.

Aku nyadi seiku pengedar dadah. Aku amat mangah lalu pengidup aku nadai moral. Aku nemu, enti aku enda berubah, aku deka tama jil tauka mati. Nyadi, aku badu agi ngereja pengawa suba lalu enggau Gerija Pentakosta. Udah nya, aku nyadi seiku paderi.

Aku bebendar nulung orang nengah pengawa nginjil ba gerija. Aku indah meri cheramah nengah radio. Mayuh orang berengkah ngelala aku. Tang, nyau kelama, aku nemu, orang ba gerija enda bedulika pangan diri sereta enda ngenuluka Petara. Aku ngasaika, tuju ti pemadu besai ba gerija nya kena bulih mayuh duit. Pengujung iya, aku pansut ari gerija nya.

BAKA NI BUP KUDUS NGUBAH PENGIDUP AKU:

Aku berengkah belajarka Bup Kudus enggau Saksi-Saksi Jehovah. Kenyau ari pun agi, aku ulih meda sida amat bebida ari pengarap bukai. Bisi dua iti utai ke amat tampak: Kesatu, Saksi-Saksi Jehovah ukai semina bejaku pasal pengerindu. Sida ngayanka pengerindu ngagai Petara sereta orang bukai. Kedua, sida enda enggau pengawa perang tauka politik. (Isaiah 2:4) Aku nyau nemu sida benung bebendar nitihka jalai ti nuju ngagai pengidup ti meruan belama iya. Aku andal, aku udah tetemuka pengarap ti bendar.—Matthew 7:13, 14.

Enti aku deka ngelantangka ati Petara, aku patut ngaga ubah. Aku patut meri mayuh agi awak enggau diri sebilik sereta ngemansangka kualiti baruh ati. Aku tusah deka ngaga ubah tu. Tang enggau tulung ari Jehovah, aku udah mujur. Bini aku amat alit ati enggau ubah ke digaga aku, lalu tu meransang iya ngaga pemansang ba pengarap enggau jampat. Kami duai deka nyadi Saksi-Saksi Jehovah, lalu kami duai dibaptisa ba hari ti sama.

PENGUNTUNG KE DIULIH AKU:

Aku enggau bini aku amat gaga ati laban ulih nulung tiga iku anak kami nyadi pangan Jehovah. Diatu, kami sebilik amat lantang ati. Aku amat beterima kasih laban Jehovah udah ngajar aku pemendar ari Bup Kudus lalu nulung aku ngaga ubah ba pengidup.

• TAUN ADA: 1957

• MENUA ASAL: AUSTRALIA

• SEJARAH PENGIDUP: DIPERINSA MAYA AGI MIT

PENGIDUP AKU SUBA:

Aku dibesaika ba Newcastle, New South Wales. Aku ti pemadu tuai ari tujuh iku diri menyadi. Apai indai aku orang ti mangah, lalu apai aku udu ngirup. Indai nyamah aku lalu rindu beduan sereta bejaku jai ngagai aku. Iya seruran madahka aku tu jai lalu deka diperinsa ba api neraka. Tu ngasuh aku amat takut.

Aku suah enda datai ke sekula lebuh bisi abi ba tubuh aku ketegal dijamah indai. Lebuh aku beumur 11 taun, aku diseraraka ari apai indai lalu diengkah ba siti institusi perintah. Udah nya, aku dipindahka ngagai siti convent. Lebuh aku beumur 14 taun, aku ngerarika diri ari dia lalu diau ba kaki lima ke semak Kings Cross, Sydney.

Maya nya, aku berengkah enggau pengawa makai dadah, ngirup ai bisa, pornografi, sereta nyadi indu sundal. Bisi sekali, siti utai ti amat ngenakutka nyadi. Lebuh ba rumah tuke kelab malam, dua iku lelaki datai ba rumah iya. Aku diasuh nganti ba bilik, tang aku ulih ninga randau sida. Aku ninga tuke kelab malam nya deka nyual aku ngagai dua iku lelaki nya. Sida deka naban aku ngagai Jepun ngambika gawa ba siti bar dia. Lebuh aku ninga tu, aku merejuk ari beranda lalu ngerarika diri.

Pengudah nya, aku betemu enggau seiku lelaki ke benung raun ba Sydney. Aku madah ngagai iya utai ti nyadi lalu ngarapka iya meri aku mimit duit. Tang, iya mai aku ngagai endur diau iya ngambika aku ulih mandi sereta makai. Setaun udah nya, kami duai jadi.

BAKA NI BUP KUDUS NGUBAH PENGIDUP AKU:

Lebuh aku berengkah belajarka Bup Kudus enggau Saksi-Saksi Jehovah, aku nemu, pemerinsa ke diasaika kitai datai ari Sitan, ukai Petara. Pekara tu bebida ari utai ti dipelajarka aku suba. Aku amat ringat ngagai Sitan lalu ba maya ti sama, aku berasai lantang laban nemu Petara enda ngukum orang ba api neraka.

Aku alit ati lebuh meda baka ni tiap iti aspek pengidup Saksi-Saksi Jehovah diiring ajar ari Bup Kudus. Ati aku mega balat ditegu laban sida bebasaka aku lalu ngintu aku enggau manah taja pan aku bisi ulah ti enda manah.

Penanggul ti pemadu besai ba aku iya nya, aku bibat enggau asai ati diri empu. Aku amat begedika diri empu lalu ngasaika diri enda layak dikerinduka. Taja pan aku rinduka Jehovah lalu udah lama dibaptisa, aku agi ngasaika Jehovah enda rinduka orang baka aku.

Utai ti ngubah pengidup aku nyadi kira-kira 15 taun pengudah aku dibaptisa. Lebuh cheramah dikenataika ba Palan Gempuru Saksi-Saksi Jehovah, ayat James 1:23, 24 dikerandauka. Ayat nya madahka Jaku Petara nya baka cheremin ti ulih nulung kitai meda diri ari runding Jehovah. Aku berengkah sedar, runding aku pasal diri empu enda betul lalu amat bebida enggau runding Petara. Tang aku tusah deka pechaya Petara ulih rinduka orang baka aku.

Beberapa hari udah nya, aku macha ayat ti ngubah runding aku. Ba Isaiah 1:18, Jehovah madah: “Aram kitai ngatur pekara tu. Kita nyau mirah dibalut dosa, tang Aku deka masu kita tuchi baka seleju.” Aku ngasaika baka Jehovah benung bejaku enggau aku, “Aram tua mutarka utai tu, Vicky. Aku nemu nuan kala ngaga dosa tang Aku nemu asai ati nuan, lalu Aku rinduka nuan.”

Malam nya aku enda ulih tinduk. Aku ngenang baru baka ni Jehovah udah liat ati enggau aku ngelama tu sereta ngayanka pengerindu ngagai aku nengah mayuh chara. Iya indah sanggup nyerahka Anak Iya ngambika nebus dosa aku. Tang, ketegal aku suah ngumbai diri enda layak nerima pengerindu Iya, aku baka ke benung madah ngagai Iya, “Pengerindu nuan enda chukup besai. Genselan tebus Anak Nuan enda ulih nebus dosa aku.” Pengudah belematika rega genselan tebus Jesus ti amat besai, aku berengkah ngasaika pengerindu Jehovah ngagai aku.

PENGUNTUNG KE DIULIH AKU:

Diatu aku enda agi berasai besalah sereta ulih idup enggau lantang. Tikah aku nyadi lantang agi, lalu aku gaga ati laban ulih ngena pengalaman diri empu kena nulung orang bukai. Belubah-lubah aku berasai semak agi ngagai Jehovah.

• TAUN ADA: 1974

• MENUA ASAL: RUSIA

• SEJARAH PENGIDUP: PEMINAT MUSIK HEAVY-METAL

PENGIDUP AKU SUBA:

Aku ada ba Votkinsk, iya nya endur asal komposer tebilang ke benama Pyotr Ilich Tchaikovsky. Ruang bilik kami seranta. Taja pan apai aku bisi kualiti ti manah, tang iya udu ngirup. Utai tu ngasuh ruang bilik kami selalu belaya.

Aku ukai pemelajar ti pandai, lalu tu ngasuh aku kurang andalka diri. Nyau kelama, aku enda entu rindu begulai enggau orang lalu enda pechayaka orang bukai. Aku amat stres maya ngagai sekula. Lebuh aku patut bejaku ba mua kelas, aku amat takut nyentukka enda ulih nyebut utai, indah pekara ti senang. Ba riput kad aku maya sekula menengah, pengajar aku nulis, “Kosa kata terhad. Enda nemu mansutka asai ati.” Rambai jaku tu ngemaruhka aku lalu aku ngumbai diri nadai guna idup.

Maya aku nembiak, aku berengkah ngirup ai bisa. Nya ngasuh aku lantang, tang lebuh aku ngirup kelalu mayuh, aku berasai besalah. Ketegal nya, aku napi depression (kemurungan) lalu kekadang, behari-hari aku ngurung diri ba rumah. Aku ngasaika pengidup aku nadai tuju, lalu deka munuh diri.

Lebuh aku beumur 20 taun, aku berengkah bisi minat ngagai musik heavy-metal. Musik tu negapka aku lalu aku berengkah begulai enggau orang ke rinduka musik ti baka tu. Aku nejuka buk aku panjai, nebuk pending, sereta nitihka stail gari pemusik ke dikerinduka aku. Aku belubah-lubah nyadi orang ti mangah sereta rindu bekelikuh enggau ruang bilik aku.

Aku ngumbai musik tu ulih ngasuh aku gaga ati. Tang kebendar iya, ulah aku ke benung berubah. Aku mega nyau nemu, pemusik ti dikerinduka aku ngereja mayuh utai ti jai. Nya ngasuh aku berasai kechewa sereta ditipu.

Kali tu, aku amat-amat deka munuh diri. Tang pengudah aku berunding pasal asai ati indai aku, aku enda nyentuk ati ngereja nya. Indai aku amat sayauka aku lalu udah ngelengkaka mayuh utai ketegal aku. Aku enggai idup agi, tang aku enda sanggup munuh diri. Kelikuh ba asai ati aku ngasuh aku merinsa.

Nya alai, kena muai asai ati ti puang, aku nguji belematika litaricha sastera Rusia. Siti ari cherita ke dibacha aku nya bekaul enggau seiku hero ke gawa ba gerija. Enggau enda dijangka, aku ngasaika diri deka gawa ke Petara lalu nulung orang bukai. Aku besampi enggau pengabis ati lalu minta Petara nulung aku nemu tuju ba pengidup. Nya meh keterubah kali iya aku bebendar besampi. Pengudah nya, aku berasai amat lantang sereta nyamai. Utai ke nyadi dua jam udah nya ngasuh aku andal Petara udah ningaka sampi aku. Maya nya, seiku ari Saksi-Saksi Jehovah ngetuk pintu rumah aku lalu nanya sekalika aku deka belajarka Bup Kudus. Kenyau ari nya, pengidup aku berubah.

BAKA NI BUP KUDUS NGUBAH PENGIDUP AKU:

Aku muai semua utai ti bekaul enggau musik heavy-metal. Pekara tu amat tusah ba aku. Musik nya udah mai empas ti besai ba pengidup aku. Tiap kali aku mansa endur orang main musik heavy-metal, aku tekenangka pengidup aku ke suba. Aku enggai utai ke nyadi ba pengidup aku suba ngachau utai manah ke benung dipelajar aku. Nyadi, aku sengaja ngenyauhka diri ari endur ti baka nya. Enti bisi utai ba pengidup aku suba datai baru ba runding aku, aku bebendar besampi ngagai Petara. Sampi nulung aku bulih ‘pemaik Petara, ti ngelui peragam mensia.’—Pilipi 4:7.

Lebuh aku belajarka Bup Kudus, aku nyau nemu, orang Kristian mesti bekunsika utai ti dipechaya sida enggau orang bukai. (Matthew 28:19, 20) Tang aku ngasaika diri enda ulih ngereja utai nya. Ba maya ti sama, aku nemu, ajar ari Bup Kudus mai pemaik sereta pengelantang ba aku. Nya alai, aku deka orang bukai nemu pasal utai ti manah tu. Aku bebendar ngelaban asai ati ti takut lalu berengkah bekunsika nya enggau orang bukai. Asil iya, pengandal aku majak nambah lalu pengarap aku mega majak kering.

PENGUNTUNG KE DIULIH AKU:

Diatu, aku bisi tikah ti lantang. Aku berasai gaga ati laban ulih nulung orang bukai, nyengkaum indai sereta madi aku, belajarka Bup Kudus. Pengujung iya, aku bisi tuju ba pengidup lalu berasai amat puas ati laban aku ulih nyembah Petara sereta nulung orang bukai ngelala Iya.