“Rinduka Pangan Diri”

‘Aku meri kita pesan ti baru: rinduka pangan diri. Baka aku ke udah rinduka kita, baka nya meh kita patut rinduka pangan diri. Enti kita rinduka pangan diri, nya baru semua orang deka nemu kita murid aku.’—JOHN 13:34, 35.

Reti: Jesus ngasuh bala murid iya rinduka pangan diri sama baka chara iya rinduka sida. Taja pan orang ba jeman nya suah ngemaruhka orang indu enggau orang ari bansa bukai, Jesus enda baka nya. Iya rinduka semua orang enda ngira ari ni penatai pengidup sida. (John 4:7-10) Jesus sanggup meri awak, pengering, sereta penyamai diri ngambika ulih nulung orang bukai. (Mark 6:30-34) Jesus mega madah, “Aku tu pengibun bedus ti badas. Pengibun bedus ti badas nyerahka nyawa diri ke bedus.” (John 10:11) Pengerindu meransang Jesus sanggup nyerahka pengidup iya ke semua orang.

Teladan Orang Kristian Abad Keterubah: Ba abad keterubah, orang Kristian ngangau pangan diri “menyadi” tauka “menyadi indu.” (Pilimon 1, 2) Orang ari semua bansa dikelaluka datai ke dalam eklisia. Sida pechaya semua orang nya sama ‘laban orang Judah enggau orang bansa bukai sigi nadai bida ari pangan diri, Tuan siku nya aja ke nyadi Tuan ke semua mensia.’ (Rome 10:11, 12) Pengudah Pentikos 33 Masihi, bala murid ba Jerusalem “nyual reta tengkira sida, lalu nyadung duit ti ulih sida ari nya ngagai semua bala sida, nitihka guna sida siku-siku.” Nama kebuah sida ngereja nya? Ngambika orang Kristian ke baru dibaptisa ulih diau ba Jerusalem lalu terus “belajar ari sida rasul.” (Surat Kereja Rasul 2:41-45) Kurang ari 200 taun pengudah bala rasul mati, Tertullian nulis pasal runding orang bukai ngagai orang Kristian, “Peda meh chara sida rindu pangan diri . . . enggau chara sida ke sanggup mati ke pangan diri.”

Sapa Nitihka Teladan Sida Kemayaharitu? Bup The History of the Decline and Fall of the Roman Empire (1837) madahka, mayuh orang ke ngumbai diri Kristian “jai enggau pangan diri. Indah orang kapir pan enda jai ngagai sida.” Nitihka siti pansik ba Amerika Syarikat, mayuh orang ke ngumbai diri Kristian mega ngembuan runding ti enda manah ngagai orang ari bansa bukai. Kelimpah ari nya, orang gerija ari bansa Kristian ti sama ba siti menua pan enda ngelala orang ke sama pengarap enggau sida ba menua bukai. Nya kebuah sida enda ulih sereta enda diperansang nulung orang ke sama pengarap enggau sida.

Ba taun 2004, pengudah menua Florida dipangka empat ribut taufan dalam timpuh dua bulan, pengerusi Pusat Operasi Kecemasan Florida, udah meresa baka ni utai kena nulung orang ti ditinggang penusah nya dikena. Ku iya madah, “Nadai raban tauka gerempung bukai ke amat teratur baka Saksi-Saksi Jehovah.” Nya alai, iya sanggup meri nama-nama bantu ke diguna bala Saksi. Kelimpah ari nya, ba taun 1997, seraban Saksi-Saksi Jehovah udah mai pemakai, ubat, enggau gari kena nulung bala menyadi sida sereta orang bukai ba Republik Demokratik Kongo. Bala menyadi ba Eropah mega meri utai ke diguna ke beungkus sejuta dolar Amerika.