• TAUN ADA: 1963

• MENUA ASAL: BRITAIN

• SEJARAH: PENGAWA TI MANAH

AKU KE SUBA:

Aku ada ba Croydon, London Selatan. Aku anak keenam ari semilan iku diri menyadi. Asal apai indai aku ari St. Vincent ba Kepulauan Carribbean. Indai aku nitihka agama gerija Methodist, tang aku enda minat pasal Petara. Aku rindu agi macha bup, lalu suah minjau bup ari perpustakaan. Maya chuti sekula, aku rindu ngena awak macha bup ba tisi tasik.

Beberapa taun pengudah abis sekula, aku bisi ati deka nulung orang ke lemi sereta nadai daya. Nya kebuah, aku nulung orang ke diau ba jalai alun, sereta orang ke bisi penimpang. Udah nya, aku belajarka kursus sains kesihatan ba universiti. Pengujung iya, aku nyadi siku pakar perunding pengurusan, sereta penyelidik sosial persendirian (freelance). Aku semina begunaka laptop enggau Internet aja kena kereja. Aku mega ulih ngagai menua bukai pengelama beminggu, diau ba Hotel ke dikerinduka aku, ngagai spa sereta gim, lalu meda rampa menua ti lawa. Pengidup aku amat senang lalu aku rinduka pengidup aku. Tang, jauh ba lubuk ati aku, aku agi bisi ati deka nulung orang ke merinsa.

BAKA NI BUP KUDUS NGUBAH PENGIDUP AKU:

Pengelama betaun-taun, aku selalu betanya, “Nama tuju pengidup kitai, enggau nama kebuah ngaga mensia?” Tang aku enda kala berunding Bup Kudus bisi saut nya. Kena taun 1999, madi biak aku Margaret, ke udah nyadi Saksi ngabas aku begulai enggau siku da agi Saksi. Menyadi indu nya amat ibuhka aku. Nyadi, aku pan setuju belajarka Bup Kudus enggau iya. Tang, aku enda ngaga mayuh pemansang laban aku lebih agi ngemeratka pengawa aku, sereta pengidup ti senang.

Maya musin panas kena 2002, aku pindah ngagai barat daya England. Dia, aku tama kursus lepasan ijazah ba bidang penyelidikan sosial. Tuju aku, aku deka ngulihka ijazah kedoktoran. Ba maya ti sama, aku mega tetap agi datai ngagai gempuru Saksi-Saksi Jehovah begulai enggau anak aku ke agi mit. Taja pan aku rinduka kursus ijazah aku nya, tang mayuh utai ke ditanya aku pasal pengidup udah disaut maya aku belajarka Bup Kudus. Aku mega berengkah setuju enggau utai ke disebut ba Matthew 6:24 ke madahka, kitai enda ulih nyadi ulun ngagai dua iku tuan. Aku patut milih entara pengaya enggau Petara. Aku nemu, aku patut milih utai ke dikemeratka aku ba pengidup.

Ba taun sebedau nya, aku selalu datai ngagai raban belajarka Bup Kudus enggau bala Saksi. Maya nya, kami ngena bup “Pencipta” (Is There a Creator Who Cares About You?) a Aku andal, semina Jehovah ti Penempa kitai ke ulih mutarka semua penanggul mensia. Tang, kursus ba universiti selalu madahka, kitai enda begunaka Petara kena nemu pasal reti pengidup. Tu ngasuh aku ringat. Dua bulan pengudah nya, aku pansut ari kursus nya ngambika ulih fokus agi ngagai pekara rohani.

Ayat Bup Kudus ke meransang aku ngubah pengidup nya, Jaku-Dalam 3:5, 6. Ayat nya bisi madahka, ‘Panggaika diri ba Jehovah enggau pengabis ati nuan. Anang manggaika diri ba penemu diri empu. Awakka Jehovah seruran ngiring nuan, nya baru Iya deka nunjukka jalai ti ngena ngagai nuan.’ Taja pan pengidup aku penuh enggau penyenang sereta tebilang, tang aku semina bulih ati ti puas pengudah aku belajar pasal Petara kitai ti pengerindu. Penemu pasal tuju Petara ke bumi, sereta pengasih Jesus ke sanggup nebus kitai, meransang aku deka nyerahka diri ngagai Petara. Kena bulan April 2003, aku dibaptisa. Pengudah nya, aku belubah-lubah idup enggau sederhana.

PENGUNTUNG KE DITERIMA AKU:

Utai ti pemadu berega ba aku diatu, iya nya kaul aku enggau Jehovah. Aku ngasaika pengelantang sereta pengaga ati ti bendar ketegal ngelala Petara. Aku mega amat gaga laban ulih begulai enggau menyadi Kristian.

Aku agi rindu macha bup. Nengah gempuru Kristian sereta belajarka Bup Kudus, aku agi ulih ngereja hobi aku tu. Aku mega gaga laban ulih nulung orang bukai bulih pengidup ti manah agi diatu, sereta harapan jemah ila ti ngelantangka ati. Berengkah ari Jun 2008, aku nyadi penginjil penuh jam. Aku amat-amat gaga ati sereta puas ati laban udah tetemuka tuju pengidup. Aku amat beterima kasih ngagai Jehovah laban ngiring aku ke jalai pemendar.

• TAUN ADA: 1973

• MENUA ASAL: AUSTRIA

• SEJARAH: KAKI JUDI

AKU KE SUBA:

Aku dibesaika ba Braunau, iya nya siti pasar ti mit ba Austria. Ba endur tu mayuh orang kaya sereta kurang jenayah. Agama kami sebilik iya nya Katolik.

Kena taun 1984, maya aku beumur 11 taun, bisi utai ke nyadi lalu ngubah pengidup aku. Bisi sekali, aku enggau kaban rapat aku main bul. Tang lemai nya, iya mati eksiden. Betaun-taun pemati kaban aku enda ulih dilupaka aku, lalu tu ngasuh aku berunding nama penyadi ngagai orang pengudah mati.

Pengudah abis sekula, aku kereja nyadi juruelektrik. Aku mega kaki judi sereta betaruhka mayuh duit. Taja pia, aku nadai kala bisi penanggul ba duit. Aku ngena mayuh awak ba sukan, sereta rinduka lagu ti heavy metal sereta punk rock. Aku selalu ngagai disko sereta beparti. Gaya pengidup aku amat enda bemoral. Kumbaiku, tu ulih ngelantangka pengidup aku, tang iya ke amat aku berasai puang.

BAKA NI BUP KUDUS NGUBAH PENGIDUP AKU:

Kena taun 1995, siku Saksi ke udah tuai datai ngagai rumah aku. Iya meri aku siti bup ke bisi saut ngagai tanya “Baka ni gaya orang mati?” Nya meh tanya ke udah lama lekat ba untak aku, pengudah kaban rapat aku nadai. Aku pan nerima bup nya lalu macha iya ari pun nyentukka ujung!

Aku amat gagit laban udah tetemuka saut ngagai tanya aku! Ukai nya aja, aku mega belajarka mayuh agi pemendar ke bukai. Ketegal agama aku Katolik, aku semina belajar pasal Jesus. Tang pengudah mansik Bup Kudus, aku ngelala sapa Apai Jesus, iya nya Petara Jehovah. Aku sedar, kitai ulih semak Petara, lalu Iya empu dekaka kitai ngiga lalu nyadi kaban Iya. (Matthew 7:7-11) Aku mega belajar, perangai kitai ulih ngasuh Jehovah tusah ati tauka gaga ati, lalu Iya Petara ti ngamatka semaya. Aku mega berengkah mansik, semua utai ke ditulis ba Bup Kudus udah dikeamatka. Asil iya, pengarap aku ke Petara majak tegap.

Aku sedar, semina Saksi-Saksi Jehovah ke deka nulung orang faham agi pasal Bup Kudus. Aku selalu mandingka ayat ba bup Saksi-Saksi Jehovah enggau Bup Kudus Katolik aku. Majak agi aku mansik Bup Kudus, majak agi aku andalka diri udah tetemuka pemendar.

Aku mega sedar, aku patut idup sejalai enggau peneka Jehovah. Chunto iya, Epesus 4:22-24 nulung aku faham, aku patut muai pendiau aku ke lama, iya nya ulah ke nitihka peneka aku empu aja. Kelimpah ari nya, aku patut “ngerasukka pendiau ti baru ke digaga nitihka peneka Petara.” Nya alai, aku ngubah chara pengidup ti enda bemoral sereta badu agi bejudi. Aku bebendar deka muai tebiat ti amu sereta ngiga pengaya. (1 Korint 6:9, 10) Enti deka berubah, aku mega patut ngetu begulai enggau kaban aku ke lama, lalu ngiga kaban baru ke sama deka ngelantangka ati Petara.

Semua tu enda senang. Tang, aku berengkah datai ke gempuru lalu ngiga kaban ba dia. Aku mega mansik Bup Kudus kediri. Nyau kelama, aku nemu agi milih pemerindang, tuju pengidup, sereta nemu agi milih chara begari ti ngena. Kena taun 1995, aku dibaptisa nyadi siku ari Saksi Jehovah.

PENGUNTUNG KE DITERIMA AKU:

Suba, aku jampat ringat, tang diatu aku udah berubah. Aku mega enda kelalu irau pasal jemah ila. Kelimpah ari nya, aku ngembuan runding ti seimbang pasal duit sereta reta tengkira.

Aku gaga ati ulih nyadi sebagi ari ruang bilik Kristian ba serata dunya. Baka orang bukai, penyembah Jehovah mega bisi penanggul. Tang penetap ati sida maya napi penanggul amat meransang aku. Aku berasai lantang agi laban ukai idup kediri empu aja, tang ulih ngena awak sereta pengering aku kena nyembah Jehovah lalu nulung orang bukai.

• TAUN ADA: 1963

• MENUA ASAL: ENGLAND

• SEJARAH: BALAT ASA ATI

AKU KE SUBA:

Aku ada ba England. Maya aku beumur tujuh taun, kami sebilik pindah ke Gold Coast ba Queensland, Australia. Taja pan kami enda kaya, kami ngembuan chukup utai ke diguna.

Taja pia, aku enda lantang ati sereta selalu berasai asa ati enggau pengidup. Apai aku orang ke pengirup sereta selalu nyamah indai aku. Nya kebuah, aku enda sayauka apai aku. Nyau kelama, baru meh aku nemu kebuah ulah apai aku baka nya, ketegal iya bisi pengingat ti enda manah maya iya nyadi soldadu ba Malaya.

Maya aku ba sekula menengah, aku pan nyadi orang ke pengirup. Lebuh aku beumur 16 taun, aku ngetu sekula lalu enggau soldadu laut. Maya nya, aku makai dadah, gian nginsap sereta balat ngirup alkohol. Ulih disebut, ninting hari aku ngirup.

Maya aku beumur dalam urung 20 taun, aku pan berengkah berunding, kati Petara bisi ke nadai? Aku nanya diri, “Enti Iya amat bisi, nama kebuah Iya nejuka orang merinsa lalu mati?” Ba puisi ke digaga aku, aku selalu nyalahka Petara ketegal penyai ke nyadi ba dunya tu.

Maya aku beumur 23 taun, aku badu nyadi soldadu laut. Udah nya, aku nguji mayuh bengkah kereja ke bukai, indah kala ngagai menua bukai pengelama setaun. Tang nadai utai ke ulih ngubat ati aku ti asa. Pengidup aku nadai tuju. Aku nadai juluk ati deka meli rumah, bulih kereja ti tetap, tauka pangkat tinggi. Utai kedeka aku nya semina arak enggau musik.

Pengidup aku berengkah berubah maya aku ba Poland. Aku ngabas kem konsentrasi ti tebilang ba Auschwitz. Aku kala macha pasal pengawa ti jai ke nyadi ba kem nya. Maya aku bediri ba dia, lalu berundingka pemayuh orang ke diperinsa, aku berasai sinu ati. Aku enda faham, nama kebuah mensia sanggup sejai nya ngagai pangan diri. Lebuh aku musing kem nya, aku nyabak lalu berunding, “Nama kebuah?”

BAKA NI BUP KUDUS NGUBAH PENGIDUP AKU:

Kena taun 1993, pengudah aku pulai ari menua bukai, aku pan berengkah macha Bup Kudus. Enda lama udah nya, dua iku Saksi-Saksi Jehovah nginjil ngagai aku, lalu mai aku ngagai konvensyen ke deka diatur ba siti stadium ke enda jauh ari aku diau. Aku pan mutuska enggau konvensyen tu.

Beberapa bulan sebedau nya, aku kala ngagai stadium nya meda pekit ba sukan. Tang maya konvensyen, jauh amat bebida. Semua orang amat bebasaka pangan diri, ngena gari ti menyana, sereta bala anak mit pan mereti. Maya tengah hari, sida begumpul ba stadium lalu makai begulai. Pengudah abis makai, aku nadai tetemuka siti pan sampah ba endur sida makai tadi! Aku amat tekenyit. Tang utai ke negu ati aku nya, mua sida ti tenang. Pengidup ke baka nya meh ke digiga aku ngelamatu. Taja aku enda ingatka cheramah ke diberi, tang perangai ke diayanka bala Saksi maya nya terus lekat ba ati aku.

Lemai nya, aku teringatka betunggal aku ke rindu mansik pasal agama enggau macha Bup Kudus. Beberapa taun sebedau nya, iya madahka aku, kitai ulih ngelala pengarap ti bendar nengah perangai orang ke nitihka pengarap nya. (Matthew 7:15-20) Aku deka nemu, nama kebuah bala Saksi amat bebida, nya kebuah aku deka mansik mayuh agi pasal sida. Tu meh keterubah iya, aku ngasaika pengidup aku bisi harapan sereta bisi pengaga ati.

Ba minggu ke nangkanka nya, dua iku Saksi ke kala betemu enggau aku datai baru. Sida madahka diri deka ngajar aku Bup Kudus, lalu aku pan nerima. Aku mega berengkah datai begempuru enggau sida.

Pengudah aku belajarka Bup Kudus, runding aku pasal Petara terus berubah. Aku sedar, ukai Iya ke ngasuh pemerinsa nyadi ba dunya tu. Iya ke amat, Petara mega tusah ati sereta pedis ati meda orang ke jai. (Pemungkal 6:6; Masmur 78:40, 41) Nya alai, aku naka ulih deka ngagaka ati Jehovah lalu enggai sekali-kali ngemediska ati Iya. (Jaku-Dalam 27:11) Aku badu nginsap, balat ngirup alkohol, tauka ngereja ulah ti enda bemoral. Kena bulan Mac 1994, aku dibaptisa nyadi siku ari Saksi-Saksi Jehovah.

PENGUNTUNG KE DITERIMA AKU:

Diatu, aku amat-amat gaga ati sereta puas ati. Aku badu bepanggai ngagai alkohol kena mutarka penanggul aku. Tang, aku bepanggai ngagai Jehovah lalu nyerahka pengirau aku ngagai Iya.—Masmur 55:22.

Aku mega udah kawin enggau Karen, siku Saksi ti amat manah. Aku bisi siku anak tiri ke benama Nella. Pengelama 10 taun tu, rumah tangga kami lantang. Aku mega rindu nginjil sereta gaga ati ulih nulung orang ngelala Petara Jehovah. Diatu baru pengidup aku bisi tuju.