Aku ada ba Santo Domingo, Republik Dominika. Aku bisi empat iku diri menyadi, lalu aku ke pemadu biak. Apai indai aku orang ti bepelajar lalu dekaka kami begulai enggau orang ti manah sereta lurus ati. Empat taun sebedau aku ada, apai indai aku betemu enggau missionary Mormon. Apai indai aku rindu meda gari nembiak Mormon ti kemas enggau manah. Nya alai kami berengkah enggau gerija Mormon. Ba pulau tu, kami sebilik orang ti keterubah enggau gerija Mormon.

Lebuh aku nyau besai, aku rindu enggau pengawa sosial ba gerija. Aku mega rindu ajar Mormon ti betumpu ba moral sereta pengidup diri sebilik. Aku temegah ati enggau pengarap Mormon lalu bisi juluk ati deka nyadi seiku missionary sida.

Lebuh aku beumur 18 taun, kami sebilik pindah ngagai Amerika Serikat ngambika aku ulih neruska pelajar aku ba kolej. Setaun pengudah nya, ibu enggau aya aku, ke nyadi Saksi-Saksi Jehovah, nemuai ngagai kami sebilik ba Florida. Sida mai kami enggau konvensyen sida. Aku amat alit ati lebuh meda mayuh orang ngebak Bup Kudus lalu nulis nota. Nya alai, aku minta pen enggau keretas kena nulis nota.

Pengudah konvensyen ibu enggau aya aku deka nulung aku belajarka Bup Kudus laban sida nemu aku deka nyadi missionary Mormon. Aku setuju, laban ngelama tu aku mayuh belajar ari Bup Mormon lalu semina nemu mimit aja pasal Bup Kudus.

Lebuh berandauka Bup Kudus nengah telefon, ibu enggau aya aku seruran meransang aku mandingka utai ke dipechayaka aku enggau ajar ari Bup Kudus. Sida deka aku meda pemendar ari Bup Kudus enggau mata aku empu.

Bisi mayuh ajar Mormon ti diterima aku tang aku enda entu nemu sekalika ajar nya sejalai enggau Bup Kudus. Ibu aku ngirumka majalah Peratika! edisyen 8 November 1995, ke dikeluarka Saksi-Saksi Jehovah. Majalah nya bisi nyebut mayuh ajar Mormon ti enda kala didinga aku. Nya alai, aku ngelawa laman web rasmi Mormon lalu indah ngelawa muzium Mormon ba Utah kena nentuka utai ti dibacha aku nya amat tauka enda.

Aku tekenyit laban semua nya endang amat. Suba aku ngumbai Bup Mormon enggau Bup Kudus enda nyakal pangan diri. Tang pengudah aku mansik Bup Kudus, aku nyau sedar bisi utai ti enda sama entara ajar Mormon enggau utai ke diajar Bup Kudus.

Kelimpah ari nya, aku enda setuju enggau ajar Mormon ke ngemesaika menua diri. Ambika chunto, orang ke megai pengarap Mormon diajar kebun Eden ti asal nya ba Jackson County, Missouri, Amerika Serikat. Nabi gerija mega madah, “lebuh Perintah Petara berengkah merintah, bendira Amerika Serikat deka dibiau lalu semua orang deka bisi pengelepas sereta hak ti sama rata.”

Aku berunding nama deka nyadi ngagai menua bukai nyengkaum menua asal aku empu. Lebuh lemai hari seiku lelaki Mormon ke benung nerima latih nyadi missionary telefon ngagai aku. Aku lalu nanya iya sekalika iya deka ngelaban Mormon ari menua bukai enti sema bisi perang nyadi. Iya nyaut, au! Aku tekenyit enggau saut iya. Nya alai aku mansik ajar Mormon enggau dalam agi sereta indah bulih bantu ari tuai gerija kami. Tang sida madahka aku, utai ke ditanya aku nya siti misteri ke semina ulih disaut lebuh penampak pengarap majak terang.

Aku amat asa ati enggau utai ke dipadah sida. Aku berengkah meresa diri kena nemu kebuah aku deka nyadi missionary Mormon. Aku sedar kebuah aku deka nyadi missionary Mormon nya ketegal aku deka nulung orang bukai. Aku mega rindu enggau penuduk seiku missionary ti kesuah agi dikumbai orang tinggi. Aku nadai berunding pan pasal Petara lalu enda nemu pasal tuju Iya ke mensia. Taja pan aku udah macha Bup Kudus beberapa kali, aku enda ngelala Petara sereta enda beterima kasih ngagai ajar nya.

Lebuh belajar Bup Kudus enggau Saksi-Saksi Jehovah, aku belajar mayuh utai. Ambika chunto, aku belajar sapa nama Petara, nama nyadi ngagai orang ke udah mati, sereta tanggung pengawa Jesus kena ngamatka peneka Petara. Aku gaga ati laban diatu aku meretika agi ajar Bup Kudus, lalu ulih bekunsi enggau orang bukai. Ari suba aku nemu, Petara endang bisi, tang diatu lebuh besampi aku ngasaika diri benung bejaku enggau Kaban ti rapat enggau aku. Ba 12 Julai 2004, aku dibaptisa nyadi seiku ari Saksi-Saksi Jehovah. Enam bulan udah nya aku berengkah nginjil penuh jam.

Aku gawa ba indu opis sedunya Saksi-Saksi Jehovah ba Brooklyn, New York pengelama lima taun. Aku amat gaga ati ulih nulung ngeluarka Bup Kudus sereta litaricha Bup Kudus ke bejuta iku orang ba serata dunya. Aku mega gaga ati laban ulih nulung orang bukai belajar pasal Petara.