Maya ba Jerusalem, Jesus nusui pasal Apai iya, Jehovah, lalu madahka ulah ti salah ke dikereja bala tuai pengarap. (John 8:12-30) Utai ke dipadahka Jesus ulih nulung kitai meresa utai ke dipechaya orang mayuh pasal Petara. Ku Jesus: “Enti kita bepegai ba jaku aku, kita amat murid aku, lalu kita deka nemu pemendar, lalu pemendar deka ngelepaska kita.”—John 8:31, 32.

Baka ku Jesus, enti kitai bepegai ba jaku iya, kitai deka tetemuka “pemendar.” Nya alai, kitai patut seruran mandingka sesiti ajar enggau utai ke diajar Jesus sereta Bup Kudus, ngambika kitai nemu utai nya betul tauka salah. Tu meh utai ke dikereja orang ti mendingka ajar rasul Paul. Sida “mansik Bup Kudus tiap hari keran deka nemu enti jaku nya amat tauka enda.”—Surat Kereja Rasul 17:11.

Marco, Rosa, enggau Raymonde, ke disebut ba artikel sebedau tu, mansik utai ti dipechayaka sida lebuh sida belajarka Bup Kudus enggau Saksi-Saksi Jehovah. Nama asil iya?

Marco: “Pengajar Bup Kudus kami ngena Bup Kudus kena nyaut semua tanya aku enggau bini aku. Utai ke dipelajarka kami nulung kami majak rinduka Jehovah, lalu ngerapatka agi kaul kami duai melaki-bini!”

Rosa: “Terubah iya, aku ngumbai Bup Kudus nya siti Bup ke ngembuan ajar sereta runding mensia pasal Petara. Belubah-lubah, aku bulih saut ngagai tanya aku ari Bup Kudus. Diatu, ba aku, Jehovah amat-amat bisi lalu aku ulih andalka Iya enggau pengabis ati.”

Raymonde: “Aku besampi ngagai Petara ngambika aku ulih ngelala Iya. Enda lama udah nya, aku enggau laki aku berengkah belajarka Bup Kudus. Nyau kelama, kami tetemuka pemendar pasal Jehovah! Kualiti Iya amat negu ati kami.”

Bup Kudus ukai semina nulung kitai nemu pemula ke udah ditusui pasal Petara, tang Bup Kudus mega ngajar kitai pasal kualiti Petara. Kelimpah ari nya, Bup Kudus mega nulung kitai ‘meretika pemeri ti diberi Petara ngagai kitai.’ (1 Korint 2:12) Peda ke diri empu baka ni Bup Kudus ulih nyaut tanya ti beguna pasal, Petara, tuju Iya, sereta pengadang kitai. Saut ngagai sekeda tanya tu ulih ditemu ba “Ajar Bup Kudus > Saut Ngagai Tanya Pasal Bup Kudus” ba www.pr418.com. Nuan mega tau ngisi peminta kena belajarka Bup Kudus ari laman Web tu tauka ari seiku Saksi-Saksi Jehovah. Asil iya, nuan deka ngelala Petara lalu rinduka Iya.