Aku ada lalu dibesaika ba Rome, endur ke bisi mayuh orang ke gawa tang agi seranta. Pengidup aku tusah. Aku enda nemu sapa indai ada aku, lalu kaul aku enggau apai aku enda entu manah. Aku dibesaika ba endur ti enda entu manah.

Lebuh aku beumur sepuluh taun, aku berengkah ngenchuri. Kali keterubah aku ngerarika diri ari rumah, iya nya maya aku beumur 12 taun. Apai aku suah datai ke balai polis lalu mai aku pulai. Aku rindu belaya sereta mangah enggau semua orang. Lebuh aku beumur 14 taun, aku ninggalka rumah lalu enda pulai agi. Aku berengkah makai dadah, lalu diau ba sebelah jalai. Maya malam hari, aku ngeluit pintu kerita orang lalu tinduk ba dalam nya. Ba pagi hari, aku ngiga ai kena nuchi diri empu.

Aku majak landik ngenchuri—aku nabanka beg orang sereta ngerumpak rumah orang maya malam hari. Aku berengkah dikelala ketegal perangai aku ti jai. Nya alai, aku dibai enggau raban gangster ti balat jai. Sida meri aku “peluang” ngerumpak bank. Sida berengkah bebasaka aku ketegal ulah aku ti mangah. Enda ngira kini pejalai aku, aku seruran mai pistol. Maya tinduk, aku nyimpan pistol ba baruh panggal. Pengidup aku penuh laban pemangah, dadah, pengawa ngenchuri, jaku ti kamah sereta ngereja ulah ti kamah. Polis seruran ngagai aku, aku suah ditangkap lalu dijil betaun-taun.

Ba siti maya pengudah aku pansut ari rumah jil, aku ngabas ibu aku. Aku enda nemu ibu aku enggau dua iku anak iya udah nyadi Saksi-Saksi Jehovah. Sida mai aku datai ngagai gempuru Kristian. Ketegal aku deka nemu utai ti nyadi ba din, aku pan enggau sida. Pengudah datai ba palan gempuru, aku duduk semak pintu ngambika ulih meda orang ke pansut tama. Maya nya, aku mai pistol.

Gempuru nya ngubah pengidup aku. Aku ngasaika diri diau ba planet bukai. Sida ngelaluka aku enggau gaga sereta tuchum. Aku agi ingat enggau nyengala mua bala Saksi ke ngayanka pemanah ari ati. Tu amat bebida ari pengidup aku sebedau tu!

Aku berengkah belajarka Bup Kudus enggau Saksi-Saksi Jehovah. Nyau kelama, aku nemu aku patut ngubah pengidup diri. Aku nitihka lalau ba Jaku Dalam 13:20: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” Aku sedar aku patut ngenyauhka diri ari bala gangster. Tu enda senang dikereja, tang enggau saup Jehovah, aku mujur.

Aku bebendar badu nginsap sereta makai dadah. Aku nguntin buk aku ti panjai, badu ngena antin, lalu badu agi ngena jaku ti kamah. Tu meh terubah iya aku ulih nagang diri.

Aku enda rindu macha enggau belajar, nya alai tusah ba aku deka belajarka Bup Kudus. Tang, aku bebendar nguji lalu belubah-lubah rinduka Jehovah. Nambahka nya, bisi utai ke berengkah ngachau pengasai ati aku—aku suah berasai besalah lalu kakang sekalika Jehovah deka ngampunka penyalah ti udah digaga aku. Tang aku lantang lebuh macha pasal Jehovah ke deka ngampunka Raja David pengudah iya ngereja dosa ti besai.—2 Samuel 11:1–12:13.

Nginjil ari rumah ke rumah mega tusah ba aku. (Matthew 28:19, 20) Aku takut enggaika betemu enggau orang ke kala dikemediska aku! Tang nyau kelama, aku ulih mutarka asai ati ti takut. Aku puas ati laban ulih nulung orang bukai ngelala Jehovah ke deka ngampun.

Belajar pasal Jehovah udah nyelamatka aku! Mayuh ari bala kaban aku ke suba udah mati tauka dijil. Tang aku berasai puas sereta ngembuan tuju pengidup ti manah ke jemah ila. Aku udah belajar ngambika baruh ati, ngasi sereta nagang pengeringat diri. Asil iya, aku ngembuan kaul ti manah enggau orang bukai. Aku mega idup lantang enggau bini aku, Carmen. Kami duai gaga ati nulung orang bukai belajarka Bup Kudus.

Diatu, aku gawa enggau lurus—aku gawa nuchi bank tang ukai ngerumpak bank!