1, 2. Nama utai ti diperatika tuai ti ngabas ba mayuh endur gempuru?

TUAI ti ngabas nyauka nutup aum enggau bala tuai gempuru. Iya merening bala tuai gempuru tu sereta berasai sayau amat ke sida ketegal pemagas sida. Sekeda ari sida nyau udah tuai nyentukka tau nyadi apai iya. Tang, bisi utai ngirauka ati iya. Iya nanya sida, “Menyadi, nama udah digaga kita kena ngelatih orang bukai ngambika nerima mayuh agi tanggungjawap ba gempuru?” Sida tuai gempuru nemu, tuai ti ngabas udah meransang sida meri awak kena ngelatih orang bukai lebuh iya datai ngabas sida dulu agi ari nya. Seiku tuai gempuru ngaku, “Mimit aja udah digaga kami.” Semua tuai gempuru ke bukai setuju.

² Enti nuan nya tuai gempuru, nuan mega engka setuju. Tuai ti ngabas beratika bala tuai gempuru patut meri mayuh  agi awak, kena ngelatih bala menyadi Kristian lelaki ke tuai enggau biak, ngambika ulih nulung ba gempuru. Tang, tu engka enda senang. Nama kebuah?

3. (a) Baka ni Bup Kudus nunjukka pengawa ngelatih orang bukai nya beguna, lalu nama kebuah semua kitai patut beminat ba pengawa tu? (Peda nota kaki.) (b) Nama kebuah sekeda tuai gempuru engka tusah deka ngelatih orang bukai?

³ Tuai gempuru, nuan nemu endang sigi beguna meri awak kena ngelatih bala menyadi Kristian ke lelaki. * (Peda nota kaki.) Nuan nemu menyadi Kristian ke lelaki beguna kena nulung ngeringka gempuru ke diatu enggau nyukung gempuru ke baru dudi hari. (Bacha Isaiah 60:22.) Bup Kudus madahka nuan patut “ngajar orang bukai.” (Bacha 2 Timoti 2:2.) Tang, engka tusah nyediaka awak ngereja tu. Nuan patut bekereja sereta nyediaka utai ti diguna ruang bilik nuan. Nuan mega patut nyaga gempuru sereta utai bukai ke patut diperumbanka. Ketegal bisi mayuh utai digaga, aram kitai berandauka kebuah nuan patut meri awak ngelatih orang bukai.

4. Kekadang, nama kebuah tuai gempuru betangguh ngelatih menyadi Kristian ke lelaki?

⁴ Nama kebuah engka tusah deka meri awak ngelatih menyadi Kristian ke lelaki ba gempuru? Sekeda engka ngumbai: ‘Pengawa bukai ba gempuru patut diaduka enggau jampat. Enti aku enda ngelatih orang bukai, gempuru pan nadai nama-nama.’ Kati nya amat? Taja pan pengawa bukai patut diaduka enggau jampat, tang enti nuan betangguh ngelatih menyadi Kristian ke lelaki, nuan ulih ngenusahka gempuru.

5, 6. Nama ulih dipelajarka kitai ari chunto seiku deriba enggau chara iya nyaga kerita? Baka ni kitai mandingka chunto tu enggau pengawa ngelatih ba gempuru?

⁵ Pikirka chunto tu. Kena nyaga kerita, deriba nemu iya patut selalu nukar minyak injin. Tang, iya engka ngumbai ngisi minyak kerita beguna agi laban enti nadai minyak, kerita enda ulih bejalai. Iya mega engka ngumbai enti iya nadai awak, iya ulih betangguh nukar minyak injin. Taja pan bedau nukar minyak injin, kerita agi ulih bejalai. Tang, tu ulih ngenusah. Enti deriba enda nukar minyak injin ba maya ti patut, nyau kelama kerita deka rusak. Pengujung iya, iya begunaka mayuh jam enggau duit kena ngaduka kerita. Nama ulih dipelajarka kitai?

⁶ Tuai gempuru patut ngaduka pengawa ke patut diperumbanka enggau jampat. Enti enda, gempuru deka tusah. Baka deriba ke patut selalu ngisi minyak, tuai gempuru patut “nemu milih utai ti pemadu badas.” (Plp. 1:10) Tang sekeda tuai gempuru engka kelalu kisuk ngaduka pengawa tu, nyentukka sida nadai awak ngelatih orang bukai. Tu baka ke ngelakka kerita enda ditukar minyak injin. Enti tuai gempuru betangguh ngelatih menyadi Kristian ke lelaki, nyau kelama gempuru enda chukup menyadi Kristian ke lelaki kena nyaga gempuru.

7. Nama runding kitai pasal tuai gempuru ke meri awak ngelatih orang bukai?

 ⁷ Nya alai, anang ngumbai pengawa ngelatih nya enda patut dikemeratka. Tuai gempuru ke beberatka baka ni gaya gempuru dudi hari, lalu meri awak ngelatih orang bukai, nya nembiak Petara ke pintar sereta berega ba menyadi Kristian. (Bacha 1 Peter 4:10.) Baka ni gempuru bulih penguntung?

8. (a) Nama kebuah tuai gempuru patut ngelatih orang bukai? (b) Nama tanggungjawap ke patut digaga tuai gempuru ke bekereja ke Jehovah ba endur ti begunaka mayuh penginjil enggau jampat? (Peda kutak “ Pengawa Ti Diperumban.”)

⁸ Indah tuai gempuru ke pemadu bepeneleba patut baruh ati sereta nemu sida enda ulih ngereja mayuh pengawa baka ke diatu enti sida udah tuai. (Mik. 6:8) Pia mega, tuai gempuru patut nemu utai ti enda disadang “tau nyadi,” lalu tu ngasuh sida tusah bejalaika tanggungjawap. (P-jar. 9:11, 12; Jas. 4:13, 14) Ketegal sida rindu sereta ibuhka nembiak Jehovah, tuai gempuru bebendar ngajar utai ti udah ditemu sida ngagai menyadi Kristian lelaki ke biak.—Bacha Masmur 71:17, 18.

9. Nama kebuah pengawa ngelatih tu beguna bendar?

⁹ Tuai gempuru ke ngelatih orang bukai mega berega laban sida nulung ngeringka gempuru. Latih tu nyediaka menyadi Kristian ke lelaki kena nulung gempuru mengkang beserakup sereta tetap ati ke Petara. Tu beguna bendar ba hari ti penudi tu, kelebih agi maya penusah ti besai datai. (Esk. 38:10-12; Mik. 5:5, 6) Nya alai, tuai gempuru ti dikerindu, selalu meh meri awak ngelatih orang bukai berengkah ari seharitu.

10. Nama patut digaga tuai gempuru ngambika bisi awak ngelatih orang bukai?

¹⁰ Kami nemu kita bisi mayuh pengawa laban kita nyaga utai ti diguna ba gempuru. Nya alai, kita patut magi awak ngereja pengawa tu enggau pengawa ngelatih orang bukai. (P-jar. 3:1) Enggau tu, kita ngena awak enggau pemadu manah, lalu nguntungka gempuru dudi hari ila.

11. (a) Nama chara ngelatih ke dikena tuai gempuru ba serata menua? (b) Nitihka Jaku Dalam 15:22, nama kebuah beguna berandauka chara ke dikena bala tuai gempuru?

¹¹ Baru-baru tu, sekeda tuai gempuru ke mujur ngelatih menyadi Kristian lelaki ngereja mayuh agi tanggungjawap ba gempuru, udah ditanya baka ni sida ngereja nya. * (Peda nota kaki.) Semua tuai gempuru meri saut ti sama, taja pan sida bebida gaya pengidup. Nama reti nya? Latih ke sejalai enggau Bup Kudus beguna ngagai menyadi Kristian lelaki ba ‘semua gempuru.’ (1 Kor. 4:17) Nya alai, ba pelajar tu enggau pelajar ke nangkanka tu, kitai deka berandauka sekeda chara ke dikena bala tuai gempuru. (J-lam. 15:22) Sida ke ngelatih dikumbai pengajar, lalu orang ke dilatih dikumbai pelajar.

12. Nama patut digaga pengajar, lalu nama kebuah?

¹² Kesatu, pengajar patut ngena chara ti betul. Nama kebuah? Baka seiku pekebun ke patut nyediaka tanah sebedau  betanam, pengajar patut nyediaka ati pelajar sebedau ngajar iya penemu baru. Baka ni pengajar ngelatih ngena chara ti betul? Iya ulih nitihka chara seiku pengajar ke landik kelia menya, iya nya nabi Samuel.

13-15. (a) Nama diasuh Jehovah gaga Samuel? (b) Baka ni Samuel nyediaka Saul megai tanggungjawap baru? (Peda gambar ba pun pelajar.) (c) Nama kebuah jerita Bup Kudus pasal Samuel beguna ngagai tuai gempuru kemaya hari tu?

¹³ Bisi sekali, lebih ari 3,000 taun ti udah, Jehovah madah ngagai nabi Samuel ke udah tuai: “Ba urung maya tu pagila, Aku deka ngasuh siku lelaki ari raban bansa Benjamin betemu enggau nuan. Tata iya nyadi raja ke bala nembiak Aku Israel.” (1 Sam. 9:15, 16) Samuel nemu iya enda ulih agi ngiring bansa Israel, nya alai Jehovah deka iya milih seiku pengiring ke baru. Nyadi, Samuel berundingka chara kena nyediaka orang nya megai tanggungjawap baru tu.

¹⁴ Hari siti, Samuel betemu enggau Saul. Jehovah madahka iya: “Nya meh lelaki ke dipadahka Aku.” Tekala nya, Samuel ngereja utai ti udah diperundingka iya. Iya ngiga peluang ke manah ngambika ulih berandau enggau Saul. Samuel mai Saul enggau orang gaji iya makai, lalu meri seduai iya penuduk enggau dagin ti pemadu manah. Ku Samuel: “Empa dagin nya. Aku udah ngalau dagin nya ke nuan.” Pengudah makai, Samuel mai Saul ngagai rumah iya. Maya bejalai kin, seduai iya berandau. Pengudah datai ba rumah Samuel, seduai iya ke perabung rumah, lalu Samuel terus berandau enggau “Saul ba perabung rumah” nyentuk ke seduai iya tinduk. Hari siti da agi, Samuel milih Saul, nyium iya, lalu meri iya mayuh agi iring. Udah nya, Saul mupuk, lalu besedia enggau utai ti deka nyadi.—1 Sam. 9:17-27; 10:1.

¹⁵ Samuel milih Saul nyadi raja ke bansa Israel. Endang amat, tu engka enda sebaka enggau chara ngelatih menyadi Kristian lelaki ke nyadi tuai gempuru tauka penulung gempuru. Tang, tuai gempuru ulih belajar mayuh utai ari chara Samuel nyediaka ati Saul. Aram kitai berandauka dua iti chara nya.

16. (a) Baka ni asai ati Samuel lebuh orang Israel minta seiku raja? (b) Baka ni gaya Samuel lebuh Jehovah ngasuh iya milih Saul?

¹⁶ Deka, lalu enda nagang diri. Lebuh Samuel ninga orang Israel deka minta seiku raja mensia, iya berasai tusah ati, lalu ngasaika diri enda diguna. (1 Sam. 8:4-8) Tiga kali Jehovah ngasuh Samuel ningaka peminta sida laban Samuel enggai nitihka peminta sida. (1 Sam. 8:7, 9, 22) Taja pia, Samuel enda chemburu tauka ringat ngagai lelaki ke deka nganti penuduk iya nyadi pengiring. Lebuh Jehovah ngasuh iya milih Saul, iya enda nagang diri. Iya ngasi ukai ketegal diansak, tang ketegal iya rinduka Jehovah.

17. Baka ni tuai gempuru kemaya hari tu neladan Samuel, lalu baka ni asai ati sida?

¹⁷ Kemaya hari tu, mayuh tuai gempuru ke bepeneleba udah neladan Samuel, lalu ngelatih orang bukai enggau pengerindu. (1 Pet. 5:2) Tuai gempuru ke manah ati tu deka ngajar orang bukai, lalu enda irau bekunsi tanggungjawap ba gempuru enggau pelajar. Tang,  sida ngasaika menyadi Kristian lelaki ke berega tu sama “bekereja” nulung sida nyaga gempuru. (2 Kor. 1:24; Heb. 13:16) Lalu tuai gempuru ke enda ngira diri tu gaga ati meda pelajar ngena pengelandik sida nulung nembiak Jehovah.—SKR 20:35.

18, 19. Baka ni tuai gempuru nyediaka ati pelajar, lalu nama kebuah tu beguna?

¹⁸ Begulai rapat, ukai semina nyadi pengajar. Lebuh Samuel betemu enggau Saul, iya ulih terus milih Saul nyadi raja enggau ngambi sebutul mit minyak kana, lalu nuang minyak nya ba pala Saul. Raja ke baru udah dipilih, tang iya engka enda besedia ngiring nembiak Petara. Nya alai, Samuel meri awak kena nyediaka ati Saul megai tanggungjawap ke baru. Sebedau iya milih Saul, seduai iya makai, sama bejalai, berandau panjai, lalu belelak. Samuel nganti maya ti ngena endur milih raja ke baru.

¹⁹ Pia mega kemaya hari tu. Sebedau tuai gempuru berengkah ngelatih, iya patut begulai rapat enggau pelajar. Utai ti digaga tuai gempuru ngambika pelajar berasai senang belajar, bepanggai ba gaya enggau chara pengidup seduai iya. Tang enda ngira dini alai nuan diau, enti nuan meri awak enggau pelajar taja pan nuan mayuh pengawa, iya deka ngasaika diri berega ba nuan. (Bacha Rome 12:10.) Endang amat, pelajar deka beterima kasih ke pengerindu enggau pengibuh nuan ke iya.

20, 21. (a) Baka ni nuan nerangka pengajar ti mujur? (b) Nama deka dikerandauka kitai ba pelajar ke nangkanka tu?

²⁰ Endang amat, pengajar ti mujur rindu ngelatih orang bukai. Tang, iya mega patut rinduka orang ke dilatih iya. (Banding John 5:20.) Nama kebuah tu beguna? Laban enti pelajar ngasaika nuan amat ibuhka iya, iya deka belajar ari nuan. Tuai gempuru, enggau naka ulih meh ngajar sereta begulai rapat enggau pelajar.—J-lam. 17:17; Jhn. 15:15.

²¹ Pengudah nyediaka ati pelajar, tuai gempuru ulih berengkah ngelatih iya. Nama chara ke ulih dikena tuai gempuru? Tu deka dikerandauka ba pelajar ke nangkanka tu.