1. Nama kebuah nya manah kitai ulih ngambarka utai ti enda ulih dipeda? (Peda gambar ba pun pelajar.)

JEHOVAH udah meri kitai pemeri ti amat manah, iya nya ulih ngambarka utai ti enda ulih dipeda. Tu nulung kitai nganti utai manah ke deka nyadi jemah ila. Tu mega nulung kitai besedia sereta ulih nyeliahka penanggul. Jehovah nemu pasal jemah ila, lalu Iya madahka sekeda utai ke patut dianti kitai. Taja pan kitai enda ulih meda utai tu, kitai ulih ngambarka iya sereta arapka utai tu deka nyadi.—2 Kor. 4:18.

2, 3. (a) Baka ni pengawa ulih ngambarka utai nulung kitai? (b) Nama tanya ti deka disaut kitai ba pelajar tu?

² Endang amat, kekadang utai ti digambarka kitai enda ulih nyadi. Chunto, seiku anak mit indu engka ngambarka iya nepan seiku kebembang. Endang amat, tu enda ulih nyadi. Tang Hanah, indai Samuel, ngambarka utai ti ulih nyadi. Iya selalu berundingka pasal hari iya deka mai anak lelaki iya ngagai rumah Tuhan, ngambika gawa enggau imam. Tu ukai angan-angan aja. Tu utai ke deka dikereja iya. Nya alai enggau ngambarka hari nya, Hanah bulih pengering kena ngamatka semaya iya enggau Jehovah. (1 Sam. 1:22) Lalu enti kitai  ngambarka utai ti deka digaga Jehovah, kitai ngambarka utai ti amat deka nyadi.—2 Pet. 1:19-21.

³ Mayuh ari nembiak Jehovah maya jeman Bup Kudus ulih ngambarka nama utai ti udah disemaya Iya. Nama kebuah tu manah? Lalu nama kebuah nya manah kitai ngambarka baka ni gaya pengidup kitai lebuh semaya Jehovah dikeamatka?

4. Nama kebuah Abel ulih ngambarka utai ti manah pasal jemah ila?

⁴ Abel nya mensia keterubah ke bisi pengarap ba semaya Jehovah. Iya nemu utai ti dipadah Jehovah ngagai ular, pengudah Adam seduai Hawa bedosa: “Aku deka ngasuh nuan enggau indu tu begedika pangan diri. Anak iya enggau anak nuan deka seruran bemunsuh enggau pangan diri. Anak iya deka ngeredakka pala nuan, lalu nuan deka mantuk tumbit anak iya.” (P-kal. 3:14, 15) Abel enda entu nemu baka ni tu deka nyadi. Tang, iya engka selalu berunding pasal utai ke udah disebut Petara. Abel engka berunding, ‘Sapa deka pedis laban ular, lalu nulung mensia nyadi sempurna baru?’ Abel pechaya semua semaya Jehovah deka dikeamatka, lalu lebuh iya meri pemeri, Jehovah gaga ati nerima pemeri nya.—Bacha Pemungkal 4:3-5; Hebrew 11:4.

5. Nama kebuah nya manah Enok ngambarka pasal utai ke deka nyadi jemah ila?

⁵ Enok mega seiku da agi lelaki ke bisi pengarap ti teguh ba Petara. Iya idup ba entara orang ke nyebut “jaku jai” ngelaban Petara. Tang Enok berani, lalu nusui pesan Petara. Iya madahka Jehovah deka ngemunaska orang ke jai. (Jud. 14, 15) Nama nulung iya ngereja tu? Enok engka ngambarka gaya dunya lebuh semua orang nyembah Jehovah.—Bacha Hebrew 11:5, 6.

6. Pengudah Bah Besai, nama engka diperundingka Noah?

⁶ Noah bisi pengarap ba Jehovah, nya alai iya enda dipunaska maya Bah Besai. (Heb. 11:7) Lalu ketegal pengarap iya, Noah nyediaka jelu nyadika pemeri ngagai Jehovah. (P-kal. 8:20) Pengudah Bah Besai, dunya penuh enggau penyai baru. Nimrot berengkah merintah, lalu deka orang ngelaban Jehovah. (P-kal. 10:8-12) Tang, pengarap Noah mengkang teguh. Baka Abel, iya mega pechaya Petara deka muai dosa enggau pemati. Noah mega engka berunding pasal maya pemerintah ke jai deka nadai agi. Kitai mega ulih ngambarka utai ti amat manah tu, iya ke majak semak diatu!—Rom. 6:23.

7. Nama utai manah ti dianti Abraham, Isak enggau Jakop?

⁷ Abraham, Isak enggau Jakop ulih ngambarka utai ti manah pasal jemah ila. Jehovah udah besemaya semua bansa deka diberekat ketegal “peturun” sida. (P-kal. 22:18; 26:4; 28:14) Petara mega udah besemaya ruang bilik sida deka nyadi siti bansa ti besai, lalu diau ba Menua ti Udah Disemaya. (P-kal. 15:5-7) Ketegal Abraham, Isak enggau Jakop pechaya semaya Jehovah deka dikeamatka, sida ulih ngambarka sida sebilik udah diau ba endur nya. Iya ke amat, kenyau ari Adam seduai Hawa bedosa, Jehovah udah nulung nembiak Iya ke tetap ati nemu baka ni mensia deka bulih pengidup ti sempurna nya baru.

8. Nama nulung Abraham bisi pengarap ti teguh sereta deka ngasi?

 ⁸ Ketegal bisi pengarap ti teguh, Abraham ngasika Jehovah indah ba maya ti balat tusah. Abraham enggau orang bukai ke tetap ati endang ulih ngambarka utai ti udah disemaya Jehovah, taja pan semaya tu bedau dikeamatka maya sida agi idup. Bup Kudus madahka: “Sida udah meda lalu ngelaluka utai nya ari jauh.” (Bacha Hebrew 11:8-13.) Abraham nemu Jehovah seruran ngamatka semaya Iya, nya alai iya pechaya semua semaya Jehovah pasal jemah ila mega deka dikeamatka.

9. Baka ni pengarap Abraham pasal utai ti disemaya Petara nulung iya?

⁹ Ketegal Abraham bisi pengarap ba utai ti udah disemaya Jehovah ngagai iya, nya alai iya terus ngereja utai ti diasuh Jehovah. Chunto, iya ninggalka rumah iya ba menua Ur, lalu enda diau tetap ba siti-siti menua nyentuk ke iya mati. Iya nemu menua nya enda mengkang bisi laban pemerintah menua nya enda nyembah Jehovah. (Jos. 24:2) Tang, iya nganti maya Jehovah enggau perintah Iya deka merintah dunya belama iya. Perintah tu ‘sebuah nengeri ti bisi batu pemun, ti diperambu lalu digaga Petara.’ (Heb. 11:10) Abraham, Abel, Enok, Noah enggau sida ke bukai pechayaka pengangkat ari mati. Tiap kali sida berunding pasal pengidup belama iya ba dunya ti manah, pengarap sida ba Jehovah majak teguh agi.—Bacha Hebrew 11:15, 16.

10. Nama kebuah nya manah Sarah ngambarka utai ti deka nyadi jemah ila?

¹⁰ Sarah, bini Abraham, bisi pengarap ti teguh ba semaya Jehovah. Taja pan iya beumur 90 taun lalu bedau bisi anak, iya nganti maya endur iya bisi anak. Indah Sarah ngambarka bala peturun iya nyadi siti bansa ti besai. (Heb. 11:11, 12) Baka ni iya arapka tu tau nyadi? Laban Jehovah udah madah ngagai laki iya: “Aku deka merekatka iya, lalu Aku deka meri ngagai nuan siku anak lelaki ulih iya. Aku deka merekatka iya, lalu iya deka nyadi indai ke mayuh bengkah bansa, lalu sekeda ari peturun iya deka nyadi raja.” (P-kal. 17:16) Baka ke udah disemaya Jehovah, Sarah bisi seiku anak lelaki, iya nya Isak. Pengawa ajih tu ngasuh iya arapka semaya Jehovah ti bukai, deka dikeamatka. Kitai mega ulih neguhka pengarap kitai enti kitai ngambarka semua utai manah ti udah disemaya Jehovah ngagai kitai.

11, 12. Nama ngasuh pengerindu Moses ngagai Jehovah majak dalam agi?

¹¹ Moses mega bisi pengarap ba semaya Jehovah. Iya dibesaika nyadi anak raja menua Ejip. Tang, ketegal Moses rinduka Jehovah lebih agi ari utai bukai, iya enda inginka kuasa enggau pengaya. Iya udah belajar pasal Jehovah ari apai indai iya ke bansa Hebrew. Sida madahka iya Jehovah udah besemaya deka ngelepaska bansa Hebrew ari ke nyadi ulun, lalu meri sida Menua ti Udah Disemaya. (P-kal. 13:14, 15; P-sut. 2:5-10) Bendar agi Moses ngambarka semaya tu, dalam agi pengerindu iya ke Jehovah.

¹² Bup Kudus madahka kitai utai ti selalu diperundingka Moses: ‘Ulih pengarap, Moses enggai dikumbai uchu raja lebuh iya nyau besai tuai, tang ingin deka natka pemerinsa sama enggau bala nembiak Petara, lalu enda ngelantangka diri ngereja utai ti tau ngasuh bedosa. Iya ngira, natka diri diperinsa ketegal Kristus nya berega agi ari semua pengaya  menua Ejip, laban iya seruran merening ke mua ngagai upah ti deka diterima iya.’—Heb. 11:24-26.

13. Nama kebuah nya manah Moses terus berunding pasal semaya Jehovah?

¹³ Moses tentu selalu berunding pasal semaya Jehovah ke deka ngelepaska bansa Hebrew ari ke nyadi ulun. Baka nembiak Jehovah ke bukai, Moses mega nemu Jehovah deka ngelepaska semua mensia ari pemati. (Jop 14:14, 15; Heb. 11:17-19) Nya alai, Moses nemu Jehovah endang balat rinduka orang. Tu ngasuh Moses rinduka Jehovah enggau dalam agi sereta bisi pengarap ti teguh agi ba Iya. Tu mega nulung iya mengkang nyembah Jehovah nyentuk ke iya mati. (U-dat. 6:4, 5) Indah lebuh maya Raja Ejip deka munuh Moses, iya enda takut. Iya nemu Jehovah deka meri iya upah jemah ila.—P-sut. 10:28, 29.

14. Nama utai ti digambarka sekeda orang pasal jemah ila?

¹⁴ Mayuh orang berunding pasal jemah ila sereta ngambarka utai ti enda ulih nyadi. Chunto, sekeda orang ke seranta angan-angan deka nyadi kaya sereta nadai utai ti dikeirauka. Tang Bup Kudus madahka, pengidup ba dunya Sitan semampai “mai pemerinsa enggau ati ti tusah.” (Mas. 90:10) Tauka sekeda ngambarka perintah mensia deka mutarka semua penusah ba dunya. Tang Bup Kudus madahka, semina perintah Petara ulih ngereja nya. (Dan. 2:44) Lalu mayuh orang ngumbai dunya tu enda ulih berubah. Tang Bup Kudus madahka, Petara deka ngemunaska penyai ba dunya tu. (Sep. 1:18; 1 Jhn. 2:15-17) Orang ke ngambarka utai ti enda sejalai enggau utai ti dipadah Jehovah deka asa ati.

15. (a) Nama kebuah nya manah enti kitai ngambarka pasal utai ti disemaya Petara ke kitai? (b) Nama siti ari utai ti dianti nuan pasal jemah ila?

¹⁵ Jehovah udah besemaya deka meri kitai utai ti amat manah jemah ila. Lebuh kitai berundingka maya nya, kitai deka gaga ati sereta bulih pemerani kena nyembah Iya. Ulih nuan ngambarka nuan ngereja utai ti disemaya Jehovah, enda ngira nuan deka ke serega tauka ba dunya? Enti nuan nganti pengidup belama iya ba dunya, nuan ulih ngambarka diri bekereja enggau bala kawan nuan ngaga dunya nyadi kebun ti manah. Orang ke ngemataka pengawa tu ibuhka nuan. Lalu semua orang ke diau dia rinduka Jehovah, baka nuan empu. Nuan bepengerai sereta kering, lalu nadai utai ti ngasuh nuan irau ati. Nuan gaga ati laban nuan ulih ngena penemu enggau pengelandik nuan, kena nulung orang bukai sereta kena ngemuliaka Jehovah. Nuan engka nulung orang ke udah diangkatka ari mati ngelala Jehovah. (Jhn. 17:3; SKR. 24:15) Lebuh nuan ngambarka utai tu, nya ukai angan-angan. Semua utai nya deka dikeamatka, laban nya udah dipadah ba Bup Kudus.—Isa. 11:9; 25:8; 33:24; 35:5-7; 65:22.

16, 17. Nama kebuah nya manah berandau pasal utai ti disemaya Jehovah ke kitai jemah ila?

¹⁶ Lebuh kitai madahka bala menyadi Kristian kitai utai ti deka digaga ba dunya baru, kitai nulung pangan diri ngambarka utai ti manah pasal jemah ila. Endang amat, kitai enda nemu enggau silik utai ti deka dikereja tiap iku kitai. Tang, lebuh kitai berandau pasal utai ti dianti kitai, tu nunjukka kitai bisi pengarap ba utai ti disemaya Jehovah. Enggau tu, kitai  meransang pangan diri terus nyembah Jehovah ba maya ti tusah tu, baka ke digaga rasul Paul enggau bala menyadi Kristian iya ba Rome.—Rom. 1:11, 12.

¹⁷ Lebuh nuan berunding pasal utai ti disemaya Jehovah ke jemah ila, nuan deka kurang agi berunding pasal penusah diri. Bisi sekali Peter irau ati, lalu nanya Jesus: ‘Peda nuan, kami udah ninggalka semua utai lalu nitihka nuan. Nama utai ulih kami?’ Jesus deka Peter enggau bala rasul bukai ke enggau iya berunding pasal utai manah ke deka digaga sida jemah ila. Iya madahka sida: ‘Lebuh Anak Mensia duduk ba kerusi diraja iya ti bemulia ba dunya ti baru, kita ke udah nitihka aku deka mega duduk ba dua belas iti kerusi diraja, ngakim dua belas raban bansa orang Israel. Lalu genap iku orang ke udah ninggalka rumah, tauka menyadi lelaki, tauka menyadi indu, tauka apai, tauka indai, tauka anak, tauka umai, ketegal nama aku, deka nerima seratus kali mayuh agi, lalu deka diberi pengidup ti meruan belama iya.’ (Mat. 19:27-29) Nya alai, Peter enggau bala rasul ke bukai ulih ngambarka sida merintah enggau Jesus ba serega sereta nulung mensia ke ngasi ba dunya nyadi sempurna.

18. Nama kebuah nya manah kitai ngambarka maya Jehovah deka ngereja utai ti disemaya Iya?

¹⁸ Kitai udah belajarka utai ti nulung nembiak Jehovah ngembuan pengarap ti teguh. Abel ngambarka semaya Jehovah pasal pengidup ti manah agi jemah ila, lalu ketegal iya bisi pengarap ba semaya nya, iya ngerinduka ati Jehovah. Abraham ngambarka maya semaya Jehovah pasal “anak” deka dikeamatka, nya alai iya ngasika Jehovah taja pan ba maya ti balat tusah. (P-kal. 3:15) Moses nganti upah ti disemaya Jehovah ke iya, lalu tu nulung iya tetap ati sereta rinduka Jehovah. (Heb. 11:26) Enti kitai ngambarka maya Jehovah deka ngereja semua utai ti disemaya Iya, pengarap enggau pengerindu kitai ke Iya deka teguh agi. Ba pelajar ke nangkanka tu, kitai deka belajarka siti da agi chara kitai ngambarka utai.