1. Nama utai ti dikumbai orang enda salah?

KITAI diau ba dunya ti penuh enggau ulah ti kamah. Chunto, mayuh orang ngumbai homoseksual tauka besetubuh enggau orang ke ukai laki tauka bini diri nya enda salah. Cherita wayang, bup, lagu, enggau iklan, penuh enggau ulah seks ti kamah. (Mas. 12:8) Tang, Jehovah ulih nulung kitai idup enggau chara ti ngerinduka ati Iya. Kitai ulih tuchi, tauka beresi, ba dunya ti penuh enggau ulah ti kamah.—Bacha 1 Tesalonika 4:3-5.

2, 3. (a) Nama kebuah kitai patut nulak pengingin ti salah? (b) Nama deka dikerandauka kitai ba pelajar tu?

² Ngambika ngerinduka ati Jehovah, kitai patut nyeliahka semua utai ti dipegedika Iya. Tang ketegal kitai enda sempurna, kitai engka bisi pengingin deka ngereja ulah ti kamah, baka ikan ke deka makai umpan. Enti kitai berengkah bisi runding ti kamah, kitai patut jampat-jampat nulak iya. Enti enda, pengingin ti kamah deka majak balat nyentukka kitai deka ngereja dosa. Baka ke dipadah  Bup Kudus: “Lebuh pengingin nya udah ngandung, iya ngadaka dosa.”—Bacha James 1:14, 15.

³ Pengingin ti salah ulih tumbuh ba ati kitai. Nya kebuah kitai patut bejimat pasal utai ti dikinginka kitai. Enti kitai nulak pengingin ti salah, kitai deka nyeliahka ulah seks ti kamah sereta penusah ti datai ari pengawa nya. (Gal. 5:16) Ba pelajar tu, kitai deka berandauka tiga iti utai ti ulih nulung kitai ngelaban pengingin ti salah: kaul ti manah enggau Jehovah, jaku lalau ari Jaku Iya, sereta tulung ari orang Kristian ke teguh ba pengarap.

4. Nama kebuah kitai patut datai semak ngagai Jehovah?

⁴ Bup Kudus madahka orang ke deka ‘datai semak ngagai Petara’: “Basu jari kita” sereta “tuchi ati kita.” (Jas. 4:8) Enti Jehovah nya Kawan kitai ti pemadu manah, kitai deka pengawa enggau runding kitai ngerinduka ati Iya. Enti runding kitai tuchi sereta beresi, ati kitai mega deka beresi. (Mas. 24:3, 4; 51:6; Plp. 4:8) Jehovah nemu kitai enda sempurna, lalu kitai engka bisi berunding pasal ulah ti kamah. Tang, ketegal kitai enggai ngenusahka ati Jehovah, kitai enggau naka ulih nulak runding ti salah. (P-kal. 6:5, 6) Kitai enggau naka ulih nyaga runding kitai ngambika tuchi.

5, 6. Baka ni sampi ulih nulung kitai ngelaban pengingin deka ngereja ulah ti kamah?

⁵ Enti kitai terus besampi minta tulung ari Jehovah, Iya deka nulung kitai ngelaban runding ti kamah. Iya meri kitai roh kudus ngambika kitai bisi pengering kena meruan tuchi. Dalam sampi, kitai ulih madah ngagai Jehovah, kitai deka runding kitai ngerinduka ati Iya. (Mas. 19:14) Kitai enggau baruh ati ngasuh Jehovah meda sekalika bisi pengingin ti tau ngemedis dalam ati kitai, ke ulih ngasuh kitai bedosa. (Mas. 139:23, 24) Terus minta Jehovah nulung kitai nulak ulah ti kamah, lalu ngereja utai ti ngena taja pan ba maya ti tusah.—Mat. 6:13.

⁶ Sebedau belajar pasal Jehovah, kitai engka rindu ngereja utai ti enda diterima Iya, lalu kitai engka agi ngelaban pengingin tu. Tang Jehovah ulih nulung kitai berubah, lalu ngereja utai ti ngerinduka ati Iya. Chunto, pengudah Raja David beleman enggau Batseba, iya nesal ati sereta minta Jehovah meri iya ati ti “tuchi,” lalu nulung iya ngasika Jehovah. (Mas. 51:10, 12) Nya alai, enti kitai kala bisi pengingin ti balat deka ngereja ulah ti kamah, lalu agi ngelaban pengingin nya, Jehovah ulih nulung kitai bisi pengeran deka ngasika Iya sereta ngereja utai ti ngena. Iya ulih nulung kitai nyaga runding kitai ti enda sempurna.—Mas. 119:133.

7. Baka ni Jaku Petara nulung kitai nulak runding ke deka ngereja ulah ti kamah?

⁷ Jehovah ulih nyaut sampi kitai ke minta tulung ngena Jaku Iya, Bup Kudus. Dia, kitai bulih penemu Petara ti tuchi. (Jas. 3:17) Lebuh kitai macha Bup Kudus ninting hari, kitai ngisi runding kitai enggau utai ti tuchi. (Mas. 19:7, 11; 119:9, 11) Ba Bup Kudus mega bisi chunto enggau jaku tangkan ke ulih nulung kitai nulak runding enggau pengingin ke deka ngereja ulah ti kamah.

8, 9. (a) Nama kebuah seiku orang bujang beleman enggau seiku indu ke ngereja ulah ti kamah? (b) Nama utai ti ulih nulung kitai nyeliahka utai ti dipadah ba Jaku Dalam bab 7?

 ⁸ Ba Jaku Dalam 5:8, Jaku Petara ngasuh kitai nyeliahka diri ari ulah ti kamah. Ba Jaku Dalam bab 7, kitai macha siti cherita pasal seiku orang bujang ke bejalai semak rumah seiku indu ke ngereja ulah ti kamah, lebuh malam hari. Indu nya ba sukut jalai, “ngena pekayan baka indu sundal.” Iya mansang ngagai orang bujang nya, engkauk iya, nyium iya, lalu nyebut utai ke ulih ngujungka pengingin ti salah tumbuh dalam ati orang bujang nya. Orang bujang nya enda nulak pengingin nya, lalu nya ngujungka iya beleman enggau indu nya. Taja pan orang bujang nya enda tepikir deka ngereja dosa nya, tang iya ngereja dosa nya. Udah nya iya bulih penusah ba pengidup. Enti iya berundingka penusah ti deka nuntung, iya tentu nyeliahka diri ari indu nya!—J-lam. 7:6-27.

⁹ Baka orang bujang nya, kitai engka ngaga pemutus ti salah laban kitai enda berundingka penusah ti deka nuntung. Chunto, lebuh malam hari sekeda program TV ngayanka cherita ti bekaul enggau ulah ti kamah. Nya alai, kitai ulih bulih penusah enti selalu  ngalihka program TV, semina ketegal deka nemu cherita bukai ke bisi ba TV. Kitai mega deka bulih penusah enti klik link internet ke enda temu penunga, baka ngelawa chat room tauka laman Web ke bisi iklan ke ngayanka ulah ti kamah tauka link ke nuju ngagai pornografi. Ba pekara tu, utai ke dipeda kitai ulih ngasuh kitai bisi pengingin deka ngereja ulah ti kamah, lalu tu ulih ngujungka kitai enda ngasika Jehovah.

10. Nama kebuah betundi enggau pangan diri tau ngenusah? (Peda gambar ba pun pelajar.)

¹⁰ Bup Kudus mega madahka kitai baka ni lelaki enggau indu patut begulai enggau pangan diri. (Bacha 1 Timoti 5:2.) Orang Kristian semina ngayanka pengerindu ti romantik ngagai laki bini diri, tauka ngagai orang ke deka enggau sida jadi. Sida enda nguntik tauka betundi enggau orang bukai. Sekeda orang engka ngumbai lingguk tubuh, gaya bejaku, tauka merening orang enggau romantik enda salah, asal aja enda beteguka pangan diri. Tang enti dua iku orang betundi enggau pangan diri, tu ulih ngepunka runding ti kamah, ke ngujungka ngereja ulah seks ti kamah. Utai tu kala nyadi, lalu iya ulih nyadi baru.

11. Nama dipelajarka kitai ari Josep?

¹¹ Josep nya teladan ti manah ke kitai. Bini Potipar ngumbuk Josep beleman enggau iya. Josep nulak, tang bini Potipar enda ngetu ngumbuk iya. Ninting hari iya mai Josep “tinduk” enggau iya. (P-kal. 39:7, 8, 10) Seiku orang ke landik pasal Bup Kudus madahka, bini Potipar ngumbai Josep ulih diumbuk iya enti seduai iya kediri aja. Josep enda alah diumbuk iya sereta mengkang enggai. Nya alai, Josep enda ngelakka pengingin ti salah tumbuh dalam ati iya. Lebuh bini Potipar narit baju panjai Josep sereta ngansak Josep beleman enggau iya, Josep ninggalka baju panjai iya, “lalu belanda ke luar.”—P-kal. 39:12.

12. Baka ni kitai nemu utai ti dipeda ulih ngachau ati kitai?

¹² Jesus madah utai ti dipeda kitai ulih ngachau ati sereta ngasuh pengingin seks ti salah tumbuh dalam ati. Ku iya: “Barang sapa merening ngagai indu enggau ati ti kamah, udah butang enggau indu nya dalam ati iya.” (Mat. 5:28) Tu nyadi ba Raja David. “Ba perabung rumah nya, iya lalu tepedaka siku indu mandi,” tang iya enda ngetu malik sereta berunding pasal indu nya. (2 Sam. 11:2) Taja pan indu nya bini orang, iya bisi pengingin dekaka indu nya, lalu beleman enggau indu nya.

13. Nama kebuah kitai patut “besumpah” enggau mata kitai, lalu baka ni kitai ngereja tu?

¹³ Enti kitai deka nulak runding ti kamah, kitai patut nitihka teladan Jop. Ku iya: “Aku udah besumpah madahka diri enggai merening.” (Jop 31:1, 7, 9) Baka Jop, kitai ulih mutuska diri enda ngembuan runding ti kamah ngagai orang ke diperening kitai. Lalu enti kitai meda gambar ke ngayanka ulah ti kamah ba komputer, iklan, majalah, tauka dini-dini endur, kitai patut jampat-jampat malik ke bukai.

14. Nama patut digaga kitai ngambika meruan tuchi?

¹⁴ Lebuh nuan berundingka pasal utai ti udah dikerandauka kitai, nuan nemu nuan patut bebendar ngelaban  pengingin deka ngereja ulah ti kamah. Enti nuan deka berubah, gaga meh enggau jampat! Enti nuan ngasika jaku Jehovah, nuan ulih nyeliahka ulah seks ti kamah sereta meruan tuchi.—Bacha James 1:21-25.

15. Enti kitai ngasaika tusah deka ngelaban pengingin ti salah, nama kebuah kitai patut minta tulung?

¹⁵ Enti nuan ngasaika tusah deka ngelaban pengingin ti salah, berandau meh enggau orang ke udah lama nyembah Jehovah ba gempuru, ke ulih meri jaku lalau ti manah ari Bup Kudus. Engka enda senang nuan berandau pasal penanggul diri ngagai orang bukai, tang nuan patut minta tulung. (J-lam. 18:1; Heb. 3:12, 13) Orang Kristian ke teguh ba pengarap ulih nulung nuan nemu ubah ke patut digaga nuan. Udah nya, gaga ubah ke dipadah ngambika Jehovah ulih terus nyadi Kawan nuan.

16, 17. (a) Baka ni bala tuai gempuru ulih nulung orang ke tusah deka ngelaban pengingin deka ngereja ulah ti kamah? Beri siti chunto. (b) Nama kebuah orang ke meda pornografi patut jampat-jampat minta tulung?

¹⁶ Bala tuai gempuru ulih nulung kitai. (Bacha James 5:13-15.) Betaun-taun seiku lelaki ke agi biak ba Brasil ngasaika diri tusah deka ngelaban pengingin ti salah. Ku iya: “Aku nemu runding aku enda ngerinduka ati Jehovah, tang aku malu amat deka bekunsi asai ati aku enggau orang bukai.” Seiku tuai gempuru nemu lelaki nya begunaka tulung, lalu ngasuh iya ngawakka tuai gempuru nulung iya. Ku lelaki nya: “Aku enda nyangka sida tuai gempuru ngemanah nya enggau aku, nyentukka aku ngasaika diri enda patut nerima pemanah ke baka nya. Sida ningaka penanggul aku enggau manah. Sida ngena Bup Kudus kena madahka pengerindu Jehovah ke aku, lalu sida besampi enggau aku. Tu nulung aku senang agi nerima jaku lalau ari Bup Kudus ke diberi sida.” Pengudah kaul iya enggau Jehovah teguh agi, iya madahka: “Diatu aku nemu kebuah kitai patut ngiga tulung, ari ke napi penanggul kitai nya kediri aja.”

¹⁷ Enti nuan gian meda pornografi, nuan patut jampat-jampat minta tulung. Enti nuan lubah minta tulung, pengingin nuan deka ngereja ulah seks ti kamah balat agi. Udah nya nuan deka ngenusahka orang bukai sereta ngasuh orang bejaku jai pasal Jehovah. Mayuh orang udah minta tulung sereta nerima jaku lalau ari bala tuai gempuru ngambika ulih ngerinduka ati Jehovah, lalu mengkang ba gempuru Kristian.—Mas. 141:5; Heb. 12:5, 6; Jas. 1:15.

18. Nama deka digaga nuan?

¹⁸ Dunya Sitan majak penuh enggau ulah ti kamah. Tang, nembiak Jehovah bebendar ngetanka runding ti beresi sereta tuchi. Jehovah temegahka sida. Aram meh kitai mengkang semak ngagai Jehovah sereta nitihka jaku lalau ari Bup Kudus enggau ari gempuru Kristian. Enggau tu, kitai deka gaga ati sereta bisi ati ti beresi. (Mas. 119:5, 6) Jemah ila, pengudah Sitan dibuai, kitai deka idup belama iya ba dunya baru Petara ti tuchi.