Nitihka siti kamus, sains nya “pelajar ti teratur pasal utai ba dunya enggau gaya utai ba dunya raya, ari utai ti diperati, dipansik, enggau disukat.” Pengawa tu tusah sereta suah ngasaka ati. Bala saintis ngena awak beminggu, bebulan, indah betaun kena berati sereta ngaga pansik. Kekadang, pengawa sida enda mujur. Tang, bisi mega mujur sereta meri penguntung ngagai mensia. Peratika sekeda chunto.

Siti kompeni ba Eropah udah nyampur pelastik ke teguh enggau penapis ke pemadu baru, kena ngasilka perengka ke ulih dikena nyeliahka penyakit ari ngirup ai ke kamah. Perengka tu udah dikena maya penusah ngenyit, baka tanah berenyang ke nyadi ba menua Haiti kena taun 2010.

Ba atas langit, mayuh satelit ngasilka sistem ke dikumbai Global Positioning System (GPS). GPS digaga ke dikena bala soldadu. Tang GPS tu mega beguna ba bala deriba rengka pengangkut, orang ke mai bilun enggau kapal, sereta bala pengasu enggau orang ke bejalai ba kampung, kena nulung sida nemu tunga jalai. Kitai beterima kasih ke bala saintis ke ngaga GPS, laban sistem tu ngenyenangka pejalai kitai.

Kati nuan ngena telefon binching, komputer, tauka Internet? Bisi nuan beratika pengerai nuan manah agi ketegal ubat baru ke bisi diatu? Kati nuan bejalai ngena bilun? Enti pia, nuan bisi bulih penguntung ari chara sains ngenyenangka pengidup mensia. Sains udah ngubah pengidup nuan manah agi.

Kena ngemansangka pansik sida, bala saintis moden mansik utai ba dunya enggau silik agi. Saintis nuklear deka mansik gaya atom enggau silik agi, lalu saintis astrofizik deka mansik utai ke nyadi bebiliun taun menya, ketegal deka nemu ari ni penatai dunya raya. Lebuh sida mansik enggau mayuh sereta dalam agi, nyengkaum mansik endur ke enda ulih dipeda sereta enda ulih digagai, sekeda bala saintis ngumbai enti Petara ba Bup Kudus nya amat bisi, sida tentu ulih tetemuka Iya.

Sekeda bala saintis enggau orang tebilang ke nyukung penemu mensia bendar agi ba pengawa sida. Sida neruska utai ke dipadahka penulis sains, Amir D. Aczel ke madahka “penemu sains ke nunjukka nadai Petara.” Chunto, seiku saintis fizik ke tebilang ba dunya madah “nadai bukti nunjukka Petara bisi ngaga dunya raya, lalu tu enggau terang nunjukka Petara endang amat nadai.” Sekeda ngumbai pengawa ke dikereja Petara ke dipadah ba Bup Kudus nya “majik” tauka “utai nyelai ke bula.” *

 Taja pia, tu utai ti patut ditanya: Kati sains udah bisi chukup penemu pasal semua utai ba dunya ke ngasuh bala saintis ulih ngaga pemutus ti tetap? Nadai. Sains udah mayuh pemansang, tang mayuh bala saintis nemu agi mayuh utai ke enda ditemu tauka engka sigi enda ulih ditemu. “Kitai endang sigi enda ulih nemu semua utai,” ku seiku saintis fizik sereta penerima anugerah Nobel ke benama Steven Weinberg, pasal utai ke bisi ba dunya. Profesor Martin Rees, Astronomer Royal of Great Britain, nulis: “Endang bisi utai ke enda ulih ditemu mensia.” Iya ke amat, mayuh utai ba dunya tu, ari sel ke mit nyentuk ngagai dunya raya ti besai, agi enda ulih ditemu sains moden. Peratika chunto tu:

• Bala saintis biologi enda entu nemu proses ke nyadi dalam sel utai idup. Baka ni sel nya ngena tenaga, ngasilka protein sereta bepechah, bedau entu ulih disaut enggau terang.

• Kuasa graviti seruran nyadi ba pengidup kitai. Tang, saintis fizik agi enda entu nemu baka ni kuasa graviti narit mensia ke baruh ngagai tanah lebuh sida merejuk, tauka baka ni kuasa graviti ngetanka bulan ngambika enda pansut ari orbit lebuh iya ngelingi bumi.

• Saintis kosmologi madahka kira-kira 95 peratus utai ke ba dunya raya enda ulih dipeda tauka ditemu ngena perengka sains. Sida magi utai tu ngagai dua begian, iya nya dark matter enggau dark energy. Utai tu agi mengkang enda ditemu.

Bisi utai bukai ke enda ditemu agi nusutka runding bala saintis. Nama kebuah? Seiku penulis pasal sains ti tebilang madahka: “Penemu kitai balat dipampul utai ke enda ditemu kitai. Ku aku, pengidup ba sains ngasuh temegah sereta enggai nerima penemu ari orang bukai.”

Nya alai, enti nuan berunding sekalika sains patut nganti Bup Kudus sereta muai pengarap nuan ba Petara, perundingka pekara tu: Enti bala saintis ke pintar enggau perengka sains ti moden semina bulih mimit aja penemu pasal semua utai ba dunya, patut nuan nerima penemu sains nya, enggau enda bedulika utai ke enda ulih dipansik sida? Ari semua pansik ke udah digaga, Encyclopedia Britannica madahka: “Nyauka 4,000 taun pengudah mansik pasal astronomi, dunya raya kitai tu agi enda ulih ditemu enggau mayuh.”

Saksi-Saksi Jehovah bebasaka hak tiap iku orang ngaga pemutus. Kami deka nitihka iring Bup Kudus tu: “Awakka semua orang nemu penyiru kita.” (Pilipi 4:5) Enggau tu, kami mai nuan mansik baka ni sains enggau Bup Kudus nya sejalai enggau pangan diri.