1. Kitai diau ba timpuh ke baka ni?

KITAI idup ba “mayuh macham penusah.” Kenyau ari taun 1914, lebuh “hari ti penudi” berengkah, gaya dunya majak jai ari ke udah. (2 Tim. 3:1-5) Lalu kitai pechaya dunya deka majak jai, laban Bup Kudus madahka “orang ke jai, enggau orang ke pura-pura ngapa, deka majak jai se-jai.”—2 Tim. 3:13.

2. Nama bansa pemerindang ti dikerinduka orang kemaya hari tu? (Peda gambar ba pun pelajar.)

² Mayuh orang kemaya hari tu meda tauka ngereja pengawa ti jai, ulah ti kamah, tauka utai ti bekaul enggau magik sereta antu ke pemerindang. Chunto, Internet, program TV, cherita wayang, bup, sereta majalah suah ngambarka pengawa ti jai enggau ulah ti kamah. Pengawa nya baka ke enda salah. Lalu, ulah ke enda diterima suba, diatu diterima sereta dikemendarka ba sekeda endur. Tang, tu ukai reti iya Jehovah nerima ulah nya.—Bacha Rome 1:28-32.

3. Nama runding orang pasal sida ke nitihka ukum Petara?

 ³ Ba kurun ti keterubah, orang mega meda pengawa ke jai sereta ulah ti kamah ke pemerindang. Tang bala murid Jesus enda enggau, laban sida nitihka ukum Petara. Tu ngasuh orang ke semak sida “tekenyit ati.” Nama penyadi? Orang ngeleseka orang Kristian sereta merinsaka sida. (1 Pet. 4:4) Pia mega kemaya hari tu, mayuh orang ngumbai sida ke nitihka ukum Petara nya nyelai. Iya ke amat, Bup Kudus nangkan kitai, barang sapa ke nitihka teladan Jesus Kristus “deka kena perinsaka magang.”—2 Tim. 3:12.

4. Nama kebuah kitai enda patut rinduka dunya tu?

⁴ Enti kitai deka ngereja peneka Petara, kitai enda tau rinduka “dunya tauka utai dunya.” (Bacha 1 John 2:15, 16.) Sitan, “petara dunya,” bekuasa ba dunya tu. Iya ngena pengarap, perintah dunya, gerempung dagang, sereta media massa kena nesatka orang. (2 Kor. 4:4; 1 Jhn. 5:19) Kitai enggai ditesatka dunya, nya alai kitai patut nyeliahka kaul ti jai. Bup Kudus enggau terang nangkan kitai: ‘Anang nejuka orang nipu kita: “Orang ke jai ngerusak moral ti menyana.”’—1 Kor. 15:33.

5, 6. Kitai enda patut begulai enggau sapa, lalu nama kebuah?

⁵ Kena ngetanka kaul ti manah enggau Jehovah, kitai enda begulai enggau orang ke ngereja utai ti jai. Tu nyengkaum orang ke ngaku diri nyembah Jehovah tang enda ngasika Iya. Enti orang nya ngereja dosa ti besai, sereta enda nesal ati, kitai patut badu begulai enggau sida.—Rom. 16:17, 18.

⁶ Selalu iya, orang deka nyaga ati bala kawan sida sereta diterima sida. Nya alai, enti kitai begulai enggau orang ke enda ngasika Petara, kita engka deka nitihka utai ti dikereja sida. Chunto, enti kitai begulai rapat enggau orang ke ngereja ulah seks ti kamah, kitai engka deka nitihka ulah sida iya. Tu bisi nyadi ba sekeda ari bala menyadi Kristian kitai. Lalu sida ke enda nesal ati dibuai ari gerempung. (1 Kor. 5:11-13) Enti sida enda nesal ati, sida deka nyadi baka utai ti dipadah Peter.—Bacha 2 Peter 2:20-22.

7. Sapa patut nyadi kawan rapat kitai?

⁷ Taja pan kitai deka manah enggau semua orang, tang kitai enda patut nyadi kawan rapat orang ke enda ngasika Petara. Saksi-Saksi Jehovah enda patut dating enggau orang ke enda tetap ati nyembah Jehovah, taja pan orang nya udah dibaptisa. Nitihka peneka Petara patut dikemeratka agi ari diterima orang ke enda rinduka Iya. Kitai semina bekawan rapat enggau sida ke ngereja peneka Petara. Jesus madahka: ‘Barang sapa ngereja peneka Petara, nya meh menyadi lelaki, menyadi indu, enggau indai aku.’—Mrk. 3:35.

8. Baka ni begulai enggau orang ke jai ngenusahka orang Israel menya?

⁸ Begulai enggau orang ke jai ngujungka penusah. Ambika chunto, nama nyadi ba orang Israel. Sebedau sida tama ngagai Menua ti Udah Disemaya, Jehovah nangkan sida pasal orang ke diau dia. Ku Iya: ‘Anang meremi ngagai, tauka nyembah petara nya, lalu anang nitihka jalai pengarap sida. Rusak petara sida, lalu tumbangka tiang batu keramat sida. Enti kita nyembah Aku ti Jehovah, ti Petara kita.’ (P-sut. 23:24, 25) Tang mayuh ari orang Israel enda ngasika pesan Petara, lalu enda tetap ati ngagai Iya. (Mas. 106:35-39) Ketegal tu Jehovah nulak bansa Israel, lalu milih gempuru Kristian nyadika nembiak Iya.—Mat. 23:38; SKR. 2:1-4.

9. Nama kebuah media massa ba dunya tu ulih ngerusakka?

⁹ Mayuh ari media massa ba dunya tu, baka program TV, laman web, sereta bup ulih ngerusakka kaul kitai enggau Jehovah. Semua utai tu ukai digaga kena nulung orang Kristian ngembuan pengarap ba Jehovah sereta semaya Iya. Tang, utai tu meransang orang pechayaka dunya Sitan ti jai. Nya alai, kitai patut bejimat ngambika enda meda, macha, tauka ninga sebarang utai ke ulih ngujungka kitai bisi “pengingin dunya.”—Tit. 2:12.

10. Nama deka nyadi ngagai media massa ba dunya tu?

¹⁰ Enda lama da agi, dunya Sitan enggau media massa ke ulih ngerusak deka dipunaska. Bup Kudus madahka: ‘Dunya enggau pengingin iya deka lenyau, tang orang ke ngereja peneka Petara deka idup belama iya.’ (1 Jhn. 2:17) Pia mega, pemasmur belagu: “Orang ke jai deka diburu.” Ku iya agi: “Tang orang ke baruh ati deka bempu menua tu lalu diau lantang ngena pengaya sida.” Berapa lama? “Orang ke lurus deka bempu menua tu lalu diau ditu belama iya.”—Mas. 37:9, 11, 29.

11. Baka ni Petara nulung kitai meruan tetap ati ngagai Iya?

¹¹ Enda baka dunya Sitan, gerempung Jehovah nulung kitai nuju ngagai pengidup belama iya. Jesus besampi ngagai Jehovah: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (Jhn. 17:3) Jehovah ngena gerempung Iya nyediaka semua utai ke diguna kitai kena ngelala Iya. Chunto, kitai bisi mayuh majalah, brosur, bup, video sereta laman Web kena nulung kitai terus nyembah Jehovah. Gerempung Iya mega ngatur gempuru enggau tetap ba lebih ari 110,000 iti gempuru di serata dunya. Utai ti dipelajarka kitai ari Bup Kudus ba gempuru sereta gempuru besai neguhka pengarap kitai ngagai Jehovah enggau semaya Iya.—Heb. 10:24, 25.

12. Terangka pesan Bup Kudus pasal semina kawin enggau ‘nembiak Tuan.’

¹² Orang Kristian ke deka kawin patut bejimat pasal orang ke enggau sida begulai. Jaku Petara nangkan kitai: “Anang besulu enggau orang ke enda arap. Laban baka ni ku pengelurus ulih begulai enggau penyai? Tauka baka ni ku penampak ulih bekaul enggau pemetang?” (2 Kor. 6:14) Bup Kudus ngasuh nembiak Petara semina kawin enggau ‘nembiak Tuan,’ iya nya semina kawin enggau orang ke udah nyerahka diri, dibaptisa sereta nitihka ukum Jehovah. (1 Kor. 7:39) Enti nuan kawin enggau orang ke rinduka Jehovah, nuan deka bisi kaling pengidup ke ulih nulung nuan meruan tetap ati ngagai Petara.

13. Nama pesan pasal kawin ti diberi Petara ngagai orang Israel?

¹³ Jehovah nemu utai ti pemadu manah ke kitai, lalu pesan Iya ke ngasuh semina kawin enggau ‘nembiak Tuan’ ukai utai ti baru. Chunto, peratika nama dipadah Jehovah ngagai orang Israel pasal orang ke enda nyembah Iya. Iya bepesan ngena Moses: ‘Kita enda tau jadi enggau sida, lalu enda tau nejuka anak kita jadi enggau sida, laban sida deka mai anak kita limpang ari Aku, besembahka petara bukai. Jehovah deka ringat ngagai kita, lalu Iya deka tekala nya munuh kita.’—U-dat. 7:3, 4.

14, 15. Nama penyadi ngagai Solomon ketegal iya enggai ningaka pesan Jehovah?

¹⁴ Enda lama pengudah Solomon nyadi raja bansa Israel, iya besampi minta pene mu-dalam, lalu Jehovah nyaut sampi iya. Nya alai, Solomon tebilang ketegal nyadi pemerintah ti pintar ke bansa ti mujur. Iya ke amat, kuin menua Sheba balat alit ati enggau penemu-dalam ke dikembuan Solomon nyentukka iya nyebut ngagai Solomon: “Penemu-dalam ti dikembuan nuan enggau pengaya nuan jauh besai agi ari utai ti udah dipadahka orang ngagai aku.” (1 Raj. 10:7) Tang, chunto Solomon mega ngajar kitai pasal nama deka nyadi enti orang enggai ningaka pesan Petara, lalu kawin enggau orang ke enda nyembah Jehovah.—P-jar. 4:13.

¹⁵ Taja pan Jehovah udah merekatka Solomon, iya enda ngasika pesan Petara ti udah dipadah enggau terang. Solomon “rinduka mayuh indu orang bansa bukai” ke enda nyembah Jehovah, lalu ngujungka iya bisi 700 iku bini enggau 300 iku indu simpan. Nama penyadi? Lebuh Solomon udah tuai, bala bini iya ‘nguluka iya besembahka petara orang bansa bukai, . . . iya bedosa ngelaban Jehovah.’ (1 Raj. 11:1-6) Begulai enggau orang ke jai ngenusahka iya, lalu iya enda tetap ati ngagai Jehovah. Enti utai tu ulih nyadi ba Solomon, iya mega ulih nyadi ba sapa-sapa. Nya kebuah kitai anang berunding deka kawin enggau orang ke enda rinduka Jehovah!

16. Nama jaku lalau ke diberi Bup Kudus ngagai orang ke udah kawin enggau orang ke enda sama pengarap?

¹⁶ Kati enti orang nya nyadi penyembah Jehovah pengudah iya kawin enggau orang ke enda sama pengarap? Ku Bup Kudus: ‘Kita ke bini: nunduk ngagai laki kita, ngambika enti sida enda ngasika jaku Petara, sekeda sida ulih dibai arap ketegal ulah kita, ukai ketegal jaku kita.’ (1 Pet. 3:1) Tu  mega ulih dikena ba laki enti bini iya enda nyembah Jehovah. Jaku Petara chukup terang: Nyadi laki tauka bini ke manah, lalu nitihka ukum Petara pasal adat melaki-bini. Lebuh kaling pengidup nuan meda nuan udah berubah manah agi, iya mega engka deka nyembah Jehovah. Tu utai ke udah nyadi ba mayuh laki bini.

17, 18. Nama nulung Noah selamat ari Bah Besai, lalu nama nulung orang Kristian ba kurun keterubah selamat lebuh Jerusalem dirusakka?

¹⁷ Begulai enggau orang ke jai ulih ngasuh kitai enda ngasika Jehovah, tang begulai enggau orang ke manah ulih nulung kitai tetap ati ngagai Iya. Noah nya teladan ti manah ke kitai. Iya idup ba maya “penyai semua orang di dunya tu, enggau runding sida ke seruran jai.” (P-kal. 6:5) Orang balat jai nyentukka Jehovah berunding deka ngemunaska sida. Tang Noah bebida. Bup Kudus ngumbai “semina iya siku aja ke lurus” ke ‘begulai sejalai enggau Petara.’—P-kal. 6:7-9.

¹⁸ Noah enda begulai enggau orang ke enda rinduka Jehovah. Iya enggau sida sebilik tetap kisuk ngaga bandung, lalu iya mega “ngajar pasal pengelurus.” (2 Pet. 2:5) Noah, bini iya, tiga iku anak lelaki iya enggau bini sida, bisi kaul ti manah enggau pangan diri. Sida tetap kisuk ngereja utai ti ngerinduka ati Petara, lalu asil iya, sida selamat ari Bah Besai. Semua kitai kemaya hari tu peturun sida, nya alai kitai patut beterima kasih ngagai Noah enggau sida sebilik ke udah ngasika Jehovah sereta nyeliahka kaul ti jai. Pia mega, orang Kristian ba kurun keterubah enda begulai enggau orang ke enda rinduka Jehovah. Sida ngasika Iya, lalu selamat lebuh Jerusalem dirusakka ba 70 M.—Luk. 21:20-22.

19. Nama deka nulung kitai mengkang tetap ati ngagai Jehovah?

¹⁹ Baka Noah enggau sida sebilik sereta orang Kristian ba kurun keterubah, kitai enda begulai enggau sapa-sapa ke enda rinduka Jehovah. Kitai bisi bejuta iku bala menyadi Kristian ke tetap ati ke ulih nyadi kawan kitai. Sida deka nulung kitai “bediri tegap dalam pengarap” ba maya ti balat tusah tu. (1 Kor. 16:13; J-lam. 13:20) Uji pikirka pemanah ulih selamat ari pengujung dunya ti jai tu, lalu idup ba dunya baru Jehovah! Nya alai, kitai patut nyeliahka kaul ti jai diatu!