1, 2. (a) Nama dianti nuan ba Paradais? (Peda gambar ba pun pelajar.) (b) Nama utai ti pemadu ngagaka ati kitai ba dunya baru?

KITAI amat nganti “pengidup ti meruan belama iya.” Rasul Paul ngambarka nya “pengidup ti bendar.” (Bacha 1 Timoti 6:12, 19.) Ke mayuh agi, orang deka idup belama iya ba Paradais di dunya. Tusah deka ngambarka maya kitai dani ninting pagi, kitai ngasaika diri gerai, lantang ati sereta puas ati. (Isa. 35:5, 6) Pikirka pengaga ati lebuh kitai ulih begulai enggau diri sebilik sereta bala kawan, nyengkaum sida ke deka diidupka baru. (Jhn. 5:28, 29; SKR. 24:15) Nuan deka bisi awak belajarka penemu baru, lalu landik agi ngereja utai ti dikerinduka nuan. Chunto, nuan ulih belajar mayuh agi pasal sains. Nuan mega ulih belajarka chara main perengka musik tauka chara ngaga pelan rumah nuan empu.

² Taja pan kitai nganti semua utai manah tu, tang utai ti pemadu ngagaka ati kitai iya nya sembah ngagai Jehovah. Uji gambarka gaya pengidup lebuh semua orang nguduska nama Jehovah sereta nerima Jehovah nyadika Pemerintah. (Mat. 6:9, 10) Kitai deka gagit ati meda dunya penuh enggau orang ke sempurna, baka  ke dikedekaka Petara. Lalu pikirka lebuh kitai senang agi ngenalamka kaul kitai enggau Jehovah seraya kitai belubah-lubah nyadi sempurna!—Mas. 73:28; Jas. 4:8.

3. Nama patut digaga kitai diatu?

³ Kitai pechaya Jehovah deka ngereja semua utai ti amat manah tu, laban ‘ba Petara semua utai ulih magang.’ (Mat. 19:25, 26) Enti kitai deka idup belama iya ba dunya baru, diatu meh maya kitai “tau bulih” pengidup ti meruan belama iya. Kitai nemu pengujung nyau semak, nya alai kitai patut idup enggau chara ti nunjukka kitai pechaya pengujung deka datai ba sebarang maya. Kitai patut ngereja semua utai ke ulih digaga kitai diatu kena nyediaka diri ke pengidup ba dunya baru. Aram kitai beratika chara iya.

4. Baka ni kitai diatu nyediaka diri enggau pengidup ba dunya baru? Beri siti chunto.

⁴ Baka ni kitai diatu nyediaka diri enggau pengidup ba dunya baru? Enti kitai berunding deka mindah, lalu diau ba menua bukai, kitai engka ngaga sekeda utai kena nyediaka diri enggau pengidup ba menua nya. Chunto, kitai engka berengkah belajarka bansa jaku sereta adat orang ke diau dia. Kitai engka nguji makai sekeda pemakai sida. Pia mega, kitai diatu ulih nyediaka diri enggau pengidup ba dunya baru, enti kitai enggau naka ulih idup sejalai enggau chara pengidup ba dunya baru. Aram kitai beratika sekeda chara kitai ulih ngereja iya.

5, 6. Nama kebuah belajar ngasika iring ari gerempung Jehovah nulung kitai nyediaka diri enggau pengidup ba dunya baru?

⁵ Ba dunya kemaya hari tu, Sitan deka orang berunding sida ulih ngereja sebarang utai ti dikedekaka sida. Mayuh orang ngumbai sida patut bibas, lalu enda ibuh ngasika Petara. Nama nyadi ketegal tu? Mayuh pemerinsa sereta nadai pengelantang. (Jer. 10:23) Tang, Jehovah nya Pemerintah ti bisi pengerindu. Naka meh pemanah pengidup ba dunya baru lebuh semua orang ngasika Iya!

⁶ Ba dunya baru, kitai deka gaga ati nitihka iring ari gerempung Jehovah kena ngaga dunya tu nyadi paradais ti ngerinduka ati, lalu ngajar orang ke udah diangkatka idup baru. Jehovah deka meri mayuh pengawa ke kitai. Tang, kati enti orang ke ngiring ngasuh kitai ngereja utai ke enda entu dikedekaka kitai? Deka kitai nitih? Kati kitai enggau naka ulih nembuka sereta rindu ati ngereja pengawa ke diberi ngagai kitai? Kena nyedia ka diri idup belama iya ba dunya baru, kitai patut ngasika iring ari gerempung Jehovah diatu.

7, 8. (a) Nama kebuah kitai patut bekerejasama enggau orang ke ngiring? (b) Nama sekeda ubah ke diterima bala menyadi Kristian? (c) Nama utai ti ulih dipechaya kitai ba dunya baru?

⁷ Enti kitai deka besedia enggau pengidup ba dunya baru, kitai patut belajar puas ati sereta bekerejasama enggau gerempung Jehovah sereta enggau pangan diri. Chunto, enti kitai diberi pengawa ke baru, kitai deka bekerejasama, lalu naka ulih ngereja iya enggau ati ti gaga sereta puas. Enti kitai belajar bekerejasama enggau orang ke ngiring diatu, kitai mega deka ngereja nya ba dunya baru. (Bacha Hebrew 13:17.) Lebuh orang Israel tama ngagai Menua ti Udah Disemaya, endur sida diau udah diatur. (P-pau. 26:52-56; Jos. 14:1, 2) Kitai enda nemu dini endur tiap iku kitai deka diau ba dunya baru. Tang enti kitai udah belajar bekerejasama, kitai deka gaga ati ngereja peneka Jehovah enda ngira dini endur kitai diau.

⁸ Uji gambarka peluang manah bekereja ba dunya baru ke dipegai Perintah Petara! Enggau tu, kitai deka gaga ati bekerejasama enggau gerempung Jehovah diatu sereta ngereja semua pengawa ke udah diberi ngagai kitai. Kekadang, pengawa kitai engka berubah. Chunto, sekeda bala menyadi Kristian ba Betel Amerika Serikat udah diasuh bejalaika pengawa nginjil. Lalu ketegal udah tuai tauka penanggul bukai, sekeda tuai ti ngabas udah diasuh nyadi pengerintis istimewa. Sida gaga ati nerima pengawa baru, lalu Jehovah merekatka sida. Enti kitai besampi minta tulung ari Jehovah, enggau naka ulih nyembah Iya, lalu belajar puas ati enggau sebarang pengawa ke udah diberi ngagai kitai, kitai deka gaga ati, lalu Jehovah deka merekatka kitai. (Bacha Jaku Dalam 10:22.) Enti sema ba dunya baru, kitai deka diau ba siti-siti endur tang gerempung Jehovah ngasuh kitai mindah ngagai endur bukai, nama patut digaga kitai? Maya nya, kitai enda milih dini endur kitai diau. Kitai mega deka nerima sebarang pengawa. Kitai deka beterima kasih laban ulih idup ba dunya baru.—Neh. 8:10.

9, 10. (a) Nama kebuah kitai patut sabar ba dunya baru? (b) Baka ni kitai ulih nunjukka diri sabar diatu?

⁹ Ba dunya baru, kekadang kitai engka patut sabar. Chunto, kitai engka ninga sekeda orang balat gaga ati laban kaban belayan sereta bala kawan sida udah diangkatka idup baru. Tang, kitai engka agi nganti orang ke  dikesayauka kitai diangkatka idup baru. Enti pia, kati kitai deka gaga ati enggau orang bukai sereta terus sabar? (Rom. 12:15) Enti kitai belajar sabar nganti Jehovah ngamatka semaya Iya diatu, tu mega ulih nulung kitai sabar maya nya.—P-jar. 7:8.

¹⁰ Kitai mega ulih nyediaka diri enggau pengidup ba dunya baru, enti kitai sabar lebuh nerima penemu baru pasal pemendar ari Bup Kudus. Kati kitai belajarka penemu baru tu? Kati kitai sabar enti kitai enda entu nemu reti iya? Enti baka nya, ba dunya baru kitai deka senang agi sabar tiap kali Jehovah madahka utai baru.—J-lam. 4:18; Jhn. 16:12.

11. Nama kebuah kitai patut belajar ngampunka orang bukai diatu, lalu baka ni tu ulih nulung kitai ba dunya baru?

¹¹ Siti da agi chara kitai ulih nyediaka diri enggau pengidup ba dunya baru iya nya belajar ngampunka orang bukai. Lebuh Kristus Merintah Seribu Taun, tiap iku kitai deka begunaka awak nyadi sempurna. (SKR. 24:15) Kati kitai deka bisi pengerindu sereta ngampunka pangan diri? Enti kitai belajar ngampunka orang bukai sereta bisi kaul ti manah enggau sida diatu, ba dunya baru kitai engka senang agi ngereja nya.—Bacha Kolosi 3:12-14.

12. Nama kebuah kitai diatu patut nyediaka diri enggau pengidup ba dunya baru?

¹² Ba dunya baru, kitai engka enda selalu bulih utai ti dikedekaka kitai, tauka kitai engka patut nganti utai nya. Kitai patut beterima kasih sereta puas ati enggau utai ti dikemisi kitai. Iya ke amat, kitai patut ngembuan pemanah ti sama enggau pemanah ke diajar Jehovah ngagai kitai diatu. Nya alai, enggau belajar ngayanka pemanah nya diatu, kitai nunjukka dunya baru nya nyata ba kitai, lalu kitai nyediaka diri enggau pengidup belama iya. (Heb. 2:5; 11:1) Pia mega, kitai ngayanka diri keran deka diau ba dunya ke alai semua orang ngasika Jehovah.

13. Nama deka dikenuluka kitai ba pengidup di dunya baru?

¹³ Ba dunya baru, kitai deka bisi semua utai ke diguna kena idup lantang. Tang, utai ti pemadu ngelantangka ati kitai iya nya kaul ti rapat enggau Jehovah. (Mat. 5:3) Kitai deka kisuk enggau pengawa ke Jehovah, lalu kitai deka gaga ati nyembah Iya. (Mas. 37:4) Nya alai, enti kitai ngenuluka Jehovah ba pengidup kitai diatu, kitai nyediaka diri enggau pengidup ba dunya baru.—Bacha Matthew 6:19-21.

14. Nama juluk ati ti ulih ditetapka orang ke biak pasal bekereja ke Jehovah aja?

¹⁴ Baka ni kitai ulih nambahka pengaga ati nyembah Jehovah? Siti ari chara iya, enggau netapka juluk ati. Enti nuan orang ke biak, pikirka enggau manah pasal chara nuan ulih ngena pengidup nuan nyembah Jehovah. Nama kebuah enda ngiga pansik ari litaricha kitai pasal bemacham pengawa bekereja ke Jehovah aja? Nuan ulih netapka siti ari pengawa tu nyadika juluk ati. * (Peda nota kaki.) Tanya sekeda ari sida ke udah betaun bekereja ke Jehovah aja. Enti nuan ngena pengidup nuan nyembah Jehovah, nuan deka nerima latih ti beguna. Peneleba tu deka nulung nuan nyembah Jehovah ba dunya baru.

15. Nama agi juluk ati ti ulih ditetapka kitai ba pengawa ke Jehovah?

¹⁵ Mayuh juluk ati ti ulih ditetapka kitai ba pengawa ke Jehovah. Chunto, kitai ulih netapka juluk ati kena belajarka pengelandik ti baru ba pengawa nginjil. Tauka kitai ulih belajarka prinsip Bup Kudus enggau manah agi, lalu belajarka chara ngena prinsip nya ba pengidup kitai. Kitai mega ulih ngemanahka agi chara kitai macha tauka meri cheramah ba mua mayuh sereta meri saut ba gempuru.  Tuju iya: Enti nuan netapka juluk ati ba pengawa ke Jehovah, tu nulung nuan ransing agi sereta nyediaka diri enggau pengidup ba dunya baru.

16. Nama kebuah nyembah Jehovah nya chara pengidup ti pemadu manah?

¹⁶ Kati pengidup kitai kemaya hari tu bisi pengurang, enti kitai ngena awak nyediaka diri ngagai dunya baru Petara? Nadai! Nyembah Jehovah nya chara pengidup ti pemadu manah. Kitai ukai nyembah Iya ketegal diansak orang bukai tauka semina ketegal deka selamat maya penusah ti besai. Enti kitai bisi kaul ti manah enggau Jehovah, pengidup kitai deka manah agi sereta ngelantangka ati. Tu meh pengidup ke diberi Iya ke kitai. Bulih pengerindu sereta nerima iring ari Petara ba pengidup kitai manah agi ari utai bukai. (Bacha Masmur 63:1-3.) Semua kitai ulih ngasaika pengelantang ba ati ke datai ari sembah pengabis ati ngagai Jehovah. Sekeda orang ke udah betaun nyembah Iya madahka, tu meh chara pengidup ti pemadu manah.—Mas. 1:1-3; Isa. 58:13, 14.

17. Naka ni kitai patut ngemeratka main tauka ngereja utai ti dikerinduka kitai ba Paradais?

¹⁷ Ba Paradais, kitai deka gaga ati ngena awak ba main sereta ngereja utai ti dikerinduka kitai. Agi mega, Jehovah ngaga kitai ngambika kitai bisi pengingin deka ngelantangka ati, lalu Iya besemaya deka “meri sida chukup utai datai ke semua utai ti idup nadai suntuk utai.” (Mas. 145:16; P-jar. 2:24) Kitai patut main sereta belelak, tang kitai rindu agi ngereja pengawa tu enti kitai ngenuluka kaul enggau Jehovah. Pia mega, maya ba dunya baru. Nya alai, endang manah enti ‘giga dulu Perintah Petara,’ lalu beratika berekat ke diterima kitai ba sembah ngagai Jehovah.—Mat. 6:33.

18. Baka ni kitai nunjukka diri besedia enggau pengidup belama iya ba Paradais?

¹⁸ Ba dunya baru, pengidup deka manah agi ari ke ulih digambarka kitai. Aram meh kitai ngayanka pengeran kitai deka diau ba dunya baru enggau nyediaka diri ke “pengidup ti bendar” diatu. Aram meh kitai ngemansangka pemanah ke diajar Jehovah ke kitai, sereta ransing ati ngerembaika berita manah. Arapka kitai ngasaika pengelantang ati ketegal ngenuluka sembah ngagai Jehovah ba pengidup kitai. Ba dunya baru, kitai arap enggau pengabis ati, Jehovah deka ngamatka semua utai ti udah disemayaka Iya. Nya alai, aram meh kitai idup sejalai enggau chara pengidup ba dunya baru!