1, 2. Sapa meri kitai pengasai ati, lalu nama kebuah kitai beterima kasih ketegal bisi pengasai ati?

PETARA JEHOVAH ngaga mensia ngambika bisi peluang bibas milih. Kena nulung kitai milih enggau betul, Jehovah meri kitai pengiring. Pengiring tu dikumbai pengasai ati, lalu tu pengasai ke bekaul enggau utai ti betul sereta utai ti salah ba ati kitai. Pengasai ati ke dikena enggau chara ti betul ulih nulung kitai ngereja utai ti manah sereta nyeliahka utai ti jai. Pengasai ati kitai nunjukka Jehovah rinduka kitai sereta deka kitai mujur.

² Sekeda orang kemaya hari tu ngereja utai ti manah sereta begedika utai ti jai taja pan sida enda nemu standard ari Bup Kudus. (Bacha Rome 2:14, 15.) Nama kebuah? Tu ketegal sida bisi pengasai ati. Pengasai ati tu nagang mayuh orang ari ngereja penyai. Uji gambarka penyai dunya tu enti orang nadai pengasai ati! Penyai tentu balat agi ari ke udah. Kitai beterima kasih ngagai Jehovah ke udah meri mensia pengasai ati!

3. Baka ni pengasai ati ulih nulung kitai ba gempuru?

³ Mayuh orang enggai ngelatih pengasai ati sida. Taja pia, nembiak Jehovah dekaka pengasai ati sida ulih dikearapka ngiring laban nya ulih ngemansangka penyerakup ba gempuru. Kitai deka pengasai ati ngingatka kitai pasal standard Bup Kudus senentang  utai ti betul enggau salah, manah enggau jai. Taja pia, kena ngelatih sereta ngena pengasai ati kitai, kitai ukai semina belajarka utai ti dipadah ba Bup Kudus. Kitai mega rinduka standard Petara sereta arapka utai nya pulaika pemanah kitai. Paul nulis: “Tuju ke meri pesan ti baka nya, iya nya pengerindu, ti datai ari ati ti tuchi, ari ati ti beresi, enggau ari pengarap ti bendar.” (1 Tim. 1:5) Lebuh kitai ngelatih pengasai ati kitai sereta nitihka iya, pengerindu kitai ngagai Jehovah sereta pengarap kitai ba Iya deka nambah. Chara kitai ngena pengasai ati nunjukka naka ni pengerapat kaul kitai enggau Jehovah, lalu nunjukka naka ni kitai deka ngerinduka ati Iya. Pengasai ati kitai ngayanka sapa kitai ke bendar.

4. Baka ni kitai ulih ngelatih pengasai ati kitai?

⁴ Tang baka ni kitai ulih ngelatih pengasai ati kitai? Kitai patut belajarka Bup Kudus enggau tetap, berundingka enggau dalam utai ke dibacha, lalu minta Jehovah nulung kitai ngereja utai ti udah dipelajarka. Reti nya, kitai ukai semina belajarka penemu enggau ukum. Lebuh kitai belajarka Bup Kudus, juluk ati kitai iya nya deka ngelala Jehovah enggau manah agi. Kitai deka ngelala sapa Jehovah nya, utai ti dikerinduka Iya, sereta utai ti dipegedika Iya. Seraya kitai belajar mayuh agi pasal Jehovah, pengasai ati kitai deka jampat nemu utai ti betul enggau salah ba mata Iya. Enti kitai suah agi ngelatih pengasai ati kitai, kitai deka nemu agi berunding baka Jehovah.

5. Nama deka dikerandauka kitai ba artikel tu?

⁵ Taja pia, kitai engka nanya: Baka ni pengasai ati ke udah dilatih enggau manah ulih nulung kitai maya ngaga pemutus? Baka ni kitai ulih bebasaka pengasai ati bala menyadi Kristian? Lalu baka ni pengasai ati ulih meransang kitai ngereja utai ti manah? Aram kitai beratika tiga pekara ke ngasuh kitai patut ngena pengasai ati ke udah dilatih: (1) ngintu pengerai, (2) main, enggau (3) pengawa nginjil kitai.

6. Nama pemutus ke digaga kitai pasal ngintu pengerai?

⁶ Bup Kudus ngasuh kitai nyeliahka utai ti tau ngemediska kitai, tang nulung kitai nagang diri ba sekeda pengawa, baka makai enggau ngirup. (J-lam. 23:20; 2 Kor. 7:1) Enti kitai ngasika jaku lalau ari Bup Kudus, tu ulih nulung kitai nyaga pengerai. Tang diatu kitai agi sakit sereta mansang tuai. Nama pemutus ke engka patut digaga kitai? Ba sekeda menua, bisi bansa ubat ke biasa diempa tauka ubat ke ulih dipilih. Pampang opis suah nerima surat ari bala menyadi Kristian ke nanya pasal mayuh bengkah chara berubat. Mayuh ari sida nanya: “Ulih nembiak Jehovah nerima chara berubat tu?”

7. Baka ni kitai ulih ngaga pemutus pasal darah?

⁷ Pampang opis tauka tuai gempuru nadai kuasa ngaga pemutus pasal chara berubat ke orang Kristian, taja pan orang engka nanya sida nama utai ke patut digaga. (Gal. 6:5) Taja pia, tuai gempuru ulih bekunsi nama utai ke dipadah Jehovah kena nulung orang Kristian ngaga pemutus ti betul. Chunto, Petara udah ngasuh kitai nyeliahka diri ari darah. (SKR. 15:29) Pesan tu enggau terang nulung orang Kristian nemu sida enda ulih nerima chara berubat ke bekaul enggau empat bengkah bansa darah. Penerang tu ulih ngachau pengasai ati orang Kristian sekalika iya deka nerima begian darah ke mit ari empat bengkah bansa darah. * (Peda nota kaki.) Nama jaku lalau Bup Kudus ke bukai  ke ulih nulung kitai ngaga pemutus pasal chara berubat?

8. Baka ni Pilipi 4:5 ulih nulung kitai ngaga pemutus ti betul pasal ngintu pengerai?

⁸ Jaku Dalam 14:15 madahka: “Orang ke beli deka arapka sebarang utai, tang orang ke pintar deka nyingkang enggau bejimat.” Kemaya hari tu, bisi sekeda penyakit bedau ditemu chara kena ngubat. Nyadi, kitai patut bejimat pasal chara berubat ke dikumbai ulih ngeraika siti-siti penyakit, tang bedau ditentuka mujur. Paul nulis: “Awakka semua orang nemu kita nemu berunding.” (Plp. 4:5, NW) Ulah ke nemu berunding deka nulung kitai mengkang beberatka sembah ngagai Jehovah, ukai beberatka chara ngintu pengerai. Enti pengawa ngintu pengerai nyadi utai ti pemadu dikemeratka ba pengidup kitai, kitai engka berundingka diri empu. (Plp. 2:4) Kitai nemu kitai enda ulih ngembuan pengerai ti sempurna diatu. Nya alai, tentuka sembah ngagai Jehovah nya utai ti pemadu dikemeratka ba pengidup kitai.—Bacha Pilipi 1:10.

9. Baka ni Rome 14:13, 19 nulung kitai ngaga pemutus pasal ngintu pengerai, lalu baka ni penyerakup kitai engka ulih dirusakka?

⁹ Orang Kristian ke nemu berunding enda ngansak orang bukai ngereja utai ke dikumbai iya pemadu manah. Ba siti menua, dua iku melaki-bini ngansak orang bukai nyaga pemakai sereta makai ubat vitamin. Sekeda menyadi Kristian deka nitihka utai ku seduai iya, tang bisi mega enggai. Lebuh chara pemakai enggau ubat vitamin nya nadai nunjukka asil, mayuh bala menyadi Kristian enda puas ati. Seduai iya empu ulih nguji chara nyaga pemakai sereta makai ubat vitamin nya, tang anang ngansak orang bukai. Kati patut penyerakup ba gempuru rusak ketegal chara ngintu pengerai? Maya jeman Rome menya, sekeda orang Kristian bisi runding ti enda sebaka pasal sekeda pemakai enggau pengerami. Nama jaku lalau ke diberi Paul ke sida? Ku iya: “Sekeda orang ngumbai hari siti besai agi ari hari ti bukai, lalu orang bukai ngumbai semua hari sebaka magang. Genap iku kitai patut mutuska penemu pasal nya ke diri empu.” Aram meh kitai bejimat ngambika enda ngasuh orang bukai enda nyamai ati.—Bacha Rome 14:5, 13, 15, 19, 20.

10. Nama kebuah kitai patut bebasaka pemutus orang bukai? (Peda gambar ba pun artikel.)

¹⁰ Kekadang, kitai engka enda nemu kebuah sekeda orang ba gempuru ngaga siti-siti pemutus ke bekaul enggau diri empu. Nama patut digaga kitai? Kitai enda patut jampat ngakim tauka ngansak iya ngubah chara iya berunding. Iya engka patut bebendar agi ngelatih pengasai ati iya, tauka ngaga pemutus nitihka prinsip ukai kelalu nitihka ukum. (1 Kor. 8:11, 12) Tauka engka pengasai ati kitai empu agi enda chukup latih. Lebuh ngaga pemutus pasal ngintu pengerai tauka utai bukai, tiap iku kitai patut ngaga pemutus kediri empu sereta sanggup betanggungjawap.

11, 12. Baka ni Bup Kudus nulung kitai milih main?

¹¹ Jehovah ngaga kitai ngambika ulih ngelantangka diri ba main sereta bulih penguntung ari nya. Solomon nulis bisi “maya gaga” enggau “maya betanda.” (P-jar. 3:4.) Taja pia, ukai semua main meri penguntung tauka muai pengelelak. Kitai mega enda patut ngena kelalu mayuh jam ba main. Baka ni pengasai ati ulih nulung kitai bulih penguntung sereta ngelantangka diri ari main ke dikemendarka Jehovah?

¹² Bup Kudus ngasuh nyeliahka “utai ti dikereja mensia.” Utai tu nyengkaum “bambai, runding ti kamah, kereja ti kamah, besembahka engkeramba, bemanang, bemunsuh, charut enggau pangan diri, kepapas, belaya, bepechah-belah, beripih, ngining orang, pemabuk, berami enda beiga-iga, enggau utai ti baka nya.” Paul nulis, ‘orang ke ngereja utai nya enda ulih bempu Perintah Petara.’ (Gal. 5:19-21) Nyadi kitai patut nanya diri empu: ‘Kati pengasai ati aku nulung aku nyeliahka sukan ti kasar, ti bepekit, temegahka menua tauka ngemediska orang bukai? Kati pengasai ati aku nangkan aku lebuh aku bisi pengingin deka meda cherita ti ngayanka ulah ti kamah tauka meransang ngereja ulah ti kamah, pemabuk tauka pengawa bemanang?’

13. Baka ni jaku lalau ba 1 Timoti 4:8 enggau Jaku Dalam 13:20 ulih nulung kitai lebuh milih main?

¹³ Prinsip Bup Kudus ulih nulung kitai ngelatih pengasai ati pasal main. Chunto, Bup Kudus madahka “matihka tubuh beguna.” (1 Tim. 4:8) Mayuh orang ngasaika besenam enggau tetap ulih muai pengelelak sereta manah ke pengerai sida. Tang, baka ni enti kitai deka besenam enggau siti-siti raban? Kati kitai patut milih orang ke enggau kitai besenam? Jaku Dalam 13:20 madahka kitai: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” Endang amat, kitai sigi begunaka pengasai ati ke udah dilatih ngena Bup Kudus lebuh milih main.

14. Baka ni siti ruang bilik nitihka jaku lalau ba Rome 14:2-4?

¹⁴ Christian enggau Daniela bisi dua iku anak indu ke agi biak. Ku Christian: “Lebuh kami Belajarka Bup Kudus ba Diri Sebilik maya lemai hari, kami berandau pasal main. Kami nemu sekeda chara ngelantangka diri ulih diterima, sekeda nya enda ulih. Sapa ke manah enggau begulai? Seiku ari anak indu kami madahka, maya rehat ba sekula, sekeda nembiak Saksi bisi ulah ke enda manah. Lalu iya ngasaika diri tusah deka nitihka ulah sida. Kami nerangka ngagai iya tiap iku  kitai bisi ngembuan pengasai ati, lalu kitai patut diiring pengasai ati lebuh milih utai ke deka digaga sereta milih orang ke deka enggau begulai.”—Bacha Rome 14:2-4.

15. Baka ni Matthew 6:33 ulih nulung kitai ngatur jam ba main?

¹⁵ Ni penyampau jam ke dikena kitai ba main? Kati kitai ngenuluka pengawa baka gempuru, nginjil, sereta belajarka Bup Kudus ba pengidup kitai, tauka ngenuluka main? Ni ke pemadu beguna ba kitai? Ku Jesus: ‘Tang giga dulu Perintah Petara enggau pengelurus Iya, lalu semua utai nya deka mega diberi ngagai kita.’ (Mat. 6:33) Lebuh mutuska baka ni kitai ngena jam, kati pengasai ati kitai ngingatka kitai pasal jaku lalau Jesus?

16. Baka ni pengasai ati meransang kitai nginjil?

¹⁶ Pengasai ati ke dilatih ukai semina nangkan kitai ari ngereja utai ti salah, tang mega meransang kitai ngereja utai ti manah. Siti ari utai tu iya nya nginjil ari rumah ke rumah sereta nginjil ngagai orang ke ditemu kitai ba dini-dini endur. Nya meh utai ti digaga Paul. Iya nulis: “Aku endang udah diasuh ngereja pengawa nya. Tulah meh aku enti aku enda nusui Berita Manah!” (1 Kor. 9:16) Seraya kitai neladan Paul, kitai deka bisi pengasai ati ti manah, laban kitai nemu diri udah ngereja utai ke ngena. Lalu lebuh kitai nginjil ngagai orang bukai, teladan kitai ulih narit ati sida. Ku Paul: ‘Madahka utai ti bendar enggau terang di mua Petara ngambika genap iku orang, ngena pengasai ati sida siku-siku, nemu kami endang madahka utai ti bendar.’—2 Kor. 4:2.

17. Baka ni seiku menyadi Kristian indu ke agi biak nitihka pengasai ati iya ke dilatih ngena Bup Kudus?

¹⁷ Lebuh Jacqueline beumur 16 taun, iya belajar pasal biologi ba sekula. Taja pia, bala nembiak belajar pasal teori evolusi. “Pengasai ati aku enda ngasuh aku enggau berandauka teori evolusi nya ba kelas. Aku enda setuju enggau teori evolusi nya. Aku mansang ngagai cikgu, lalu nerangka runding diri. Aku enda nyangka cikgu nya deka ninga lalu meri aku peluang bejaku pasal utai ti ditempa.” Jacqueline berasai puas ati laban nemu diri mendingka sereta nitihka pengasai ati iya ke dilatih ngena Bup Kudus. Kati pengasai ati nuan meransang nuan ngereja utai ti ngena?

18. Nama kebuah kitai patut ngembuan pengasai ati ti manah sereta tau dikearapka?

¹⁸ Juluk ati kitai iya nya deka idup nitihka prinsip enggau standard ari Jehovah. Lalu pengasai ati ulih nulung kitai ngereja tu. Enti kitai enggau tetap belajar sereta belematika Jaku Petara, lalu nitihka utai ti udah dipelajarka, kitai ulih ngelatih pengasai ati kitai. Udah nya pengasai ati tu deka nyadi iring ke tau dikearapka kitai ba pengidup!