1, 2. Nama juluk ati ke tiap iku orang Kristian? Beri siti chunto.

NAMA diperatika surirumah lebuh iya milih buah ke agi baru ba makit? Iya ukai ngiga buah ke pemadu besai tauka pemadu murah. Tang iya ngiga buah ke manah bau, agi baru sereta ulih terus diempa. Iya ngiga buah ke udah mansau, iya nya udah chukup tuai.

² Pengudah seiku-seiku orang belajar pasal Jehovah, lalu mutuska diri deka dibaptisa, kaul iya enggau Jehovah deka majak semak. Juluk ati iya, iya nya deka nyadi orang Kristian ke mansang ba pengarap. Pemansang kitai ba pengarap ukai bepanggai ba umur. Tu bepanggai ba pemansang rohani, iya nya bisi kaul ti majak semak agi enggau Jehovah. Rasul Paul dekaka orang Kristian ba Epesus mansang ba pengarap. Iya ngasuh sida beserakup ba pengarap, lalu terus belajar pasal Jesus ngambika “nyadi orang ke besai tuai [mansang ba pengarap] lalu nyadi sebaka enggau Kristus.”—Eps. 4:13.

3. Baka ni nembiak Jehovah kemaya hari tu disamaka enggau gempuru ba Epesus?

³ Gempuru ba Epesus endang udah bisi lebuh Paul nulis surat ngagai sida. Mayuh ari bala menyadi Kristian ke dia udah bepe neleba, sereta mansang ba pengarap. Tang, bisi sekeda ari sida patut neguhka agi kaul sida enggau Jehovah. Baka nya mega kemaya hari tu, mayuh ari bala menyadi Kristan kitai udah lama nyembah Jehovah, lalu udah mansang ba pengarap. Taja pia, sekeda ari menyadi Kristian ba gempuru bedau mansang ba pengarap. Chunto, beribu iku udah dibaptisa ninting taun, nya alai sida patut mansang ba pengarap. Kati baka nuan empu?—Kol. 2:6, 7.

4, 5. Baka ni orang Kristian ke mansang ba pengarap bebida ari pangan diri, tang nama utai ke sebaka ba semua sida? (Peda gambar ba pun pelajar.)

⁴ Lebuh nuan meda buah ke mansau ba makit, nuan nemu buah nya enda sama gamal. Taja pia, bisi utai ke sebaka ba buah nya ke nunjukka iya udah mansau. Sama mega enggau orang Kristian ke mansang ba pengarap. Sida datai ari mayuh bengkah menua enggau chara pengidup. Sida enda sama umur, utai ti dikedeka, enggau utai ti dikenggai. Tang, semua orang Kristian ke mansang ba pengarap bisi kualiti ke sebaka enggau pangan diri ke nunjukka sida mansang ba pengarap. Nama sekeda kualiti tu?

⁵ Orang Kristian ke mansang ba pengarap neladan Jesus, lalu ‘nitihka singkang iya.’ (1 Pet. 2:21) Nitih ku Jesus, endang beguna enti orang rinduka Jehovah enggau pengabis ati, semengat, enggau runding sereta rinduka orang bukai baka rinduka diri empu. (Mat. 22:37-39) Orang Kristian ke mansang ba pengarap enggau naka ulih ngasika jaku lalau nya. Chara pengidup iya nunjukka kaul iya enggau Jehovah sereta penalam pengerindu iya ke orang bukai nya utai ke pemadu beguna ba iya.

6, 7. (a) Nama sekeda kualiti ke nunjukka orang Kristian nya mansang ba pengarap? (b) Nama patut ditanya kitai empu?

⁶ Pengerindu nya siti ari pemayuh kualiti ke diayanka orang Kristian ke mansang ba pengarap. (Gal. 5:22, 23) Iya mega ngayanka penelap, pengeliat ati sereta ulih nagang diri. Kualiti tu nulung iya enda ringat, taja pan bisi penanggul ti berat sereta nulung iya betan ngambika iya enda lenyau pengadang. Lebuh belajarka Bup Kudus kediri empu, orang Kristian ke mansang ba pengarap seruran mansik prinsip Bup Kudus ke nulung iya ngelala utai ti betul enggau utai ti salah. Udah nya, lebuh iya ngena pengasai ati ke udah dilatih ngena Bup Kudus, iya ulih ngaga pemutus ti betul. Orang Kristian ke mansang ba pengarap nya baruh ati, nya alai iya pechaya iring sereta standard ari Jehovah semampai manah agi ari enggi iya. * (Peda nota kaki.) Iya ngerembaika berita manah enggau ransing, lalu enggau naka ulih nulung gempuru mengkang beserakup.

⁷ Enda ngira ni pengelama kitai udah nyembah Jehovah, tiap iku kitai ulih nanya: ‘Kati bisi utai ti patut diubah aku ngambika ulih neladan Jesus enggau manah agi? Baka ni aku ulih ngemansangka diri?’

8. Naka ni Jesus nemu sereta meretika Bup Kudus?

⁸ Jesus Kristus nemu sereta meretika ayat Bup Kudus enggau manah. Indah lebuh iya beumur 12 taun, iya ngena ayat Bup Kudus lebuh iya bejaku enggau bala pengajar ba Rumah Sembiang. ‘Semua orang  ke ninga iya balat alit ati ninga penalam penemu enggau saut iya.’ (Luk. 2:46, 47) Udah nya, lebuh nginjil, iya landik ngena Jaku Petara, lalu bala munsuh enda tesautka iya.—Mat. 22:41-46.

9. (a) Nama jadual belajar ke dikemisi orang Kristian ke mansang ba pengarap? (b) Nama kebuah kitai belajarka Bup Kudus?

⁹ Orang Kristian ke deka mansang ba pengarap nitihka teladan Jesus, lalu enggau naka ulih meretika Bup Kudus. Iya selalu mansik ayat Bup Kudus ngambika bulih penemu ti dalam, laban iya nemu “asi kering nya ke orang ke besai tuai.” (Heb. 5:14) Orang Kristian ke mansang ba pengarap deka ngembuan penemu ti betul ari Bup Kudus. (Eps. 4:13) Nya alai, tanya diri empu: ‘Kati aku macha Bup Kudus ninting hari? Kati aku bisi jadual belajarka Bup Kudus kediri empu? Kati aku bisi belajarka Bup Kudus ba diri sebilik ninting minggu?’ Lebuh nuan belajarka Bup Kudus, giga prinsip ke ulih nulung nuan nemu baka ni runding enggau asai ati Jehovah. Udah nya, kena prinsip tu lebuh nuan ngaga pemutus. Tu deka nulung nuan semak agi ngagai Jehovah.

10. Baka ni asai ati orang Kristian ke mansang ba pengarap pasal jaku lalau sereta prinsip ari Petara?

¹⁰ Orang Kristian ke mansang ba pengarap ukai semina nemu utai ke dipadah ba Bup Kudus. Iya enda tau enda rinduka jaku lalau sereta prinsip ari Petara. Iya ngayanka pengerindu tu enggau keran ngereja peneka Jehovah, ukai peneka iya empu. Indah iya sanggup ngubah chara pengidup, runding sereta ulah iya. Chunto, iya nela dan Jesus lalu nyadi mensia ti baru, iya nya ‘ditempa neladan gamal Petara lalu nyadi amat lurus sereta kudus.’ (Bacha Epesus 4:22-24.) Kingatka, Petara ngena roh kudus Iya ngiring bala penulis Bup Kudus. Nya alai, lebuh orang Kristian belajarka Bup Kudus, roh kudus Petara nulung iya mansang ba penemu, ba pengerindu, sereta ba kaul iya enggau Jehovah.

11. Nama utai diasaika Jesus lebuh iya ba dunya?

¹¹ Jesus nya mensia ti sempurna. Taja pia, lebuh ba dunya, iya dikelingi orang ke enda sempurna. Apai indai enggau bala menyadi iya enda sempurna. Indah bala murid ke pemadu rapat enggau Jesus ngayanka penyumbung sereta berundingka diri empu. Chunto, malam sebedau iya mati, bala murid iya bekelikuhka sapa ari bala sida “ke tau dikumbai pemadu besai.” (Luk. 22:24) Taja pan chara berunding sida enda sempurna, Jesus nemu bala murid iya deka nyadi orang Kristian ke mansang ba pengarap, lalu numbuhka siti gempuru ke beserakup. Ba malam ti sama, Jesus besampi ngambika sida beserakup. Iya minta Apai iya ti di serega nyerakup semua sida. Ku iya: ‘Baka Nuan, Apai, ke dalam aku, lalu aku dalam Nuan.’ Ku iya agi: ‘Ngambika sida nyadi siku, baka tua ke endang siku.’—Jhn. 17:21, 22.

12, 13. (a) Nama juluk ati kitai ke nyadi orang Kristian? (b) Baka ni seiku menyadi Kristian ke lelaki ngemansangka penyerakup?

¹² Orang Kristian ke mansang ba pengarap ngemansangka penyerakup ba gempuru. (Bacha Epesus 4:1-6, 15, 16.) Juluk ati kitai, iya nya “bejantilka semua perengka tubuh,” reti iya beserakup gawa. Ngambika beserakup, orang Kristian enda tau enda baruh ati. Nya alai, taja pan iya ngasaika diri tusah deka begulai enggau orang bukai, tang pengarap iya ke mansang nulung iya enggau naka ulih ngetanka penyerakup ba gempuru. Nyadi, tanya diri empu: ‘Baka ni gaya aku lebuh bala menyadi Kristian ngereja penyalah? Baka ni asai ati aku lebuh orang bukai ngemediska ati aku? Kati aku enggai bejaku enggau orang nya? Tauka aku nguji ngemanahka kaul enggau orang nya?’ Orang Kristian ke mansang ba pengarap nyeliahka penanggul, tang ukai nyadi penanggul ke orang bukai.

¹³ Peratika chunto Uwe. Suba, iya ngelakka pengurang bala menyadi Kristian ngasuh iya tusah ati. Udah nya, iya ngena Bup Kudus enggau Insight on the Scriptures kena belajar pasal pengidup David. Nama kebuah milih David? Laban David mega ngasaika penanggul begulai enggau sekeda ari nembiak Petara. Chunto, Raja Saul deka munuh David, sekeda orang deka nuku iya ngena batu, lalu bini iya empu ngemelika iya. (1 Sam. 19:9-11; 30:1-6; 2 Sam. 6:14-22) Enda ngira nama digaga orang ngagai iya, David mengkang rindu sereta arapka Jehovah. David mega ngayanka penyinu. Uwe nemu iya pan patut baka nya. Ari belajarka Bup Kudus, iya nemu iya patut ngubah asai ati iya pasal pengurang bala menyadi Kristian. Iya patut badu ngingatka penyalah sida, lalu ngemansangka penyerakup ba gempuru. Kati nuan bisi juluk ati ti sama?

14. Baka ni Jesus milih kawan?

¹⁴ Jesus Kristus rindu begulai enggau orang. Lelaki enggau indu, tuai enggau biak, nyentukka anak mit pan rindu begulai enggau Jesus. Tang, iya bejimat milih kawan rapat. Ku iya madahka bala rasul:  “Kita pangan aku enti kita ngasika pesan aku.” (Jhn. 15:14) Jesus milih orang ke tetap ati nitihka iya enggau sida ke rindu sereta nyembah Jehovah nyadika kawan rapat iya. Kati nuan milih kawan ke rinduka Jehovah enggau pengabis ati sida? Nama kebuah tu beguna?

15. Baka ni nembiak bulih penguntung ari begulai enggau orang Kristian ke mansang ba pengarap?

¹⁵ Mayuh buah mansau enggau manah maya hari panas. Baka nya mega, pengerindu bala menyadi Kristian ulih nulung nuan nyadi orang Kristian ke mansang ba pengarap. Kati nuan nya nembiak ke benung berunding pasal nama deka digaga ba pengidup? Enti pia, nuan patut milih kawan ke udah lama nyembah Jehovah sereta sida ke ngemansangka penyerakup ba gempuru. Sida tu engka bisi penanggul ba pengidup, tauka udah betan ngelaban penguji seraya nyembah Jehovah. Lebuh nuan begulai enggau sida, sida ulih nulung nuan milih chara pengidup ti pemadu manah, ngaga pemutus ti betul, sereta mansang ba pengarap.—Bacha Hebrew 5:14.

16. Baka ni menyadi Kristian ke tuai ba gempuru nulung seiku menyadi Kristian ke indu maya iya agi biak?

¹⁶ Helga agi ingat, maya taun ke penudi iya ba sekula, mayuh ari sida sekelas berandau pasal juluk ati sida ke dudi hari ila. Mayuh ari sida deka ngagai universiti ngambika bulih kereja ti manah. Taja pia, Helga berandau enggau bala kawan ke teguh ba pengarap ba gempuru iya. Ku iya: “Mayuh ari sida tuai ari aku, lalu sida mayuh meri tulung ngagai aku. Sida meransang aku bekereja ke Jehovah aja. Ketegal tu, aku ulih nyadi pengerintis pengelama lima taun. Diatu, pengudah betaun, aku gaga ati laban beberatka pengawa ke Jehovah maya aku agi biak. Aku enda kala nesal enggau pemutus tu.”

17, 18. Baka kitai ulih nyembah Jehovah enggau pemadu manah?

¹⁷ Enti kitai neladan Jesus, kitai deka nyadi orang Kristian ke mansang ba pengarap. Kitai deka semak agi ngagai Jehovah, lalu pengeran kitai deka nyembah Iya mega nambah. Kitai ulih nyembah Jehovah enggau pemadu manah enti kitai mansang ba pengarap. Jesus meransang bala murid iya: “Awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti di serega.”—Mat. 5:16.

¹⁸ Kitai udah belajar baka ni orang Kristian ke mansang ba pengarap ulih nyukung gempuru Kristian. Orang Kristian mega ngayanka pemansang sida ba pengarap ari chara sida ngena pengasai ati. Baka ni pengasai ati ulih nulung kitai ngaga pemutus ti betul? Lalu baka ni kitai ulih bebasaka pengasai ati orang bukai? Kitai deka nyaut tanya tu ba artikel pengudah tu.