1, 2. Nama ngasuh mensia enda sebaka enggau jelu?

UNTAK mensia nya ngalitka ati. Chunto, mensia bisi pengelandik belajarka siti-siti bansa jaku. Lalu bansa jaku nulung kitai macha, nulis, bejaku sereta nemu reti utai ti didinga. Tu mega ngasuh kitai ulih besampi sereta belagu muji Jehovah. Semua tu ngasuh kitai enda sebaka enggau jelu. Bala saintis bedau entu nemu baka ni untak kitai ulih ngereja utai ti ngalitka ati tu.

² Pengelandik kitai ke nemu ngena bansa jaku nya siti pemeri ari Jehovah. (Mas. 139:14; Pem. 4:11) Iya mega meri kitai pemeri bukai ke ngasuh kitai enda sebaka enggau jelu. Mensia digaga “neladan gamal Iya Empu.” Kitai ulih bibas milih ke diri empu. Lalu kitai ulih milih bansa jaku ke deka dikena nyembah sereta muji Jehovah.—P-kal. 1:27.

3. Nama udah diberi Jehovah ngambika kitai bepenemu-dalam?

³ Jehovah udah meri kitai Bup Kudus ngambika kitai nemu chara nyembah sereta muji Iya. Semua tauka sebegian ari Bup Kudus udah bisi lebih ari 2,800 iti bansa jaku. Lebuh kitai belematika utai ti dipadahka Bup Kudus, kitai ulih  berengkah berunding baka Jehovah. (Mas. 40:5; 92:5; 139:17) Lalu runding Jehovah ngasuh kitai bepenemu-dalam, sereta ngiring kitai nuju ngagai pengidup belama iya.—Bacha 2 Timoti 3:14-17.

4. Nama reti belemati, lalu nama tanya deka dikerandauka kitai?

⁴ Belemati reti iya beratika siti-siti utai, lalu berundingka utai nya enggau dalam. (Mas. 77:12; J-lam. 24:1, 2) Kitai bulih mayuh agi penguntung lebuh belematika utai ti dipelajar kitai pasal Jehovah enggau Jesus. (Jhn. 17:3) Ba artikel tu kitai deka nyaut tanya: Baka ni kitai ulih macha ngambika pengawa belemati senang agi digaga? Nama utai ke ulih dibelemati kitai? Lalu nama ulih nulung kitai belematika utai ti dibacha enggau tetap sereta rindu ngereja nya?

5, 6. Nama ulih nulung nuan ngingatka sereta meretika agi utai ke dibacha?

⁵ Kala nuan beratika bisi sekeda pengawa baka enseput, bejalai tauka bebasikal, ulih digaga nuan enggau enda berunding lebuh nuan ngereja iya? Tang kekadang, nuan mega engka macha enggau enda berundingka utai nya. Nuan engka berengkah berundingka pasal utai bukai lebuh nuan macha. Nama patut digaga nuan kena nyeliahka iya? Nuan patut beratika utai ti dibacha, lalu berundingka reti iya. Udah nya, lebuh nuan datai ba ujung siti-siti genteran tauka anak tajuk ba litaricha nya, ngetu enda lama, lalu belematika utai ke baru abis dibacha. Pikirka utai ti dipelajar nuan, lalu nentuka nuan amat meretika iya.

⁶ Bala saintis udah nemu, kitai senang agi ngingatka siti-siti utai enti kitai macha iya enggau inggar. Jehovah nemu pasal utai tu. (Bacha Pemansut 24:7.) Macha Bup Kudus enggau inggar mega deka nulung nuan beratika enggau manah agi sereta ngingatka mayuh agi utai.

7. Ni maya ke pemadu manah alai belematika Bup Kudus? (Peda gambar ba pun artikel.)

⁷ Belemati sereta beratika utai ti dipelajarka engka enda senang. Nya kebuah manah agi belematika utai lebuh nuan enda entu lelak sereta ba endur ke sunyi, lebuh nadai mayuh utai ulih ngelimpangka nuan. Pemasmur David belematika utai lebuh iya gali ba peninduk maya malam hari. (Mas. 63:6) Jesus, orang ti sempurna, milih endur ke sunyi alai iya belematika utai sereta besampi.—Luk. 6:12.

8. (a) Nama utai ke ulih dibelematika kitai? (b) Baka ni asai ati Jehovah lebuh kitai berandau pasal Iya ngagai orang bukai?

⁸ Kelimpah ari utai ke dibacha nuan ba Bup Kudus, bisi utai bukai ke patut dibelematika nuan. Chunto, lebuh nuan meda utai manah ke ditempa Jehovah, ngetu enda lama, lalu tanya diri empu: ‘Baka ni utai tu ngajar aku pasal Jehovah?’ Runding ke baka tu ulih meransang nuan beterima kasih ngagai Jehovah dalam sampi. Lalu enti nuan enggau orang bukai, nuan tentu deka bekunsi asai ati enggau sida. (Mas. 104:24; SKR. 14:17) Jehovah berati sereta senang ati lebuh kitai belemati, besampi, sereta berandau pasal Iya enggau pangan diri. Bup Kudus madahka: ‘Di mua Jehovah Empu, semua nama orang ke nangi sereta bebasaka [belematika nama] Jehovah dituliska magang dalam siti bup.’—Mal. 3:16.

9. (a) Paul ngasuh Timoti belematika utai nama? (b) Nama utai ke patut dibelematika kitai lebuh kitai nyediaka diri nurun nginjil?

⁹ Rasul Paul ngasuh Timoti belematika  baka ni jaku, ulah, sereta ajar iya bekaul enggau orang bukai. (Bacha 1 Timoti 4:12-16.) Nuan mega patut belematika pekara tu. Chunto, nuan begunaka awak kena belemati lebuh nuan nyediaka diri ngajar Bup Kudus. Pikirka pelajar nuan, lalu giga tanya tauka sempama ke ulih nulung iya ngaga pemansang. Lebuh nuan nyediaka diri ngena chara tu, pengarap nuan empu deka ditegapka, lalu nuan nyadi pengajar Bup Kudus ke manah sereta ransing agi. Nuan mega deka bulih penguntung enti nuan belemati sebedau nurun nginjil. (Bacha Esra 7:10.) Nuan engka ulih macha siti bab ari bup Kereja Rasul kena nulung nuan ransing agi ba pengawa nginjil. Nuan mega ulih belematika ayat Bup Kudus ke deka dikena nuan sehari nya sereta litaricha ke deka disadung nuan. (2 Tim. 1:6) Pikirka pasal orang ke bisi ba kandang endur nuan nginjil sereta utai ti dikerinduka sida. Lebuh nuan nyediaka diri ngena chara tu, nuan ulih ngena Bup Kudus enggau landik agi maya nginjil ngagai orang bukai.—1 Kor. 2:4.

10. Nama utai manah bukai ke ulih dibelematika kitai?

¹⁰ Nama agi utai bukai ke ulih dibelematika kitai? Enti nuan nulis nota maya ningaka cheramah umum tauka maya gempuru besai, beri awak kena beratika nota nya baru. Lebuh nuan beratika nota nya, tanya diri empu, ‘Nama utai udah dipelajarka aku ari Jaku Petara enggau gerempung Iya?’ Nuan mega ulih belematika penerang ke bisi ba majalah Menara Jaga enggau Awake! ninting bulan, sereta utai baru ke dikeluarka ba gempuru besai. Lebuh nuan macha Yearbook, ngetu enda lama pengudah nuan macha siti-siti pengalaman, berundingka iya, lalu ngelakka  iya masuk ati nuan. Lebuh nuan macha litaricha kitai, nuan ulih ngariska batang pekara tauka nulis nota ba tisi genteran. Tu ulih nulung nuan lebuh nyediaka diri datai ngabas, datai meransang tauka meri cheramah. Keberat agi, lebuh nuan ngetu lalu belematika utai ke dibacha, nuan meri awak ngambika utai ke dibacha masuk ati nuan, sereta meri awak besampi terima kasih ngagai Jehovah ke pemanah utai ti udah dipelajarka nuan.

11. Nama utai ti enda tau enda dibelematika kitai, lalu baka ni tu ulih nulung kitai? (Peda mega nota kaki.)

¹¹ Endang amat, Bup Kudus nya utai ti enda tau enda dibelematika kitai. Tang baka ni enti sema nuan enda diasuh ngembuan Bup Kudus dudi hari ila? * (Peda nota kaki.) Nadai orang ulih nagang nuan ari belematika utai ti udah dikingatka nuan, baka ayat ti dikerinduka nuan tauka lagu puji ngagai Jehovah. (SKR. 16:25) Lalu roh kudus Petara deka nulung nuan ingatka utai ti udah dipelajarka, ke deka nulung nuan mengkang tetap ati.—Jhn. 14:26.

12. Baka ni nuan ulih ngaga jadual macha Bup Kudus ninting hari?

¹² Baka ni nuan ulih ngaga jadual macha Bup Kudus ninting hari? Chunto, nuan ulih netapka beberapa hari dalam seminggu, kena macha sereta belematika ayat Bup Kudus ke dibacha ba Sekula Kereja Teokratik. Hari ke bukai nuan ulih macha Injil Matthew, Mark, Luke, enggau John sereta belematika utai ke disebut enggau digaga Jesus. (Rom. 10:17; Heb. 12:2; 1 Pet. 2:21) Kitai mega bisi litaricha ke nerangka tusun utai ke nyadi ba pengidup Jesus. Litaricha tu mega nulung nuan bulih mayuh agi penguntung ari macha bup Injil.—Jhn. 14:6.

13, 14. Nama kebuah kitai patut mengkang belematika Jehovah enggau Jesus, lalu tu deka meransang kitai ngereja nama?

¹³ Belematika Jehovah enggau Jesus ulih nulung kitai nyadi orang Kristian ke mansang sereta mengkang tegap ba pengarap. (Heb. 5:14; 6:1) Orang Kristian ke enda entu meri awak berunding pasal Jehovah deka belubah-lubah lenyau kaul enggau Jehovah, tauka ngujungka iya nulak Jehovah. (Heb. 2:1; 3:12) Jesus nangkan enti kitai enda ninga, tauka nerima Jaku Petara enggau “ati ti manah,” kitai enggai “ngasi” ke jaku Iya. Tu ngasuh kitai senang “alah laban pengirau, pengaya, enggau pengelantang dunya.”—Luk. 8:14, 15.

¹⁴ Nya alai, aram meh kitai mengkang belematika Bup Kudus, lalu ngelala Jehovah enggau manah agi. Tu deka meransang kitai neladan kualiti sereta pemanah Iya enggau mayuh agi. (2 Kor. 3:18) Kitai ulih terus belajar mayuh agi pasal Apai ti di serega sereta neladan Iya belama iya. Tu endang basa ti besai!—P-jar. 3:11.

15, 16. (a) Baka ni nuan udah bulih penguntung ari belematika Jehovah enggau Jesus? (b) Kekadang, nama kebuah tusah deka belemati, lalu nama kebuah kitai enda patut ngetu belemati?

¹⁵ Belematika Jehovah enggau Jesus nulung kitai mengkang ransing ke pemendar. Pengeransing kitai deka meransang bala menyadi Kristian kitai sereta orang ke ditemu kitai maya nginjil. Lalu lebuh kitai belematika utai ke udah digaga Jehovah ke kitai, baka nyediaka tebus Jesus, kitai deka terus ngemeratka kaul kitai ti rapat enggau Petara. (Rom. 3:24; Jas. 4:8) Mark, seiku menyadi Kristian lelaki ari menua Afrika  Selatan ke dijil tiga taun ketegal pengarap iya, madahka: ‘Pengawa belematika ulih disamaka enggau pejalai mar ti ngagitka ati. Bendar agi kitai belematika pekara rohani, mayuh agi utai baru pasal Petara Jehovah ditemu kitai. Kekadang lebuh aku berasai lemi semengat tauka irau pasal jemah ila, aku ngambi Bup Kudus, lalu belematika siti begian ba Bup Kudus. Tu ulih ngasuh aku berasai lantang.”

¹⁶ Mayuh utai ulih ngelimpangka pengidup ba dunya tu, nya alai tusah deka ngiga awak endur belematika Bup Kudus. Patrick, seiku menyadi Kristian lelaki ari menua Afrika madahka: “Runding aku baka kutak emel ke penuh enggau mayuh macham penerang ke beguna enggau iya ke enda beguna, ke patut dipilih ninting hari. Lebuh aku mansik utai ke bisi ba runding, aku suah tetemuka “pengirau,” lalu aku patut besampi ngagai Jehovah pasal pengirau nya sebedau aku ulih belematika utai enggau runding ti puang. Taja pan tu begunaka awak sebedau aku ulih berengkah belematika pekara rohani, aku berasai semak agi ngagai Jehovah. Tu nulung aku nemu pemendar enggau manah agi.” (Mas. 94:19) Amat, kitai bulih mayuh penguntung lebuh macha sereta belematika Bup Kudus ninting hari.—SKR. 17:11.

17. Baka ni nuan ulih ngiga awak kena belemati?

¹⁷ Sekeda orang dani tumu pagi ngambika ulih macha, belemati, sereta besampi. Bisi mega orang ngereja tu maya sida ngetu makai tengah hari. Nuan engka macha Bup Kudus maya lemai hari tauka sebedau nuan tinduk. Sekeda orang macha Bup Kudus maya pagi hari, lalu macha iya baru sebedau tinduk. (Jos. 1:8) Keberat agi, iya nya ngena “semua peluang” kitai “enggau badas.” Reti nya, ngambi jam ari utai ke enda entu beguna kena belematika Jaku Petara ninting hari.—Eps. 5:15, 16.

18. Nama dipadah Bup Kudus ngagai orang ke belematika Jaku Petara ninting hari sereta ngagai orang ke nitihka utai ti dipelajarka sida?

¹⁸ Bup Kudus madah, Jehovah deka merekatka semua orang ke belematika Jaku Iya, sereta orang ke enggau naka ulih nitihka utai ti dipelajarka sida. (Bacha Masmur 1:1-3.) Ku Jesus: ‘Beberekat agi orang ke ninga lalu ngasika jaku Petara!’ (Luk. 11:28) Tang keberat agi, belematika Jaku Jehovah ninting hari deka nulung kitai ngereja utai ti ngemuliaka nama Iya. Lebuh kitai ngereja tu, Jehovah deka merekatka kitai enggau pengelantang diatu sereta pengidup meruan belama iya ba dunya baru Iya.—Jas. 1:25; Pem. 1:3.