1, 2. (a) Nama utai ti dikeirauka sekeda apai indai ke bisi anak beumur bebelas taun? (b) Baka ni anak tau bulih penguntung ari umur sida ke bebelas taun?

SITI ari utai ti pemadu ngagaka ati apai indai, iya nya lebuh anak sida dibaptisa. * Kesemua empat iku anak Berenice, udah dibaptisa sebedau sida beumur 14 taun. Ku iya: “Nya meh pengalaman ti balat ngagaka ati kami. Endang amat, kami gaga ati laban anak kami deka nyembah Jehovah. Tang kami mega nemu, anak kami deka napi mayuh penanggul lebuh sida beumur bebelas taun.” Nuan mega engka irau pasal utai tu, enti anak nuan beumur bebelas taun tauka deka manggai ba umur nya.

² Seiku pakar psikologi anak mit madahka, apai indai enggau anak nya empu engka sama bela tusah, lebuh anak nya manggai umur bebelas taun. Tang apai indai enda patut ngumbai anak sida ke beumur bebelas taun nya beli tauka baka anak mit. Tang ku iya madahka, sida pintar, bisi asai ati ti dalam sereta begunaka awak begulai enggau bala kawan. Nya alai, lebuh sida beumur bebelas taun, sida ulih ngemansangka kaul ti rapat agi enggau Jehovah,  baka ke digaga Jesus lebuh iya agi biak. (Bacha Luke 2:52.) Sida mega ulih ngemansangka pengelandik sida nginjil sereta ngemansangka pengingin deka ngereja mayuh agi pengawa ke Petara. Lalu sida ulih ngaga pemutus kediri empu, baka nyerahka pengidup sida ngagai Jehovah sereta ngasika Iya. Tang, nama ulih digaga nuan ke nyadi apai indai kena ngelatih anak nuan nyembah Jehovah? Nuan ulih belajar ari chara Jesus ngelatih bala murid iya ngena pengerindu, pemaruh ati sereta nemu berunding.

3. Baka ni bala rasul nemu Jesus nya kawan sida?

³ Jesus ukai semina Tuan ke bala rasul iya. Iya mega nyadi kawan sida. (Bacha John 15:15.) Maya jeman Bup Kudus, sida ke nyadi tuan enda madahka runding sereta asai ati sida ngagai bala ulun. Tang Jesus enda ngaga bala rasul iya baka ulun. Iya rinduka sida sereta begulai enggau sida. Iya gaga ati madah ngagai sida utai ke diperundingka sereta diasaika iya, lalu iya mendingka sida enggau manah lebuh sida madahka runding sereta asai ati sida. (Mrk. 6:30-32) Tu ngasuh sida nyadi kawan rapat, lalu nyediaka bala rasul ke pengawa ti deka dikereja sida dudi hari.

4. Apai indai, baka ni nuan ulih nyadi kawan anak nuan? (Peda gambar ba pun artikel.)

⁴ Taja pan nuan bekuasa atas anak nuan, nuan mega ulih nyadi kawan sida. Kawan begulai enggau pangan diri. Nuan engka ulih ngurangka jam gawa tauka ngereja utai bukai ngambika nuan bisi mayuh agi awak begulai enggau anak nuan. Tu utai ke patut disampika sereta diperundingka nuan enggau bebendar. Kawan mega rinduka utai ti sama. Nya alai, peratika utai ti dikerinduka anak nuan, baka musik, cherita wayang, tauka sukan. Udah nya, nguji rinduka utai ti dikerinduka iya. Ilaria, ke diau ba menua Itali, madahka: “Apai indai aku deka nemu musik ke didinga aku. Iya ke amat, apai aku nyadi kawan aku ti pemadu manah, lalu aku ngasaika diri senang berandau enggau iya, indah pasal utai ke ulih ngasuh malu.” Enggau nyadi kawan anak nuan sereta nulung sida nyadi kawan Jehovah, nuan enda lenyau kuasa nyadi apai tauka indai. (Mas. 25:14) Anak nuan deka nemu nuan rinduka sida sereta bebasaka sida, lalu sida deka senang agi berandau pasal semua utai enggau nuan.

5. Baka ni bala murid Jesus ulih gaga ati ngereja pengawa Jehovah?

⁵ Jesus nemu, enti bala rasul iya ransing nyembah Jehovah sereta mengkang kiruh nginjil, sida tentu gaga ati. Nya alai, iya meransang sida bebendar ba pengawa nginjil, lalu iya besemaya deka nulung sida.—Mat. 28:19, 20.

6, 7. Baka ni nuan ngayanka pengerindu ngagai anak nuan lebuh nuan ngajar sida ngambika ulih ngereja pengawa ke selalu digaga ke Jehovah?

⁶ Nuan deka anak nuan mengkang semak ngagai Jehovah. Lalu Jehovah deka nuan ngelatih sereta disiplin sida. Iya udah meri nuan kuasa kena ngereja nya. (Eps. 6:4) Nya alai, nuan patut nentuka anak nuan bulih latih nya enggau tetap. Pikirka tu: Nuan nentuka anak nuan besekula laban nuan nemu utai ti dipelajar sida beguna, lalu nuan deka sida rindu belajarka utai baru. Pia mega, nuan nentuka sida datai ngagai gempuru, gempuru besai sereta belajarka Bup Kudus ba diri sebilik. Agi mega, utai ti dipelajarka sida ari Jehovah ulih nyelamatka nyawa sida. Nya alai, tulung sida ngambika rindu belajar pasal Jehovah sereta nemu Iya ulih ngajar sida ngambika bepenemu-dalam. (J-lam. 24:14) Pia mega, latih anak nuan ngambika nurun nginjil enggau tetap. Teladan meh Jesus, enggau nulung anak nuan ngambika rindu ngajar orang bukai pasal Jaku Petara.

 ⁷ Baka ni enggau pengawa ke selalu digaga ke Jehovah, baka belajarka Bup Kudus, datai gempuru sereta nginjil, ulih nulung anak nuan? Erin, ke diau ba menua Afrika Selatan, madahka: “Kami ke anak suah mutap sereta besebana pasal belajarka Bup Kudus, datai gempuru, sereta nginjil. Kekadang, kami sengaja ngaga hal ngambika enda enggau belajarka Bup Kudus ba diri sebilik. Tang apai indai kami enda alah.” Iya beterima kasih ngagai apai indai iya, laban sida nulung iya nemu utai tu beguna bendar. Diatu, enti iya enda ulih datai ngagai siti-siti gempuru, tauka enda ulih enggau nginjil, iya jejampat nentuka diri ulih datai gempuru enggau nginjil ba maya bukai.

8. (a) Baka ni Jesus ngayanka diri baruh ati? (b) Baka ni pemaruh ati Jesus nulung bala murid iya?

⁸ Taja pan Jesus sempurna, iya baruh ati sereta madah ngagai bala murid, iya begunaka tulung ari Jehovah. (Bacha John 5:19.) Kati tu ngasuh bala murid enda entu bebasaka Jesus? Enda. Suah agi sida meda iya bepanggai ba Jehovah, arap agi sida ke iya. Udah nya, sida neladan pemaruh ati iya.—SKR. 3:12, 13, 16.

9. Lebuh nuan ngaku penyalah diri sereta nyebut minta ampun, baka ni tu ulih nulung anak nuan?

⁹ Enda baka Jesus, kitai enda sempurna sereta ngaga penyalah. Nya alai, baruh ati meh. Anang enda ingat, mayuh utai enda ulih dikereja nuan, lalu ngaku meh penyalah diri. (1 Jhn. 1:8) Udah nya anak nuan deka belajar ngaku penyalah diri, lalu iya deka bebasa ke nuan agi. Uji pikir, sapa ke deka dipebasaka nuan agi? Bos ke ngaku penyalah diri maya iya salah tauka bos ke enda kala nyebut minta ampun? Rosemary, ke bisi tiga iku anak madahka, iya enggau laki iya sanggup ngaku penyalah diri. Iya nerangka: “Tu ngasuh anak kami deka beterus-terang enggau kami, lebuh sida bisi penanggul.” Ku iya agi: “Kami ngajar anak kami dini alai sida tau bulih chara ti pemadu manah kena mutarka penanggul sida. Lebuh sida begunaka tulung, kami selalu ngasuh sida mansik litaricha Bup Kudus, lalu kami besampi enggau sida.”

10. Baka ni Jesus nya baruh ati indah lebuh iya madah ngagai bala murid iya utai ke patut digaga?

¹⁰ Jesus bisi kuasa madah ngagai bala murid iya utai ke patut digaga. Tang ketegal iya baruh ati, iya suah nerangka kebuah sida patut ngereja siti-siti utai. Chunto, iya ukai semina ngasuh sida ngiga dulu Perintah enggau pengelurus Petara. Iya mega madahka: “Lalu semua utai nya deka mega diberi ngagai kita.” Lebuh Jesus ngasuh sida badu ngakim, iya nerangka: “Ngambika kita enda diakim. Laban chara kita ngakim, deka dikena ngakim kita.”—Mat. 6:31–7:2.

11. Baka ni nuan ulih nulung anak nuan enti nuan nerangka kebuah ngaga siti-siti atur tauka pemutus?

 ¹¹ Ba maya ti ngena, terangka ngagai anak nuan kebuah nuan ngaga siti-siti atur tauka pemutus. Enti iya nemu kebuah nya, iya deka agi ngasika nuan. Barry, ke ngemesaika empat iku anak, madahka: “Nerangka kebuah, nulung anak arapka nuan.” Anak deka nemu, nuan ngaga siti-siti atur tauka pemutus ukai ketegal nuan bisi kuasa, tang ketegal nuan bisi kebuah ti manah. Kingatka mega, anak nuan ke beumur bebelas taun ukai anak mit agi. Sida belajar chara berunding kediri empu, lalu sida deka ngaga pemutus kediri empu. (Rom. 12:1) Barry nerangka: “Anak patut belajar ngaga pemutus ti betul nitihka kebuah, ukai nitihka asai ati.” (Mas. 119:34) Nya alai, baruh ati meh, lalu terangka ngagai anak nuan kebuah nuan ngaga siti-siti pemutus. Enggau tu, iya belajar ngaga pemutus kediri empu sereta iya mega nemu nuan bebasaka iya. Lalu nuan deka nemu iya mansang nyadi orang ke udah besai.

12. Ketegal Jesus nemu berunding, baka ni iya nulung Peter?

¹² Jesus nemu berunding sereta nemu utai ti diguna bala murid iya. Chunto, lebuh Jesus madahka diri deka dibunuh ngagai bala murid iya, Peter madah ngagai Jesus, Petara enda ngelakka utai nya nyadi. Jesus nemu Peter rinduka iya, tang iya mega nemu chara Peter berunding nya salah. Baka ni Jesus nulung Peter enggau bala murid ke bukai? Keterubah, iya ngemetulka Peter. Udah nya, Jesus nerangka nama deka nyadi ngagai orang ke nyeliahka diri ari ngereja peneka Petara lebuh utai nya tusah dikereja. Jesus mega madahka, Jehovah deka merekatka orang ke enda ngira diri. (Mat. 16:21-27) Peter belajarka utai ari jaku Jesus.—1 Pet. 2:20, 21.

13, 14. (a) Nama nunjukka anak nuan patut ngeringka pengarap iya? (b) Baka ni nuan ulih nemu utai ti amat diguna anak nuan?

¹³ Besampi meh minta penemu ari Jehovah ngambika nuan ulih nemu utai ti diguna anak nuan. (Mas. 32:8) Nuan engka meda iya enda entu gaga ati baka selama tauka iya nyebut utai ke enda manah pasal bala menyadi Kristian. Nuan mega engka ngasaika iya enda madahka sekeda pekara ngagai nuan. Anang beguai nyangka anak nuan bisi ngelalaika penyalah ti besai. * (Peda nota kaki.) Tang, anang enda ibuhka penanggul nya tauka ngarapka penanggul nya deka lenyau. Iya ke amat, nuan patut nulung iya ngeringka pengarap iya.

¹⁴ Kena nemu baka ni nuan ulih nulung anak nuan, tanya iya enggau manah sereta enggau basa. Tu baka ke ngauk ai ari telaga. Enti nuan narit ai ke dikauk kelalu jampat, nuan enda bulih mayuh ai. Pia mega, enti nuan enda sabar lebuh nuan nanya tauka nguji deka ngansak anak nuan bejaku, nuan enda ulih nemu utai ke amat diperundingka sereta diasaika iya. (Bacha Jaku Dalam. 20:5.) Ilaria agi ingat, lebuh iya beumur bebelas taun, iya deka ngena mayuh agi awak begulai enggau orang ke sekelas enggau iya, tang iya nemu nya salah. Apai indai iya beratika iya baka ke bisi utai dikeirau. Ku Ilaria: “Bisi sekali, sida madah ngagai aku, sida beratika aku enda entu bemunyi, lalu sida nanyaka kebuah iya. Aku nyabak, nerangka kebuah sereta minta tulung. Sida merap aku, madahka diri nemu utai ti diasaika aku, lalu besemaya deka nulung aku.” Apai indai Ilaria berumban nulung iya bulih kawan ti manah ba gempuru.

15. Nama agi chara bukai ti nunjukka Jesus nemu berunding?

 ¹⁵ Jesus mega nemu berunding lebuh iya beratika pemanah kualiti ke dikemisi bala murid iya. Chunto, lebuh Natanel nemu Jesus datai ari Nasaret, ku iya: “Kati utai ti badas ulih datai ari Nasaret?” (Jhn. 1:46) Enti nuan bisi dia, kati nuan deka ngumbai Natanel bisi runding ke enda manah tauka bechiping tauka nadai pengarap? Jesus enda berunding baka nya. Tang iya nemu berunding, sereta nemu Natanel nya lurus. Nya alai ku iya: “Tu baru orang Israel ke bendar, ke nadai nemu ngelakar.” (Jhn. 1:47) Jesus ulih macha ati, lalu iya ngena pengelandik tu ngiga kualiti manah ke bisi ba orang.

16. Baka ni nuan ulih meransang anak nuan ngaga pemansang?

¹⁶ Taja pan nuan enda ulih macha ati baka Jesus, tang nuan ulih berunding. Jehovah ulih nulung nuan ngiga kualiti manah ke bisi ba anak nuan. Taja pan anak nuan ngenusahka ati nuan, anang ngumbai iya orang ti jai tauka orang ti udu ngaga hal. Anang sekali-kali ngumbai iya baka nya. Tang padah ngagai iya, nuan ulih meda kualiti manah iya sereta nuan pechaya iya deka ngereja utai ti betul. Peratika pemansang ke digaga iya, lalu puji iya. Tulung iya ngemansangka kualiti manah iya enggau meri iya mayuh agi tanggungjawap enti iya ulih. Jesus ngereja utai ti sama ngagai bala murid iya. Setaun setengah pengudah betemu enggau Natanel (mega dikumbai Bartolomew), Jesus meri iya siti tanggungjawap ti besai. Iya milih Natanel nyadi rasul, lalu Natanel enggau tetap ati bejalaika pengawa ke diberi Jesus ngagai iya. (Luk. 6:13, 14; SKR. 1:13, 14) Nya alai, ari ke ngasuh anak nuan ngasaika diri enda chukup manah, puji sereta peransang meh iya. Awakka iya ngasaika diri ulih ngasuh nuan enggau Jehovah lantang ati, lalu iya ulih ngena pengelandik iya nyembah Jehovah.

17, 18. Nama asil iya, enti kita terus ngelatih anak kita nyembah Jehovah?

¹⁷ Nuan engka ngasaika utai ti diasaika rasul Paul. Iya balat irauka orang ke dikumbai iya anak. Sida tu orang ke udah ditulung iya ngelala Jehovah, lalu iya balat rinduka sida. Nya alai, iya tusah ati lebuh berundingka sekeda ari sida ke engka enggai agi nyembah Jehovah. (1 Kor. 4:15; 2 Kor. 2:4) Victor, ke ngemesaika tiga iku anak, madahka: “Lebuh anak beumur bebelas taun enda senang. Tang pengalaman manah begulai enggau anak, ulih ngalahka penanggul ti ditapi kami. Enggau tulung ari Jehovah, kami bisi kaul ti rapat enggau anak kami.”

¹⁸ Apai indai, kita udah bebendar ngelatih anak kita, laban kita sayau amat ke sida. Anang lemi semengat. Perundingka pengaga ati ke deka diasaika kita lebuh anak kita ngaga pemutus nyembah Jehovah sereta terus nyembah Iya enggau tetap ati.—3 Jhn. 4.