Tiap taun beratus ribu iku orang dibaptisa. Ketegal pemansang tu, kitai begunaka mayuh agi bengunan ke dikena ba sembah kitai. Opis Ngaga Pelan/Nirika ba Endur Nya di serata dunya udah merambu deka nirika tauka nyeruri lebih ari 2,700 bengunan dalam taun nginjil 2020. a

 Tang sayau, mayuh ari pelan tu jelungan ketegal COVID-19. Ketegal Komiti Pengeluar deka nyaga bala menyadi sereta nitihka atur ari perintah menua, mayuh ari projek tu diketuka. Taja pia, dalam taun nginjil 2020, agi bisi 1,700 bengunan udah tembu didirika tauka diseruri sebedau penyakit COVID-19 nyadi. Pia mega, lebih ari 100 projek pampang opis pan udah tembu. Peratika penguntung ngagai bala menyadi ari dua iti projek ke baru tembu tu.

 Pampang opis Cameroon. Pampang opis ke suba, ke ba Douala, amat mit lalu patut dikemesaika. Komiti Pengeluar bisi runding deka nyeruri pampang opis nya, tang ungkus pengawa nyeruri nya besai agi ari rega bengunan nya empu. Sida mega berunding deka meli tanah lalu nirika bengunan baru tauka meli bengunan ke udah bisi lalu nyeruri nya. Tang kedua-dua pelan nya enda nyadi.

 Maya nya, bala menyadi kitai nerima berita pasal Palan Gempuru Besai tunga ke utara Douala. Majlis perbandaran deka ngaga jalai raya nuju ngagai Palan Gempuru Besai. Ketegal projek nya, Palan Gempuru Besai deka senang ditengah sereta datai api. Semua pemansang tu diguna ba pampang opis. Nyadi, Raban ti Ngiring meri pemendar deka magi tanah ba Palan Gempuru Besai, lalu ngena sebagi ari tanah nya nirika pampang opis baru.

 Kena ngelimat duit sereta enda makai mayuh awak, bala Saksi bekerejasama enggau sekeda kontruktor nembuka projek tu. Indah, ungkus projek tu lebih ari dua juta dolar (U.S) tauka RM8.3 juta kurang ari ke disadang! Ruang bilik Betel ulih pindah ngagai opis baru tu enda lama sebedau COVID-19 nyadi.

 Ruang bilik Betel ba Cameroon rindu enggau endur ti baru alai sida diau sereta gawa. Sida ngumbai opis baru tu siti pemeri ari Jehovah. Sepasang laki bini madah, “Kami deka bebendar agi gawa lalu nunjukka diri beterima kasih ke pemeri tu.”

 Opis Penyalin Tojolabal (RTO), Mexico. Betaun-taun, tim penyalin Tojolabal gawa ba pampang opis Amerika Tengah ke bisi ba bandar besai Mexico. Tang, bansa jaku Tojolabal dikena orang ke diau ba Altamirano enggau Las Margaritas, enggau penyauh 1,000 km (620 batu) ari pampang opis nya! Ketegal tu, bala penyalin Tojolabal tusah deka ngemansangka jaku nya. Pia mega, tusah deka ngiga bala menyadi ke diau semak pampang opis ti ulih nulung nyalin, sereta ngerikut litaricha ba jaku Tojolabal.

 Ketegal tu, Komiti Penulis ari Raban ti Ngiring deka mindahka tim penyalin Tojolabal ngagai endur alai bansa jaku nya suah dikena. Ngambika pelan tu mujur, pampang opis meli lalu nyeruri sebuah bengunan. Tu ulih ngelimatka ungkus ari ke nirika bengunan baru tauka nyiwa opis.

 Seiku penyalin nerangka penguntung ke diulih iya: “Dalam timpuh sepuluh taun aku gawa ba pampang opis, nadai siku pan ruang bilik ditemu aku ke ngena bansa jaku tu. Diatu opis kami ba endur orang Tojolabal diau. Ninting hari aku ngena jaku Tojolabal enggau orang ke semak aku diau. Tu ngemansangka pengelandik aku ba bansa jaku tu sereta ngemanahka agi chara aku nyalin litaricha.”

 Dalam taun nginjil 2021, enti ulih kami arapka ulih nirika tauka nyeruri 75 buah bengunan RTO sereta Sekula Teokratik. Kami mega deka terus enggau lapan projek pampang opis besai nyengkaum projek indu opis baru ba Ramapo, New York. Lalu pia mega, pampang opis Argentina enggau Itali deka dipindahka. Kelimpah ari nya, kitai begunaka 1,000 buah Palan Gempuru baru, bisi mega 6,000 Palan Gempuru ke patut diganti, lalu 4,000 Palan Gempuru patut diseruri.

 Baka ni semua projek tu dipelanja? Menyadi Lázaro González, seiku ari Komiti Pampang Opis Amerika Tengah nyaut tanya tu, lebuh iya nerangka pasal projek RTO Tojolabal. Ku iya, “Ba endur ke dipegai pampang opis kami, bisi tatak. Nyadi enti nadai sukung ari bala menyadi di serata dunya, kami enda ulih melanja pengawa nyalin litaricha ngagai menyadi kitai ti ngena bansa jaku asal sida. Ketegal duit pemeri ari menyadi di serata dunya, bala penyalin ulih gawa ba endur bansa jaku sida dikena orang mayuh. Kami meri besai terima kasih ngagai bala menyadi di serata dunya laban nyukung kami enggau gerah jari.” Semua projek tu ulih dipejalaika ketegal duit pemeri kita ke nyukung pengawa serata dunya, ti kesuah iya diberi nengah donate.pr418.com.