Jehovah rindu ngajar nembiak Iya. Ketegal tu, gerempung Iya numbuhka beberapa iti sekula kena ngelatih nembiak Iya ngereja pengawa ke diberi ngagai sida. Siti ari sekula nya, Sekula Penginjil Perintah Petara (SKE). Dalam beberapa taun tu, gerempung Petara ukai semina fokus ngagai kurikulum, pia mega ngagai bengunan alai sekula diatur. Tuju atur tu ngambika pengajar enggau pemelajar senang agi ngajar enggau belajar. Baka ni duit pemeri ari kita nulung kami nyapai tuju tu?

 Betaun-taun, sekula teokratik udah diatur ba Palan Gempuru enggau Palan Gempuru Besai. Tang, baru-baru tu nama kebuah kitai nirika tauka ngaduka sekeda bengunan ke dikena sekula teokratik aja? Peratika tiga iti kebuah iya.

 Mayuh agi beguna. Ku Menyadi Christopher Mavor, iya nya Penulung Komiti Nginjil ari Raban ti Ngiring madahka, “Pampang opis madahka kami, sida begunaka mayuh agi menyadi ba pengawa nginjil. Chunto iya, kena 2019, pampang opis Brazil nyangka kira-kira 7,600 graduet SKE amat beguna nulung ba pengawa nginjil di pelilih sida.” Pampang opis Amerika Serikat madahka, amat begunaka pengerintis ti layak ke ulih ngelatih bala menyadi ke bukai ngambika ulih enggau ba pengawa nginjil ti spesial, nginjil ba penyangkai kapal, sereta nginjil ba rumah jil. Pia mega, amat begunaka menyadi ke ulih mantu ba begian Opis Ngaga Pelan/Nirika Bengunan sereta Komiti Besilih Penemu Sepital. Menyadi ke graduet ari SKE ulih nulung ba begian tu.

 Penyampau pemelajar majak nambah. Mayuh pampang opis nerima peminta ari mayuh pemelajar lebih ari ke ulih diterima sida. Chunto iya, ba pampang opis Brazil nerima kira-kira 2,500 pom SKE dalam setaun aja. Tang ketegal sida enda chukup endur ngatur sekula tu, pampang opis semina ulih nerima 950 iku pemelajar aja.

 Endur diau ke sesuai. Lebuh bala pemelajar tu enggau sekula teokratik ba Palan Gempuru tauka Palan Gempuru Besai, suah iya sida diau enggau bala menyadi ari menua nya empu. Atur tu sesuai enti enda mayuh kelas diatur ba taun nya. Tang enti dalam taun nya bisi mayuh kelas, tusah alai bala menyadi nyediaka endur sida diau laban sida patut diau dia dalam beberapa bulan. Nya alai, bengunan teokratik tu digaga semak kelas lalu digaga khas ke bala pemelajar.

 Bengunan ke bisi siti bilik kelas, ulih alai bala pengajar sereta kira-kira 30 iku pemelajar diau, nyengkaum endur ke diguna sida. Ungkus semua utai tu kira-kira beberapa juta dolar (U.S), bepanggai ngagai dini alai bengunan nya didirika sereta utai bukai.

 Kesuah iya, sekula tu didirika ba endur ti sunyi, iya nya jauh ari kawasan bandar tang semak alai bulih pengangkutan awam. Pia mega, endur tu dipilih bepelasarka pemayuh bala menyadi ke semak endur nya, ngambika sida ulih datai nulung ba sekeda pengawa maya sekula tu dipejalaika.

 Bengunan tu mega bisi librari, endur belajar, komputer, printer sereta perengka ke bukai. Nambahka nya, mega bisi bilik makai alai bala pemelajar sereta pengajar sida ulih makai begulai. Pia mega, bisi endur ti chukup alai sida sesais sereta relaks.

 Kami mega ngaga gamal kelas nya enggau manah. Munyi ke diterangka Troy, iya nya siku menyadi ke gawa ba begian Opis Ngaga Pelan/Nirika Bengunan di Warwick, New York madahka, “Kami nanya penemu begian Opis Sekula Teokratik nulung kami ngaga gamal kelas ti ulih ngasuh bala pemelajar berasai selesa lebuh sida belajar. Sida madahka kami kelas nya patut mesai ni, baka ni nya patut ditusun, nyengkaum penampak cahaya sereta perengka audio-video ke deka dikena sida.” Bekaul enggau masang begian perengka audio, Zol-tán, siku ari pengajar SKE ke asal ari Hungary madah, “Ba pun iya suba, kami nadai mikrofon, nya alai kami selalu ngasuh pemelajar nyaut enggau nyawa ti inggar. Tang diatu, tiap iti mija sida bisi mikrofon, penanggul tu udah diputarka.”

 Nama penguntung ke diasaika bala pengajar enggau pemelajar ketegal bengunan ti manah agi? Ku Angela madahka, iya nya siku menyadi ke enggau SKE ba Palm Coast, Florida, Amerika Serikat, “Endur tu amat ngelantangka ati. Semua utai udah digaga enggau amat manah nyengkaum kelas enggau bilik kami, ngambika kami ulih fokus maya belajar.” Csaba, siku pengajar ari Hungary amat gaga bisi peluang makai begulai enggau bala pemelajar. Ku iya madah, “bala pemelajar suah bekunsi enggau kami pasal sida empu sereta utai ke kala diasaika sida. Enggau chara tu, kami ulih ngelala sida agi. Ketegal tu, kami senang ngajar sida nitihka chara tiap iku sida.”

 Ba pemelajar sereta pengajar, bengunan teokratik tu siti hadiah ti berega ke datai ari Pengajar ti Pemadu Tinggi, iya nya Jehovah. (Isaiah 30:20, 21) Siku menyadi indu ke asal ari Pilipina ti enggau SKE, ke diau ba bengunan teokratik alai sekula tu dipejalaika madah, “Keadaan sekula tu mega ngingatka kitai, kitai ukai semina pemelajar tang kitai temuai Jehovah ti spesial. Iya ka kitai gaga ati lebuh belajarka Jaku Iya.”

 Bengunan sekula teokratik tu ulih didirika, diaduka sereta dijaga ketegal bisi duit pemeri ari nuan, ke diberi nengah donate.pr418.com. Besai terima kasih ngagai pengerah jari nuan.