Siti utai ke dianti Saksi-Saksi Jehovah enggau ati ti gagit, iya nya deka meda Episod 1 Berita Manah ke Ditusui Jesus. Bejuta iku udah meda nya. Lalu tu semina episod keterubah ari 18 iti episod! Nama utai ke digaga bala menyadi kena ngemujurka projek tu, lalu baka ni nuan udah nyukung usaha tu?

 Ba pampang opis Australasia, alai siri Berita Manah digaga, urung 50 ngagai 80 iku orang bisi enggau tiap kali bisi rikuding. a Bala menyadi nyediaka pemakai tengah hari enggau malam sereta snek ngagai pelakun enggau kru. Nyadi sida patut tumu ngaga pelan nama pemakai ke patut disediaka. Esther, ke gawa ba Begian Nyediaka Pemakai nerangka “Kami meli pemakai ari beberapa iku pembekal ngambika bulih barang ti bekualiti enggau rega ti manah. Enti bisi laluh, kami ngijas resipi ngambika enda masau pemakai lain kali.” Ungkus pemakai nya ninting hari kira 4 dolar Amerika (kira-kira RM17) siku.

 Pelakun enggau kru ukai semina begunaka pemakai, tang mega begunaka lindung ari panas. Suah iya, cuaca ba Australia manah, tang penanggul iya, panchar ultraungu ti bahaya amat balat ba menua nya. Nya kebuah penting ngelindung bala menyadi ari panas lalu nentuka sida enda kena strok haba. Nyadi, sekeda menyadi ke udah dipilih kena nyukung proses ngerikut, nyediaka kemah enggau endur belelak sereta sunscreen, payung enggau ai irup. Kevin, ke gawa ba Begian Audio/Video nerangka: “Mayuh ari sida pekereja Bethel ke ulang-alik. Sida ngereja pengawa tu, enggau mayuh pengawa ti praktikal ke bukai, enggau baruh ati sereta ati ti gaga. Kami enda ulih nembuka projek tu enti nadai sida.”

 Kekadang bala menyadi enda ulih ngerikut sekeda begian ba Bethel tauka dalam studio laban gambar nya enda ngam. Enti pia, sida patut ngagai endur ke jauh ari Bethel. Kena ngambarka jeman Bup Kudus, tiang karan, jalai tar sereta bengunan moden enda patut dipeda. Nya alai, bala pelakun enggau kru patut bejalai jauh. Gari lakun, prop enggau perengka bukai patut dibungkus, diangkut lalu disimpan manah ba endur alai ngerikut video. Sebedau sida berengkah, tuai ke ngatur pengawa ngerikut nentuka generator, ai irup enggau jamban bisi ba endur nya. Maya ngerikut ba dia, pelakun enggau kru bemalam ba rumah bala Saksi ari endur nya, karavan, hotel tauka motel.

 Ngerikut ba luar Bethel begunaka mayuh belanja, awak enggau pengering ari sida ke gawa ba projek tu. Nyadi, ba taun 2023, Raban ti Ngiring ngemendarka bala menyadi meli video wall enggau ungkus 2.5 jula dolar Amerika (kira-kira RM10.7 juta.) Video wall nya skrin besai ti amat tinggi kualiti ke mandangka video ba belakang pelakun sereta ngijas penampak dalam studio ngambika ulih ngerikut video ke baka ke udah dirikut ba luar. Asil iya, sida ulih nyeliahka ari ngerikut ba luar Bethel lalu ngelimat duit ke dikena. Darren, siku ari Komiti Pampang Opis Australasia, nerangka: “Laban ngena video wall bala pelakun enda jampat lelak, lalu nya pan ngenyenangka bala kru laban sida ulih ngerikut beulang-ulang kali. Ambika chunto, enti kami ngerikut ba luar maya mata panas padam, kami semina bisi beberapa minit aja alai ngerikut. Tang, ngena video wall, bala pelakun ulih belakun ba depan sunset beulang-ulang kali nyentukka iya ngam.”

 Tiap iti episod ari siri Berita Manah begunaka beratus-ratus iku pelakun enggau mayuh agi kru. Nama asai ati sida pasal pengawa ke digaga bala menyadi kena nyaga sida?

 Amber bejalai lebih ari 700 kilometer (435 batu) ari rumah iya ba Melbourne ngagai Sydney kena nulung ba projek tu. Iya nulis: “Kenyau ari penatai aku ba padang bilun, bala menyadi ari Bethel nyaga aku enggau manah. Mayuh sida ke gawa ba Bethel mai aku makai ngirup begulai. Maya ke ngerikut, semua orang ngasuh aku ngasai selesa enggau dikerindu. Pejalai aku mai mayuh berekat. Mimit pan nadai asai berkorban!”

 Derek gawa enggau tim ngasilka video. Ku iya: “Mayuh begian ba Bethel udah nyukung kami kenyau ari pun projek tu. Aku beterima kasih laban dikelingi bala menyadi ke bebendar ngena jam, pemisi enggau pengering ba projek tu. Sida nyukung pangan diri, sanggup gawa, sereta manah ati. Enggau terang, Jehovah udah merekatka sida enggau kami mega. Aku pechaya, Iya ukai semina ibuhka pasal asil pengawa kami, tang mega baka ni pengawa tu dipejalaika.”

 Terima kasih ke sukung kita ke udah diberi ngagai siri video tu nengah duit pemeri, nyengkaum duit ke diberi nengah donate.pr418.com.