Saksi-Saksi Jehovah amat ibuhka bala menyadi Kristian sida. (1 Peter 2:17) Mayuh ari kitai ngasaika utai ti sama baka menyadi Tannis ari Kenya. Iya madahka, “Aku amat rindu deka nemu pasal utai ke nyadi ba bala menyadi Kristian aku di serata dunya.” Baka ni Tannis enggau bejuta iku Saksi ke bukai nemu utai ke benung nyadi? Kenyau ari 2013, kitai bulih penerang nya nengah Ruang Berita ba laman web kitai, iya nya jw.org.

 Ruang Berita tu ngembuan riput ke ulih dipechaya pasal Saksi-Saksi Jehovah. Topik ke disedia iya nya, lebuh Bup Kudus dikeluarka, pengawa nulung mansa bencana alam, projek nirika bengunan sereta utai bukai. Ruang Berita mega meri penerang pasal menyadi Kristian ke udah dijil ketegal ngetanka pengarap sida. Kelimpah ari nya, begian tu ngembuan peneleba ti meransang pasal kimpin pengawa nginjil sereta Ngingatka Pemati Jesus. Baka ni semua berita tu dipansik sereta disedia?

 Ruang Berita dipegai Opis Penerang ke Orang Mayuh (OPI). Begian tu ba indu opis sereta nerima iring ari Komiti Ngatur dibaruh Raban ti Ngiring. OPI bisi lebih ari 100 iku bala menyadi ke gawa nyadi penulis, pemansik, begian ngelukis enggau gambar, sereta penyalin. Mayuh ari sida gawa nyadi sukarela ba luar Betel. Bisi ke bukai diasuh nyadi pengari lebuh berunding enggau pegawai perintah, bala profesor, pengajar sereta piak media. OPI dibantu lebih ari 80 Begian Penerang ke Orang Mayuh (PID) ba pampang opis di serata dunya.

 Begian OPI bekerejasama enggau begian PID kena nyediaka berita. Pengudah nemu berita ke deka dikenataika, udah nya sida mansik lalu ngumpul penerang ti betul pasal berita nya. Pansik tu nyengkaum interbiu sereta randau ke diatur enggau bala pakar. Pengudah semua fakta tu digumpul, berita tu deka ditulis, diadu lalu diperesa. Gambar ke ngena mega deka ditambah. Ke penudi, berita nya deka dianjung ngagai Komiti Ngatur kena ngulihka pemendar.

 Nama asai ati bala menyadi pasal Ruang Berita? Menyadi Cheryl ari Pilipina madahka, “Maya tumu pagi, aku amat rindu macha berita pasal gerempung Jehovah sereta bala nembiak Iya.”

 Mayuh pemacha ulih meda bida entara Ruang Berita ba jw.org enggau berita ari piak media. Tatiana ari Kazakhstan madahka, “Aku ulih pechayaka berita ke dikeluarka ari jw.org. Aku amat beterima kasihka utai tu. Semua berita nya bepelasarka fakta ti betul sereta ulih dipechaya.” Seiku menyadi indu ke benama Alma ari Mexico mega madah, “Ruang Berita amat meransang aku, enti dibandingka enggau berita ti jai ke suah didinga kitai ba media.”

 Ruang Berita tu ukai semina ulih dipechaya, indah ulih ngeringka pengarap kitai. Bernard ari Kenya madahka, “Nengah Ruang Berita aku ulih meda bala menyadi ba serata dunya ti baka ruang bilik aku, enda ngira dini alai sida. Aku ulih nyebut nama sereta utai ke ditapi sida enggau nyemetak dalam sampi aku.” Menyadi Bybron ke mega ari Kenya madahka, “Aku selalu berasai gagit lebuh meda artikel pasal Bup Kudus dikeluarka dalam bansa jaku bukai. Artikel tu ngingatka aku, Jehovah nya Petara ti enda bechiping.”

 Kelimpah ari nya, berita pasal bala menyadi ke diperinsa mega ulih meransang kitai. Jackline ari Kenya madahka, “Pemerani sida udah negapka pengarap aku. Aku selalu deka nemu kebuah sida ulih terus betan. Aku belajar, pekara ti ‘mit’ baka besampi, macha Bup Kudus indah belagu ulih meri asil ti manah kena meransang bala menyadi kitai.”

 Menyadi Beatriz ari Costa Rica, beterima kasihka Ruang Berita ke bekunsi pasal bencana alam ke udah nyadi. Ku iya, “Ruang Berita nulung aku meda baka ni gerempung kitai nyediaka utai ke diguna bala menyadi, enggau chara ti jampat, lanchar, sereta penuh pengerindu. Ari pengawa sida, tu ngasuh aku andal, tu meh gerempung Jehovah.”

 Kitai amat beterima kasih laban ulih nerima berita ti pemadu baru pasal bala menyadi ba serata dunya! Pekara tu enda ulih dikereja enti nadai pemeri ari bala menyadi ba serata dunya, ke diberi nengah donate.pr418.com. Terima kasih ke pemeri kita ti gerah jari.