Kemayaharitu, Saksi-Saksi Jehovah nerima mayuh utai ke diguna ba pengarap nengah perengka elektronik. Tang ba sekeda endur, bala menyadi agi enda ulih ngena internet ketegal mar. Bisi mega, endur sida diau tusah deka bulih segenil internet, lubah tauka endang nadai.

 Taja pia, bala menyadi kitai agi ulih download litaricha nengah eletronik taja pan nadai internet. Baka ni?

 JW Box siti perengka ti mit, ke disediaka ngagai eklisia ti enda ulih bulih internet tauka line ke enda chukup kuat. JW Box tu ngundan siti perengka wifi ke dibeli gerempung ari kompeni luar. Begian Komputer ba Betel ngaga siti software ke ditepu dalam perengka nya. Sekeda ari litaricha digital enggau video kitai ari jw.org mega disimpan ba perengka nya. Ungkus tiap iti JW Box nya $75 U.S. (RM313)

 Ba Palan Gempuru, bala menyadi ulih ngena perengka elektronik sida empu, lalu connect nya ngagai JW Box maya deka download litaricha sereta video. Indah, perengka eletronik ti udah lama tauka enda kelalu moden pan agi ulih connect ngagai JW Box. Tang, baka ni enti eklisia nya nadai line internet? Baka ni bala menyadi ulih download? Pampang opis deka nganjung flash disk betukar-tukar ngagai beberapa iti eklisia ke begunaka nya. Ungkus tiap iti flash disk nya dalam urung $4 U.S. (RM16.70) Lalu dalam tu, bisi litaricha sereta video ti pemadu baru ba jw.org, lalu ulih connect engau JW Box.

 Nama guna JW Box tu ngagai bala menyadi kitai? Nathan Adruandra, seiku apai ke diau ba Republik Demokratik Kongo madah, ‘Udah lama aku nguji download drama “O Jehovah, . . . Aku Arapka Nuan” enggau Kingatka Bini Lot, tang enda ulih. Ketegal tu nyau lembau aku ngaga nya agi. Tang diatu, aku ulih download semua video kedeka aku tu ba talipun aku. Tu ngenyenangka kami duai bini aku ngajar bala anak kami.’

 Ba Nigeria, seiku menyadi lelaki ke nulung eklisia masang JW Box nya madah, “Bala menyadi ngasaika JW Box nya pemeri ti spesial ari Jehovah. Sida amat gaga ulih download litaricha sereta video enggau senang.”

 Lebih ari 1.700 iti JW Box udah dianjung ngagai bala menyadi kitai ba Afrika, Oceania, enggau Amerika Selatan. Sida mega ngaga pelan, deka nganjung tu ngagai mayuh agi eklisia ke bukai. Baka ni ungkus atur tu dipelanja? Nengah pemeri ti sukarela ari pengawa ba serata dunya, nyengkaum pemeri ke diberi nengah donate.pr418.com. Besai terima kasih enggau pengerah jari bala menyadi kitai.