Musik nya pemeri ti berega ari Jehovah. Musik ulih negu ati enggau runding kitai, sereta meri kitai peransang. Pia mega enggau lagu asal kitai. Kelimpah ari ke disebut kitai tadi, lagu asal kitai mega ulih meransang kitai semak agi ngagai Jehovah.

 Kenyau ari taun 2014, lebih ari 70 lagu asal udah dikeluarka, lalu diatu abis nadai siti ari lagu nya ulih didinga lebih ari 500 bengkah bansa jaku! Tang nuan engka berunding, ‘Sapa ke ngaga lagu tu, lalu baka ni lagu tu diasilka?’

 Lagu asal diasilka tim musik ba Begian Audio/Video, ke gawa ba baruh iring Komiti Ngajar ari Raban ti Ngiring. Tim musik bisi 13 iku bala menyadi ke nulung dalam pengawa ngaga, jurutera musik, ngaga jadual sereta pengawa sukung ke bukai. Kelimpah ari nya, Komiti Ngajar udah ngemendarka bala sukarela ari luar Betel ba serata dunya kena nulung pengawa tu. Entara pengawa ke digaga sida nya ngaga lagu, main musik enggau belagu. Sida ngena penau diri kena ngemuliaka Jehovah lalu ukai ketegal deka tebilang.

 Baka ni sesiti lagu asal diasilka? Keterubah, Komiti Ngajar nentuka prinsip Bup Kudus sereta emosi ke deka dikenataika nengah lagu nya. Pengudah nya, tim musik nerima pengawa lalu ngaga tiun sereta leka lagu. Sida deka nyediaka siti chunto rikuding. Komiti Ngajar ningaka chunto nya lalu meri iring ke bukai. Udah nya, tim musik deka ngaga ubah ti patut lalu ngerikut lagu nya baru. Pengawa rikuding dipejalaika ba mayuh endur, nyengkaum pampang opis enggau studio ba rumah.

 Kena ngaga sereta ngerikut lagu asal, bala menyadi kitai ngena software audio, program nuliska note musik, librari audio, enggau mayuh agi. Kena ngereja pengawa tu, sida bekena ke perengka baka perengka musik, audio mixer, amplifier, spika, enggau mikrofon. Ungkus siti mikrofon entara 100 dolar Amerika (kira-kira RM400), nyentukka lebih ari 100 dolar Amerika (kira-kira RM4000). Ba taun 2020, kami udah ngena 116,000 dolar Amerika (kira-kira RM480,000) kena meli perengka ngerikut musik.

 Baka ni duit pemeri dikena enggau betul? Ari ke ngena tim musik ti besai ba Betel, kami ngena mayuh sukarela ba luar Betel. Kelimpah ari ngaga orkestra ti besai sereta ngerikut, suah agi bala menyadi kitai ngaga sereta ngasilka musik enggau chara digital.

 Bala menyadi rindu ninga lagu asal. Tara, ke diau ba Jerman madahka: “Lagu tu ngasuh aku berasai tenang lebuh aku balat irau. Lebuh aku ningaka lagu tu dalam jaku aku, aku asaika diberap Jehovah.” Seiku menyadi lelaki ba Kazakhstan ke benama Dmitry madahka: “Aku rindu ninga lagu asal kitai laban aku enda ibuh irau, sekalika leka lagu nya sejalai enggau prinsip Bup Kudus tauka enda. Pia mega, lagu tu ngasuh aku terus fokus ba pengarap.”

 Delia, ari Afrika Selatan madahka asai ati iya lebuh ningaka lagu asal: “Lagu asal ngeringka pengarap aku. Lebuh aku tusah ati tauka napi penguji, aku selalu ulih tetemuka lagu ke ulih nulung aku. Indah, tiun lagu nya aja pan udah meri aku semangat.”

 Sekeda lagu asal udah nyadi lagu ke dikerinduka bala menyadi kitai. Lerato, ke ari Afrika Selatan madahka: “Lagu ‘Dunya Baru Endang Amat Deka Datai’ enggau ‘Dunya Baru ti Deka Datai’ nulung aku ngambarka diri ba dunya baru, lebuh aku ulih betemu baru enggau indai aku ke dikesayau. Tiap kali aku ninga lagu nya, aku ngambarka iya belanda ngagai aku lalu merap aku.”

 Seiku nembiak ari Sri Lanka ngasaika, lagu asal mayuh nulung iya. Ku iya: “Aku dianu cikgu sains aku ba kelas, laban aku seiku ari Saksi-Saksi Jehovah. Aku amat takut lalu enda nemu baka ni deka nyaut iya. Lebuh aku pulai ke rumah, indai meransang aku ningaka lagu, ‘Aram Belajar.’ Lagu nya nulung aku sedar, aku patut ngiga pansik lalu nyediaka saut. Ba hari siti, aku bejaku enggau cikgu nya. Iya ningaka penerang aku, lalu iya madah, diatu iya faham agi pasal pengarap Saksi-Saksi Jehovah. Aku beterima kasih laban gerempung Jehovah nyediaka lagu ti amat meransang.”

 Baka ni ungkus ngasilka semua lagu tu dipelanja? Nengah duit pemeri ari serata dunya. Sebagi besai ari duit pemeri diberi nengah donate.pr418.com. Terima kasih ke pengerah jari nuan.