Ba taun 2020, mayuh pengerusak alam nyadi, ditambahka agi enggau penyakit berampit iya nya COVID-19 ke nyadi ba serata dunya. Baka ni bala Saksi-Saksi Jehovah meri bantu ngagai mansa pengerusak alam?

 Ba riput taun nginjil 2020, a Komiti Ngatur ari Raban ti Ngiring meri pemendar ngena ungkus enggau penyampau, 28 juta dolar b kena mantu mansa pengerusak alam. Naka ke diatu, lebih ari 200 iti pengerusak ke udah nyadi, chunto iya penyakit berampit COVID-19, ribut taufan, ampuh bah ba Afrika, lapar pungkang ba Venezuela, sereta kemarau ba Zimbabwa. Semua duit pemeri sukarela tu deka dikena nyediaka pemakai, ai, endur diau, gari, sereta perengka berubat, nyengkaum perengka ba pengawa meresi, ngadu sereta nirika bengunan. Peratika beberapa iti chunto ba baruh tu.

 COVID-19. Ba serata dunya, penyakit berampit tu udah ngachau pengidup bala menyadi kitai ba fizikal, emosi sereta ekonomi. Kena mantu sida, lebih ari 800 iti Komiti Tulung Pengerusak Alam ditumbuhka ba serata dunya. Komiti tu deka ngemataka utai ti diguna bala menyadi kitai, lalu nyediaka riput kena Komiti Ngatur meri bantu ke ngena ngagai bala menyadi.

 Sepemanjai riput taun nginjil 2020, Komiti Tulung Pengerusak Alam udah mantu mayuh orang ngulihka pemakai, ai, perengka kena nyaga pemeresi, enggau ubat. Ba sekeda endur, komiti tu bekerejasama enggau bala tuai gempuru menua nya, nulung menyadi Kristian minta bantu ari perintah.

 Orang ke ukai Saksi Jehovah beratika pengawa kitai ke meri bantu. Chunto iya, seiku pegawai daerah Nakonde ba Zambia, ke benama Field Simwings madahka menyadi kitai: “Kami berutang budi ngagai kita, laban kita udah nyediaka bantu ti amat diguna ngagai ruang bilik ke kena laban penusah.”

 Lapar Pungkang ba Angola. Ketegal COVID-19, amat tusah bulih pemakai, lalu rega pemakai mega amat mar ba Angola. Mayuh ari menyadi kitai tusah ka meli pemakai.

 Pampang opis ba Brazil diasuh nganjung pemakai ngagai bala menyadi kitai di Angola. Ngambika duit pemeri kitai enda dibasau, bala menyadi beratika chara ti pemadu manah, maya sida meli enggau nganjung pemakai nya. Nyadi, ungkus meli enggau nganjung pemakai nya semina $22 (tauka RM89.07). Lalu tiap iti pemakai ke berat iya 20 kilogram, ngembuan beras, kachang, enggau minyak. Naka ke diatu, bisi 33,544 iti pemakai enggau pemerat 654 tan udah dianjung. Bantu pemakai ke diulih tu udah nulung lebih ari 50,000 iku orang!

 Kati asai ati bala menyadi kitai ke nerima bantu tu? Alexandre ke diau ba endur ti jauh ari bandar di Angola madah, “Bantu tu meh bukti, Jehovah amat sayauka aku, lalu aku enda kediri aja. Gerempung Jehovah mega ibuhka aku!” Seiku indai tunggal ke benama Mariza pan madah, “Jehovah ningaka sampi aku. Aku amat beterima kasih ngagai Jehovah sereta gerempung Iya!”

 Kemarau ba Zimbabwe. Ba riput taun nginjil 2020, bejuta iku orang lapar pungkang ketegal kemarau ti balat nyadi ba Zimbabwe. Lalu beribu iku Saksi Jehovah ba endur nya, enda chukup pemakai.

 Bisi lima iti Komiti Tulung Pengerusak Alam ditumbuhka, kena nyediaka pemakai ngagai bala menyadi kitai. Beratus iku bala penginjil sukarela mungkus lalu nepuka pemakai nya, indah sanggup minjau perengka pengangkut sida, ngambika pemakai nya ulih dianjung. c Ba riput taun nginjil 2020, bisi $691,561 (tauka RM2,799,925.93) udah dikena nyediaka pemakai ngagai lebih ari 22,700 iku orang!

 Sekeda menyadi kitai udah nadai agi pemakai sebedau bantu nya datai. Nyadi, maya bantu nya datai, sida terus muji Jehovah. Indah, sekeda ari sida belaguka lagu perintah Petara.

 Ba siti endur, dua iku Saksi ke udah balu datai ngagai siti aum. Aum nya madahka bantu ke disediaka siti gerempung ke ukai datai ari perintah (NGO). Tang, aum nya bisi kaul enggau politik. Nyadi, menyadi kitai tu tadi enggai nerima sebarang bantu ari sida, laban sida enda setuju enggau syarat ke ditetapka dia. Lebuh sida mupuk ari aum nya, orang ke datai dia ngeleseka seduai iya lalu nyebut, “Anang minta pemakai ari kami kita ila!” Tang, dalam dua minggu aja, bala menyadi kitai datai ba endur sida, lalu meri bantu ba pemakai. Bantu ke diterima sida jauh tumu ari bantu ke disediaka NGO!

 Bantu ke diberi ngagai Zimbabwe mega meri saksi ti manah. Chunto iya, peratika peneleba Prisca ke diau ba kampung ti mit. Taja pan endur nya balat kemarau, Prisca tetap nginjil ninting Hari Tiga enggau Hari Lima, indah maya musin ngeradu tanah. Orang ba kampung nya ngemelika iya, lalu ku sida, “Mati lapar kita sebilik, laban nuan majak nginjil.” Tang Prisca nyaut, “Jehovah enda kala ninggalka nembiak Iya.” Enda lama udah nya, iya nerima bantu pemakai ari gerempung kitai. Sekeda ari orang ke semak iya diau amat rindu meda bantu tu, lalu madahka Prisca, “Petara enda kala ninggalka nuan, nyadi kami pan ka nemu mayuh agi pasal Iya.” Diatu, tujuh iku ari orang ke semak iya diau, ningaka gempuru kitai ke dimandangka nengah radio.

 Pengujung dunya majak semak-sesemak. Lalu kitai pan majak napi mayuh penusah nyengkaum pengerusak alam. (Matthew 24:3, 7) Kami amat beterima kasih enggau semua kita ke meri enggau gerah jari, nengah mayuh macham chara ba donate.pr418.com. Pemeri tu deka diguna meri bantu ngagai sida ke begunaka nya.