“Raban ti Ngiring udah mutuska, enti nadai sekat ari perintah menua, kami meransang semua raban gempuru berengkah begempuru betunga mua belabuh ari 1 April.” Jaku gerah nya ke dipadah ba jw.org ba pun bulan Mac 2022 ngasuh Saksi-Saksi Jehovah ba serata dunya gagit ati. Tang, pandemik COVID-19 agi bisi. a Nama perengka ke diguna, sereta ubah ke patut digaga, kena nyaga sida ke datai begempuru ari virus tu? Pengudah dua taun nadai begempuru betunga mua, kati Palan Gempuru ulih sedia dikena baru?

 Kebendar iya, bala menyadi kitai udah nyediaka mayuh utai sebedau ulih ngena Palan Gempuru.

 Sebulan pengudah begempuru betunga mua diketuka kena taun 2020, Opis Ngaga Pelan/Nirika Bengunan ba Serata Dunya (WDC), ba Warwick, New York, berengkah berundingka baka ni COVID-19 deka meri kesan ngagai chara kitai ngena Palan Gempuru. Pia mega, sida berundingka baka ni nentuka Palan Gempuru likun dikena.

 Ke suah iya, utai ke diguna ba siti endur enda sama ba menua bukai. Matthew De Sanctis, ke gawa enggau WDC madahka: “Ba sekeda menua, sida nadai endur kena masu jari. Lebuh Palan Gempuru nadai paip ai, sida patut meli tauka ngambi ai ari sungai tauka telaga. Ba sekeda menua bisi SOP ke udah ditetapka perintah pasal chara ngena air-con, sistem pengudaraan, enggau nyimpan papan tanda sereta notis pasal pengerai enggau pemeresi.”

 Baka ni bala menyadi kitai mutarka penanggul tu? Matthew madahka, ba mayuh Palan Gempuru, sida bisi tetemuka chara ti “senang, murah sereta amat bekesan” kena mutarka penanggul nya. Ngambika chunto, ba Papua New Guinea, bala menyadi ngaga stesen masu jari ngena tong ai pemesai 20 liter ke bisi paip ai. Enggau ungkus $40 (U.S.) (kira-kira RM180) bala menyadi ulih meli barang kena masu jari ba Palan Gempuru ke ba luar bandar. Lebih ari 6,000 iti stesen masu jari ke bekualiti tinggi udah dibeli ari siti kompeni di Asia, lalu dianjung ngagai Palan Gempuru ba Afrika.

 Bisi ubah ke bukai patut digaga, baka masang tauka ngaduka kipas sereta sistem pengudaraan ngambika Palan Gempuru bisi udara ti beresi. Mayuh raban gempuru meli pemegai mikrofon ti panjai ngambika mikrofon enda disadung ngena jari. Bala menyadi bebendar meresika sereta ngelap begian ke suah dipegai baka pemegai pintu sereta paip ai laban virus senang agi ngelekai ba endur baka tu. Ba sekeda gempuru, bala menyadi masang paip ai ke bisi sensor ke dibuka enggau automatik ba jamban. Ungkus udah dikena kira-kira $1,400 (U.S.) (kira-kira RM6,310) kena ngubah utai ke patut ba tiap iti Palan Gempuru di Chile.

 Bala menyadi ukai semina ngemeratka pengelikun ba Palan Gempuru, tang sida mega bejimat ngena duit pemeri. Ngambika chunto, ba sekeda menua, bala menyadi bulih tulung ari perintah kena meli stesen masu jari sereta pemegai mikrofon ti panjai. Sekeda pampang opis besaup meli perengka ti mayuh kena ngelimat duit pemeri ti dikena. Sekeda pampang opis gawa enggau Begian Meli Utai ba Indu Opis ngambika meli utai terus ari kilang, enggau tu, ungkus iya jauh murah agi sereta ulih dianjung enggau jampat.

 Pengawa ke udah dikereja ngambika Palan Gempuru likun, udah ngasuh bala menyadi ke datai begempuru betunga mua berasai nyamai agi. Siku menyadi indu ba Peru ke benama Dulcine ngaku diri berasai “mimit takut” lebuh iya nemu diri deka betunga mua ba Palan Gempuru. Ku iya: “Aku kena COVID-19 sepengudah pandemik berengkah. Nyadi aku berasai irau pasal datai ke Palan Gempuru laban aku engka ulih kena baru. Tang, pengudah aku datai ngagai Palan Gempuru, aku ulih meda tuai gempuru udah ngereja mayuh utai kena ngelindung kami. Ngambika chunto, bisi stesen masu jari sereta ngena pemegai mikrofon ti panjai. Pia mega bisi atur meresi Palan Gempuru sebedau enggau pengudah begempuru. Semua tu ngasuh aku berasai likun.” b

 Siku menyadi ba Zambia ke benama Sara napi utai ke bebida. Iya madahka: “Beberapa bulan ti udah, laki aku nadai ketegal COVID-19. Aku irau, baka ni aku deka datai Palan Gempuru betunga mua nadai iya?” Nama pengasai iya pasal datai ngagai Palan Gempuru diatu? Ku iya: “Gempuru betunga mua udah ngasuh aku nemu Jehovah semak enggau tiap iku kitai ba hari ti penudi tu. Aku ngasaika diatu, lebih ari ke suba, aku bulih peransang, pengerindu sereta tulung ke diguna aku ari tuai gempuru sereta bala menyadi ke bukai.”

 Bala menyadi ke dikerinduka ba serata dunya amat gaga ati ke peluang pulai baru ke Palan Gempuru sida empu. Terima kasih ke pemeri nuan ke mayuh diberi nengah donate.pr418.com. Duit pemeri tu udah nulung kami nentuka endur kitai begempuru nyamai sereta likun dikena.