“Udah 19 taun aku nganti tu!” Nama utai ke dianti menyadi kitai tu? Bup Kudus Salin Dunya Baru Jaku Gerika ba jaku iya empu, iya nya Bengali. Mayuh menyadi kitai mansutka asai ati ti sama, pengudah Salin Dunya Baru tu dikeluarka dalam jaku sida empu. Tang, baka ni Bup Kudus nya disalin sereta dikeluarka?

 Keterubah, siti tim penyalin patut ditumbuhka sereta dikemendarka Raban ti Ngiring nengah Komiti Pengawa Nulis. Berapa lama Bup Kudus tu patut disalin? Nicholas Ahladis, ke gawa ba Begian Penyalin di Warwick, New York Amerika Serikat, nerangka: “Nya bepanggai ngagai pemayuh bala penyalin ke ulih dikena. Ni naka pemedis jaku nya disalin, naka ni penalam penemu orang ke macha Bup Kudus nya pasal pengidup orang jeman Bup Kudus kelia, kati leka jaku ke dipilih nya enda sebaka ba endur bukai. Kitai ulih nyimpulka, dalam urung satu nyentukka tiga taun baru meh ulih nembuka Salin Dunya Baru Jaku Gerika aja. Enti deka nembuka Bup Kudus enggau penuh, nya engka begunaka 4 taun tauka lebih. Enti deka nyalin Bup Kudus ke bengal bisu, nya begunaka awak ti panjai agi.”

 Ba projek tu, ukai semina tim penyalin aja ke bekereja. Pengudah disalin, teks nya deka dianjung ngagai sekeda menyadi ke datai ari chara pengidup ti enda sama, tauka kekadang ari menua bukai. Bala menyadi ke sukarela nya, macha lalu meri penemu sereta runding sida kena ngemanahka agi salin nya. Buah runding sida nulung bala penyalin, nyalin Bup Kudus enggau betul agi sereta senang ditemu orang ke macha. Munyi ku seiku pelatih pasal nyalin Bup Kudus ba Afrika Selatan madah: “Bala penyalin ngembuan tanggung pengawa ti besai amat ngagai Jehovah sereta orang ke macha Bup Kudus.”

 Pengudah salin nya tembu, Bup Kudus patut dichelak lalu ditanggam. Abis nadai, bisi sepuluh iti bengkah utai ke diguna. Iya nya keretas, dawat, utai ke ngaga mua bup, gam, pelapis, tali pita, tali kena ngikat bup, tulang bup, sereta utai kena nyantilka bup. Kena taun 2019, ungkus ke diguna kena meli perengka nya aja udah lebih ari 20 juta dollar Amerika. Nambahka nya, bala menyadi ke gawa ba begian chelak mega udah ngena 300,000 jam, ngeluar lalu nganjung Bup Kudus.

 Nama kebuah gerempung kitai sanggup ngena mayuh awak sereta duit ngeluarka Bup Kudus? Laban munyi ku Joel Blue ari Begian Nyelak Entarabansa madah: “Bup Kudus nya, bup ti pemadu beguna ari semua bup ke kala dikeluarka kitai. Nyadi, kitai deka ngeluarka utai ti ulih meri mulia ngagai Petara ke disembah, lalu ngasuh orang nemu pemesai guna pesan ke suah dikunsi kitai enggau sida.”

 Kelimpah ari Salin Dunya Baru edisi biasa, gerempung kitai mega ngeluarka mayuh edisi bukai ti spesial. Chunto iya, Salin Dunya Baru edisi Braile ti bisi dalam sepuluh bengkah bansa jaku. Siti Bup Kudus Braille begunaka awak lapan jam kena nembuka iya. Lalu enti semua volum nya ditusun, iya begunaka rak abis nadai ngemanjai 2.3 meter. Kitai mega ngasilka Bup Kudus ti spesial ke dikena ba rumah jil, lalu Bup Kudus nya semina dibalut ngena keretas aja.

 Salin Dunya Baru tu amat berega ngagai bala menyadi kitai. Chunto iya, ba eklisia ke ngena jaku Kiluba ba endur ke disebut Tombe, di Republik Demokratik Congo. Ari bandar besai ngagai Tombe, seseiku orang patut bedarat penyauh 1,700 kilometer. Ba dia, semina siti aja Bup Kudus ke dikena bala Saksi, lalu jaku dalam Bup Kudus nya agi ngena jaku kelia. Nyadi, kengka siti Bup Kudus nya selalu dipinjau kin kia, kena menyadi kitai ngaga begian sida ba gempuru. Tang kenyau ari bulan Ogos 2018, semua orang ba eklisia nya ulih ngembuan Salin Dunya Baru dalam bansa jaku Kiluba, ke dikena sida nyentukka diatu.

 Seiku menyadi indu ke ngena jaku Jerman, nerima Salin Dunya Baru ke diaduka madah: “Diatu aku ukai semina berunding, ‘Aku patut macha Bup Kudus,’ tang ‘Kemaya aku ulih macha mayuh agi?’” Seiku orang ke dijil nulis, “Pengidup aku berubah pengudah aku nerima Bup Kudus Salin Dunya Baru. Diatu, baru meh aku amat nemu reti utai ku Bup Kudus pengudah nerima salin tu. Aku deka nemu mayuh agi pasal Saksi Jehovah, enggau chara nyadi saksi.

 Siti kebuah Bup Kudus Salin Dunya Baru ulih dikeluarka, ketegal bisi pemeri ti gerah jari ari bala menyadi kitai ba serata dunya, nengah donate.pr418.com. Semua orang ke macha salin tu amat beterima kasih ke duit pemeri ti sukarela. Terima kasih ngagai pengerah jari kita Menyadi.