Nicole, siku menyadi indu ke biak ba Colombia madah, “Aku rinduka Palan Gempuru aku! Dia meh aku ulih begulai enggau ruang bilik rohani aku.” Kati nuan mega ngasai baka nya?

 Ba serata dunya, bisi kira-kira 63,000 buah Palan Gempuru alai Saksi-Saksi Jehovah begempuru. Kitai berasai nyamai nyembah Petara ba bengunan ti manah tu. Tang ukai nya aja. David, siku pengerintis biasa ba Colombia madahka: “Palan Gempuru kitai ti manah ngasuh orang tetarit ati enggau ajar kitai. Orang ke baru datai tekenyit lebuh meda bengunan nya seruran dijaga enggau manah.” Tu enda nyadi enggau pia-pia aja. Tang kitai bebendar meresi sereta nyaga Palan Gempuru. Baka ni kitai ngereja tu?

 Bala menyadi betanggungjawap nyaga Palan Gempuru sida empu. Kena ngereja nya, bala menyadi seruran meresi Palan Gempuru. Sida mega nyaga utai ke bisi ba Palan Gempuru ngambika nya enda jampat jai, sereta ngerepair utai ti udah rusak.

 Kena nulung semua raban gempuru nyaga Palan Gempuru sida, Opis Ngaga Pelan/Nirika Bengunan (LDC) deka milih sekeda menyadi lelaki kena ngelatih menyadi ke bukai ba pengawa nyaga Palan Gempuru. Tiap iku menyadi lelaki ke meri latih nya, deka nyaga entara enam ngagai sepuluh buah Palan Gempuru. Iya ngelawa tiap iti Palan Gempuru nya lalu ngelatih bala menyadi ari raban gempuru dia chara nyaga Palan Gempuru sida. Dalam tiga taun sekali, iya deka meresa tiap iti bengunan lalu iya deka nentuka sekalika bisi utai ke enda likun, tauka penanggul ke patut diaduka.

 Bala menyadi beterima kasihka latih ke udah diterima. Indhumathi, siku menyadi indu ba India madahka: “Latih ke diterima kami amat manah. Aku rindu belajar chara nyaga Palan Gempuru ngambika mengkang manah dipeda.” Evans, siku menyadi lelaki ari Kenya, madahka: “Kami belajar, lebuh ngaduka penanggul ti mit sebedau iya nyadi besai, kami ulih bejimat ngena duit.”

 Ungkus ngena enggau nyaga Palan Gempuru enda sama ba tiap iti endur. Kekadang, nya begunaka beratus dolar a dalam setaun, kekadang nya beribu. Nya nitihka dini endur Palan Gempuru, berapa tuai bengunan nya, sereta berapa raban gempuru ke ngena nya. Baka ni semua nya dipelanja?

 Pengawa nyaga Palan Gempuru disukung nengah duit pemeri. Alexander, siku menyadi lelaki ba Kazakhstan, madahka: “Sekeda duit pemeri nya dikena kena mayar internet, bil api enggau ai. Sekeda da agi dikena kena meli utai ke diguna baka tisu jamban, sarung jari, perengka betuchi sereta chat.” Enti bisi laluh duit pemeri, duit nya deka diberi ngagai pengawa serata dunya kena nulung melanja projek ke besai agi sereta mar agi ba serata dunya.

 Kekadang siti Palan Gempuru patut diaduka, tang ungkus projek nya amat besai. Enti ungkus nya lebih ari duit ke biasa dikena ba pengawa nyaga Palan Gempuru dalam dua tauka tiga bulan, bala tuai gempuru patut nanya penemu menyadi ke meri latih ba pengawa nyaga Palan Gempuru. Enti LDC ngemendarka projek nya dipejalaika, biasa iya projek nya deka dipelanja ari duit ke diberi ngagai pengawa serata dunya. Sekumbang taun nginjil 2023, bisi 8,793 iti projek baka tu ke dipejalaika, lalu ungkus udah dikena kira-kira 76.6 juta dolar (kira-kira RM362.5 juta.) Peda dua iti projek tu.

 Siti Palan Gempuru ba Angola, ke udah dikena 15 taun, bisi beberapa iti penanggul. Semua wayar elektrik patut diganti, dinding bisi rekah lalu orang ke diau ngimbai Palan Gempuru madahka, bisi mayuh ai ari Palan Gempuru ke tama dalam rumah sida. LDC ngatur siti projek deka ngadu penanggul tu. Ungkus projek tu 9,285 dolar (kira-kira RM43,940.) Orang ke diau ngimbai Palan Gempuru amat beterima kasih sereta alit ati enggau chara pengawa nya digaga.

 Ba siti Palan Gempuru di Poland, atap nya buchur lalu karpet amat jai nyentukka iya enda ulih diaduka baru. LDC meri pemendar ngerepair atap nya lalu nentuka iya enda masuk ai, sereta nganti karpet nya. Ungkus projek tu 9,757 dolar (kira-kira RM46,170.) Asil iya, Palan Gempuru tu agi manah, lalu bala menyadi enda ibuh nyeruri bengunan tu dalam beberapa taun.

 Pengawa nyaga Palan Gempuru ukai semina ngelimat duit ke dikena, tang tu mega ulih ngemuliaka Jehovah. Shaun, siku menyadi lelaki ba Tonga, madahka: “Ketegal kami udah nyaga Palan Gempuru, kami ulih nyembah Jehovah ba Palan Gempuru ti beresi, teratur, manah sereta ulih ngemuliaka nama Jehovah ba komuniti kami. Kami enda malu mai orang ngagai Palan Gempuru kami.”

 Semua kitai ulih nulung meresi sereta nyaga endur nyembah Petara. Marino, siku menyadi ke ngelatih orang bukai nyaga Palan Gempuru sida ba Australia madahka: “Semua kitai ulih enggau nyaga Palan Gempuru kitai. Tu peluang ti chukup manah ke kitai. Lebuh kitai ngereja nya, kitai ulih bejimat ngena duit pemeri lalu nentuka duit pemeri nya dikena ba utai ke beguna agi.”

 Joel, siku menyadi lelaki ari India, rindu nyaga Palan Gempuru iya. Ku iya madahka: “Lebuh gawa begulai enggau menyadi Kristian, aku ulih ngambarka gaya pengidup kitai ba dunya baru.” Nicole, ke disebut tadi, madahka: “Baru-baru tu, aku bisi nulung ngemop lantai seraya menyadi ke bukai ngaduka paip ke buchur ba jamban. Taja pan ukai aku ke ngaduka penanggul nya, tang aku ulih nentuka bala menyadi ulih ngereja nya enggau likun.”

 Enti nuan bisi minat deka nyaga Palan Gempuru nuan, berandau meh enggau tuai gempuru. Kelimpah ari nya, lebuh nuan meri duit pemeri, nuan ukai semina nyukung ba pengawa nyaga Palan Gempuru nuan empu, tang Palan Gempuru ba serata dunya mega. Nuan ulih meri duit pemeri ngagai kutak pemeri ba Palan Gempuru nuan empu, tauka donate.pr418.com. Kami beterima kasihka pengerah jari nuan.