Lebih ari 60 peratus bala penyalin ke gawa penuh jam, gawa ba opis penyalin (RTO), ukai ba pampang opis. Nama pemanah atur tu? Nama perengka ke diguna bala penyalin ngambika ulih gawa ba RTO? Baka ni enggau nalan bala penyalin bisi bekaul enggau pemanah utai ke disalin sida?

 Bala penyalin ke gawa ba RTO, ulih diau ba endur ke mayuh orang ngena jaku sida. Karin, iya nya seiku ari penyalin bansa jaku Low Jerman nerangka, “Berengkah ari kami pindah ke RTO ba Cuauhtémoc, Chihuahua, Mexico, kami suah agi ngena jaku Low Jerman maya nginjil, maya meli barang, sereta maya bejaku enggau bala penyalin ke bukai. Semua orang ke ngelingi kami ngena jaku nya. Kami ulih tedingaka jaku ti lama udah enda dikena, lalu kami pan ulih nemu agi, ni bagi jaku ke dikena mayuh orang.”

 James, ke gawa ba raban ke nyalin jaku Fraftra di Ghana. Iya ngaku, kekadang lelengau ga iya ka begulai enggau bala menyadi ke ba pampang opis. Tang iya madah baru, “Aku rindu amat gawa ba RTO. Aku ulih ngena jaku orang ditu empu maya nginjil, lalu tu negu ati aku, maya aku meda chara sida nerima Berita Manah.”

 Baka ni bala menyadi nentuka nalan sida ka nirika RTO? Joseph, gawa ba begian Opis Ngaga Pelan/Nirika Bengunan ba Serata Dunya Warwick, New Work ba Amerika Serikat madahka, “Siti ari penanggul iya, sekeda endur bisi penanggul bulih ai tauka karan. Bisi mega penanggul internet, lalu enda ulih nerima pail ke patut disalin. Nya alai, maya merambu ka nirika RTO, kami patut berundingka lebih ari siti nalan, alai bansa jaku nya dikena.”

 Suah iya, chara ti pemadu senang sereta enda besai ungkus nya, nirika RTO ba Palan Gempuru, Palan Gempuru Besai tauka rumah pengerintis seberai tasik. Bala penyalin ulih berundang gawa. Enti sema chara nya enda ngena, bala menyadi patut minta pemendar meli apartment enggau opis, ngambika bala penyalin ulih diau sereta gawa dia. Enti bisi ubah ba raban penyalin, apartment enggau opis nya ulih dijual, lalu duit nya ulih dikena ba utai bukai ke beguna.

 Ba taun nginjil 2020, 13 juta dolar Amerika dikena nyukung semua RTO. Sida ke gawa ba RTO begunaka komputer, software ke ngena, perengka kena ngerikut audio, line internet, sereta semua utai bukai ke bekaul enggau pengawa sida. Chunto iya, dalam urung 750 dolar Amerika dikena masang komputer ngagai seiku aja penyalin. Tiap iti komputer nya ngembuan software ke ngena sereta program ke dikumbai Sistem Terjemahan Watchtower. Pogram tu nulung bala penyalin ngatur kereja sida, lalu ngenyenangka sida ngaga pansik.

 Bala penyalin mega ulih nerima semua perengka audio ngambika sida ulih ngerikut ba opis diri empu. Semua perengka tu amat beguna, kelebih agi musin penyakit berampit COVID-19 ke benung balat nyadi. Nyadi, bala penyalin ulih mai perengka nya pulai, lalu agi ulih terus ngerikut litaricha sereta video ke udah disalin.

 Bala sukarela ba endur nya empu, seruran bekerejasama meri tulung, nyadi pemacha ke litaricha ti udah disalin, enggau nyaga utai ke diguna ba RTO. Cirstin, ke gawa ba RTO Afrikaans di Cape Town, Afrika Selatan madah, “Mayuh bala penginjil sereta pengerintis tetap bepeluang nulung ditu.”

 Bala sukarela gaga ati ulih nulung ba RTO. Seiku menyadi indu ke nulung ba RTO madahka, iya berasai nyamai ulih nulung dia. Sekeda menyadi ba endur nya pan meri bantu, iya nya ngemendarka nyawa sida dikena ba rikuding. Juana, seiku ari penyalin bansa jaku Totonac di Veracruz, Mexico madahka, “Ketegal kami ba endur ke ngena bansa jaku kami empu, senang agi ke bala menyadi ditu ngaga rikuding ke audio enggau video.”

 Tang, kati chara nyalin ba RTO nya mansang manah? Mayuh ari pemacha kami madahka, “Au!” Cédric, ke gawa ba raban penyalin bansa jaku Congo di Republik Congo madah, “Suba, sekeda menyadi madahka, litaricha kami disalin ngagai ‘bansa jaku Kongo stail Watch Tower,’ laban leka jaku ke disalin dia enda teleba dikena. Tang diatu, sida madahka, litaricha kami udah ngena bansa jaku Kongo ke moden, iya nya jaku ke dikena ninting hari.”

 Andile, ke gawa ba begian nyalin jaku Xhosa pan ningaka jaku ti sama ba Afrika Selatan. Ku iya, “Mayuh orang madahka kami sida ulih meda mayuh ubah ba salin ke digaga. Indah bala anak mit ke kala ngena jaku Inggeris suba, diatu sida ngena jaku Xhosa maya macha Menara Jaga. Sida rinduka Salin Dunya Baru ke udah diaduka, laban salin nya senang faham.”

 Semua ungkus ke dikena nirika sereta nyaga RTO disukung bala sukarela ke gerah ati, lalu nyukung pengawa gerempung Jehovah ba serata dunya. Semua pemeri tu diberi nengah donate.pr418.com.