Petara Jehovah deka semua orang, enda ngira situasi sida, nemu pasal Iya sereta Perintah Iya. (1 Timoti 2:3, 4) Ketegal tu, Saksi-Saksi Jehovah ngeluarka Bup Kudus sereta perengka kena belajar ngagai mayuh orang nyengkaum sida ke bengal. Iya ke amat, gerempung kitai udah ngeluarka beribu-ribu iti litaricha dalam video bansa jaku bengal-bisu, a lalu nya udah disediaka lebih ari 100 iti bansa jaku bengal-bisu! Baka ni kitai ngasilka sereta nyadung litaricha tu? Lalu nama pemansang ke udah digaga kitai ngelama tu?

 Litaricha bansa jaku bengal-bisu digaga tim penyalin ba serata dunya. Tiap iku orang ba tim sida bejimat mansik litaricha ke deka disalin sida. Udah nya, sida mutuska ni chara ti pemadu manah kena madahka penerang ba bansa jaku nya. Pengudah semua utai nya tembu, sida ngerikut litaricha nya ba video. Baru-baru tu 60 iti tim enggau tetap nyalin perengka kena belajar dalam bansa jaku bengal-bisu, lalu 40 iti tim ke bukai mega ngereja pengawa tu secara enda tetap.

 Suba, pengawa ngasilka video bansa jaku bengal-bisu begunaka ungkus ti mayuh, laban rega kamera enggau perengka ke bukai mar agi ari kemayaharitu. Pia mega, semua video tu dirikut ba studio. Nyadi, kami patut ngaga studio kediri empu lalu kekadang nyeruri bengunan ke udah bisi. Semua ungkus tu, penyampau $30,000 b kena nyediaka utai ke diguna tim penyalin.

 Ngambika ngena duit pemeri enggau manah, gerempung kitai bebendar ngemansangka sereta ngenyenangka agi proses nyalin tu. Nya alai kami ngena perengka ke moden ke enda kelalu mar sereta agi manah. Ari ke ngena studio, tim penyalin masang lata belakang ke bewarna ijau ke dikumbai skrin ijau, lalu ngerikut semua video nya ba opis sida. Lebuh video nya begunaka beberapa iku orang ke nyalin bansa jaku nya dalam video, sida ulih ngerikut begian sida ba opis tauka ba rumah. Sida enda ibuh datai ke studio.

 Kami mega nyediaka software kena nulung orang ke nyalin bansa jaku nya. Asil iya, tim penyalin ulih ngeluarka litaricha bansa jaku bengal-bisu kurang agi jam ari ke diguna sida sebedau tu. Bala menyadi amat beterima kasih ke pemansang tu. Siku menyadi ke benama Alexander madah: “Video bansa jaku bengal-bisu udah dikeluarka mayuh agi ari suba. Aku amat gaga ati lalu ninting hari aku meda video nya.”

 Kemayaharitu, penyampau duit kena nyediaka utai ke diguna tim penyalin nya kurang agi ari $5,000. Ketegal tu, kami ulih ngasilka video bansa jaku bengal-bisu dalam mayuh bansa jaku.

 Pengudah tim tembu ngerikut litaricha bansa jaku bengal-bisu, video nya patut dianjung ngagai orang ke begunaka nya. Suba kami ngeluarka videokiset enggau DVD tang tu amat mar, begunaka mayuh awak sereta pengawa. Lalu utai ke dirikut dianjung ngagai kompeni lalu sida ngaga videokiset enggau DVD. Udah nya videokiset enggau DVD dianjung ngagai raban gempuru. Ba taun 2013 aja, kami udah ngena $2,000,000 kena ngasilka DVD bansa jaku bengal-bisu.

 Orang ke bengal amat beterima kasihka pengawa tu. Taja pia, video tu enda senang dikena, kelebih agi penyampau kiset enggau DVD nya majak mayuh. Ba sekeda kes, kena ngerikut siti bup mit ari Bup Kudus begunaka beberapa iti DVD. Siku menyadi ba Brasil benama Gilnei ngenang baru: “Lebuh kami deka macha siti ayat Bup Kudus kami patut ngiga ni videokiset ke betul, lalu ngiga ayat nya. Tu amat tusah.” Ku siku menyadi ke benama Rafayane ke ngena DVD bansa jaku bengal-bisu madah: “Lebuh belajarka Bup Kudus kediri empu, kami begunaka mayuh jam kena ngiga pansik enggau ayat Bup Kudus. Tu ngasuh kami amat lelak.” Lalu lebuh bala menyadi nginjil, sida suah mai DVD tauka videokiset lalu mainka nya ba TV sida ke bisi minat. Indah sekeda bala menyadi mai perengka kena mainka DVD nya lalu bala menyadi mega ngena perengka ke bisi skrin enggau DVD. Bobby ke diau ba Amerika Serikat madah: “Pengudah bekunsika siti ayat Bup Kudus, lalu enti nuan deka bekunsika siti agi ayat ngagai sida, nuan patut nukar ngagai DVD ke bukai. Tu begunaka awak, lalu tu ngasuh nuan tusah ngena Bup Kudus maya berandau.”

 Kena taun 2013, gerempung Jehovah ngeluarka aplikasi JW Library Sign Language alai bala menyadi ulih download enggau mainka video bansa jaku bengal-bisu ba talipun tauka tablet sida. Keterubah, aplikasi tu dikeluarka dalam bansa jaku bengal-bisu Amerika. Udah nya, kena taun 2017, aplikasi tu dikemaskini kena nyediaka semua bansa jaku bengal-bisu. Bala menyadi ba serata dunya amat gaga ati. Juscelino, siku menyadi ba Brasil madah: “Aku tusah pechayaka tu! Aku terus berundingka pengerindu Raban ti Ngiring ngagai kami ke bengal, lalu sida deka kami mansang ba pemendar baka sida ke ngena bansa jaku ke bukai. Aku amat gagit ati lalu aplikasi tu meransang aku belajarka Bup Kudus enggau mayuh agi.”

 Kemayaharitu, kami ngeluarka video semua bansa jaku bengal-bisu dalam format digital lalu nyadung video nya ba laman web kitai sereta aplikasi JW Library Sign Language. Asil iya, litaricha bansa jaku bengal-bisu ulih disalin, dirikut sereta disadung dalam beberapa hari aja, ukai beberapa bulan taun betaun. Iya ke amat, mayuh litaricha dalam bansa jaku bengal-bisu dikeluarka ba maya ti sama enggau bansa jaku bukai.

 Peratika asai ati ke dipadah bala menyadi kitai ke bengal. Siku menyadi indu ke benama Klízia madah: “Kati bisi gerempung ke ibuhka orang ke bengal lalu nyediaka utai ke negapka pengarap sida, ngambika sida senang nerima nya? Nadai gerempung ba dunya ulih dibandingka enggau gerempung Jehovah.” Ku Vladimir: “Semua video tu nunjukka Jehovah ibuhka orang ke bengal baka Iya ke ibuhka orang ke ulih ninga.”

 Video kitai dalam bansa jaku bengal-bisu suah madahka tu: “Litaricha tu disedia kena belajarka Bup Kudus di serata dunya, disukung ari pemeri nitihka peneka ati diri.” Kami amat beterima kasih ke pemeri kita ke suah diberi nengah donate.pr418.com. Pemeri tu nulung kami ngeluarka Bup Kudus sereta perengka kena belajar ngagai semua orang, nyengkaum orang ke ngena bansa jaku bengal-bisu.