Bup Kudus madahka, ba jeman kitai deka bisi perang, tanah berenyang, penyakit berampit, lalu “orang deka meda utai ti ngenakutka.” (Luke 21:10, 11) Jaku benabi tu benung dikeamatka sepemanjai taun nginjil 2022. a Ambika chunto, perang ba Ukraine ke enda ngetu-ngetu udah meri kesan ngagai bejuta iku orang. Mayuh menua agi benung napi penanggul ketegal COVID-19. Nambahka nya, mayuh orang kena bencana alam, ngambika chunto baka tanah berenyang ba Haiti sereta kabut ti balat ba Amerika Tengah, Pilipina enggau tenggara Afrika. Baka ni Saksi Jehovah nulung sida ke ditinggang penusah tu?

 Sekumbang taun nginjil 2022, gerempung kitai udah meri bantu ngagai sida ke ditinggang kira-kira 200 iti bengkah bencana alam! Kitai udah ngena nyauka 12 juta dolar ba pengawa meri bantu. b Peratika baka ni chara duit pemeri dikena kena nulung orang ke ditinggang dua iti bencana alam.

 Kena 14 Ogos 2021, tanah berenyang enggau pemalat 7.2 magnitut mangka selatan Haiti. Sayau amat, tiga iku bala menyadi kitai udah bebadi, iya nya dua iku menyadi indu lalu siku menyadi lelaki kitai. Sida ke selamat ari tanah berenyang nya agi merinsa ari segi fisikal enggau emosi. Siku menyadi ke benama Stephane madahka: “Ba nengeri kami mayuh orang bebadi. Pengawa ngintu pemati dipejalaika ninting minggu dalam lebih ari dua bulan.” Siku da agi menyadi lelaki, Éliézer, madahka: “Mayuh bala menyadi nadai endur diau, nadai gari, nadai kasut lalu nadai utai bukai ke diguna sida. Bebulan udah nya, mayuh orang berasai trauma laban tanah berenyang agi nyadi.”

 Gerempung kitai meri bantu enggau jampat. Pampang Opis Haiti udah nyediaka lebih ari 53 tan pemakai, pia mega langkau kain, kimis, tilam sereta cas talipun ke bisi tenaga solar kena ngecas talipun sida. Kelimpah ari nya, sepemanjai taun nginjil 2022, lebih ari 100 buah rumah udah didirika baru tauka diaduka baru. Lebih ari sejuta dolar ke udah dikena ba pengawa meri bantu tu.

 Bala menyadi kitai amat beterima kasih. Lorette madahka: “Rumah enggau bisnis kami abis dirusak ketegal tanah berenyang. Kami nadai utai diempa. Tang gerempung Jehovah nulung kami lalu meri semua utai ke dipegunaka kami.” Micheline madahka: “Tanah berenyang udah ngerusak langkau kami alai aku enggau dua iku anak lelaki aku diau. Aku enda nemu nama utai ke ulih dikereja kelimpah ari besampi. Lalu Jehovah meri saut nengah gerempung Iya. Diatu kami bisi rumah ti tegap alai kami diau. Aku keran deka ngayanka diri beterima kasih ngagai Jehovah.”

 Piak ti bekuasa mega bisi beratika pengawa kitai. Siku ketuai Daerah L’Asile madahka: “Aku muji kita laban kita datai nulung enggau jampat sereta nunjukka basa ti besai ngagai piak ti bekuasa. Aku gaga ati meda kita enda kiruh pasal duit, lalu keran deka nulung orang bukai. Pengawa kita diperansang ketegal pengerindu.”

 Kena 24 Januari 2022, Ribut Ana mangka Mozambique lalu nuju ngagai Malawi, tunga ke barat. Ribut nya mai ujan bangat sereta angin ti kuat enggau penyampat 100 kilometer sejam. Iya mega ngerusakka tiang karan, jematan, sereta ngujungka bah besai nyadi.

 Ribut nya meri kesan ngagai lebih ari 30,000 iku Saksi ba Malawi enggau Mozambique. Charles, siku menyadi ke nulung ba pengawa meri bantu madahka: “Lebuh aku meda bala menyadi merinsa sereta lenyau mayuh utai, aku berasai balat tusah ati.” Situasi sida amat enda manah laban pemakai enggau utai ke ditanam sida abis dianyut ai bah. Mayuh lenyau rumah sida. Siku menyadi udah lenyau bini iya enggau dua iku anak indu ke agi biak laban sida lemas lebuh bot penyelamat sida lungkup.

 Ribut nya balat ngenakutka. Ba Nchalo, Malawi, kena pukul 1 pagi, sida Sengeredo sebilik ninga bunyi rarat ai lalu balat takut. Dua iti sungai udah niki lalu deka ngampuhka endur sida! Menyadi Sengeredo mutuska sida deka ninggalka rumah nya. Nya pemutus ke manah laban enda lama pengudah nya, rumah sida runtuh laban bah. Semua utai ke dikemisi sida abis dirusak tauka dianyut bah. Sida mutuska deka ngagai Palan Gempuru. Biasa iya, pejalai tu ngambi awak 30 minit ari rumah sida. Tang maya nya sida bejalai pengelama 2 jam. Sida datai enggau jempuk, tang selamat.

 Pampang Opis Malawi enggau Mozambique jampat ngatur pengawa meri bantu. Sida ngasuh bala tuai ti ngabas enggau tuai gempuru meda gaya bala menyadi ke ditinggang ribut kena nemu utai ke diguna sida sereta meransang sida. Beberapa iti Komiti Tulung Bencana Alam (DRC) ditumbuhka kena ngemataka pengawa meri bantu, lalu komiti tu berengkah nulung bala menyadi kitai ngulihka pemakai enggau utai bukai ke diguna sida. Lebih ari 33,000 dolar udah dikena nulung orang, lalu lebih ari 300,000 dolar udah dikena nyeruri enggau nirika rumah.

 DRC udah ngena duit belanja enggau bejimat. Utai tu amat penting laban rega barang majak niki. Ngambika chunto, dalam tujuh bulan meri bantu, rega tepung jagung niki enggau 70 peratus ba Malawi. Rega minyak mega niki. Kena ngelimat duit belanja, bala menyadi meli pemakai enggau perengka kena nirika bengunan enggau mayuh ba endur ke semak. Enggau nya, sida bulih utai ke murah agi sereta ulih nyeliahka ari masau duit ngangkutka barang nya.

 Pengawa meri bantu negu ati bala menyadi kitai. Felisberto, siku menyadi ari Mozambique, madahka: “Aku enda kala meda gerempung ke meri mayuh utai baka perengka kena nirika bengunan, perengka pengangkut, bala sukarela nirika bengunan, pemakai sereta meri iring ti ngayanka pengerindu. Pengawa meri bantu nya chunto ti nyulut pengerindu ke diterangka Jesus baka ke dipadah ba John 13:34, 35.” Ester, siku indu ke balu ba Malawi ke udah lenyau rumah iya madahka: “Aku berasai nadai daya laban nadai duit kena nirika rumah baru. Lebuh bala menyadi datai sereta nirika rumah ke aku, aku ngasaika diri udah ba Paradais.”

 Seraya kitai deka semak enggau dunya baru, kitai nyangka deka meda mayuh bencana alam. (Matthew 24:7, 8) Taja pia, ketegal duit pemeri ke diberi kita enggau gerah jari, kami pechaya bala nembiak Jehovah deka bulih bantu ke diguna sida. Kena nemu chara meri duit pemeri, peda ba donate.pr418.com. Terima kasih ke pengerah jari kita.