Bup Kudus madahka “bansa siti deka beperang ngelaban bansa siti” lalu mayuh bencana alam deka bisi ba “pengujung dunya tu.” (Matthew 24:3, 7) Kitai udah meda jaku benabi tu dikeamatka sekumbang taun nginjil 2023. a Taja pan perang enggau bencana alam udah mayuh nyadi dalam nyauka 100 iti menua, tang Saksi-Saksi Jehovah agi ngayanka pengerindu Jehovah. Baka ni?

 Sekumbang taun nginjil 2023, mayuh bala menyadi kitai udah ditinggang lebih 200 iti penusah ketegal penyarut ke datai ari mensia tauka bencana alam. Ketegal tu, Saksi-Saksi Jehovah udah ngena lebih ari sepuluh juta dolar b (kira-kira RM47.6 juta) ari duit pemeri ke diberi ngagai pengawa kami di serata dunya kena meri bantu maya penusah. Tu empai agi nyengkaum duit ke dikena bala menyadi ke diau semak kena nulung pangan diri. Peda dua iti bencana alam sereta baka ni duit pemeri ke udah diberi nuan udah nulung bala menyadi ke ditinggang penusah nya.

 Sekeda endur ba Nigeria selalu ampuh maya musin banjir. Taja pia, kena Oktober 2022 bisi bah ti pemadu balat ari ke sepuluh taun ti udah. Lebih ari 676,000 hektar (1,670,432 ikar) tanah endur orang bumai dirusak. Tu sama enggau sais lebih ari 946,000 padang bul. Lalu lebih ari dua juta iku orang patut rari ari rumah sida. Pampang Opis Nigeria jejampat ngiga Komiti Tulung Bencana Alam kena ngatur pengawa meri bantu sereta nulung bala menyadi ari segi pengarap.

•   7,505 iku penginjil dipindahka ari rumah sida

•   860 buah rumah rusak mimit tauka abis rusak

•   90 buah Palan Gempuru enggau sebuah Palan Gempuru Besai ampuh

 Lebih ari $250,000 (kira-kira RM1.19 juta) dikena ba pengawa meri bantu, ti nyengkaum:

•   Pemakai nyengkaum beras, kacang enggau mee

•   Perengka rumah nyengkaum tilam enggau jaring nyamuk

•   Pengawa nyeruri tauka nirika baru rumah ke dirusak

 Baka ni bala menyadi nentuka duit pemeri kitai dikena enggau manah? Siti chara nya enggau bejimat lebuh meresa tiap iti bengunan, sekalika iya ulih diaduka tauka enda. Enti bengunan nya patut didirika baru, sida deka nirika nya enggau chara ke mudah sereta gaya ke biasa ba endur nya.

 Bala menyadi ke nerima bantu amat beterima kasih. Siku menyadi ke indu madahka: “Ketegal bah bisi ba endur kami, ladang kami abis rusak sereta kami nadai endur diau. Semua utai nyadi charut. Lebuh bala menyadi datai maya nya kena nulung kami sereta nyediaka endur kami diau, kami berasai lantang. Kami berasai lantang agi ati lebuh nerima pemakai ari pampang opis. Kami amat alit ati lebuh meda John 13:34, 35 nyadi ba pengidup kami. . . . Pengerindu ti bendar amat bisi. Ari lubuk ati kami, semua kami sebilik ka meri terima kasih ngagai bala menyadi ke datai meri bantu ba maya kami amat begunaka nya.”

 Orang bukai ba endur nya beratika pengawa kami. Siku tuai kampung ba Sabagreia, Bayelsa, madahka: “Bisi mayuh gerempung tauka gerija ba dunya tu, tang semina Saksi-Saksi Jehovah aja ke ngereja pengawa baka tu. . . . Gerempung [kita] entara gerempung ti pemadu manah ba serata dunya.”

 Dalam bulan Februari 2023, lebih ari 400 kes utan angus mai pengerusak ba Chile. Lebih ari 430,000 hektar (1,062,553 ikar) tanah dirusak, nyengkaum infrastruktur awam ti penting ba menua Chile. Tu sama enggau sais 602,000 iti padang bul. Kira-kira 8,000 iku orang rari ari rumah sida. Sepengudah penusah tu nyadi, pampang opis terus ngatur pengawa meri bantu.

•   222 iku penginjil dipindahka ari rumah sida

•   20 buah rumah dirusak abis

 Lebih ari $200,000 (kira-kira RM952,000) dikena ba pengawa meri bantu, ti nyengkaum:

•   Pemakai enggau ai

•   Minyak kerita, perengka kena meresi sereta ubat

•   Pengawa nirika baru rumah ke dirusak

 Siti ruang bilik amat tekenyit lebuh nemu semua utai dikemisi sida abis rusak nyengkaum rumah enggau bisnis sida. Ketegal tu sida enda ulih kereja. Dalam beberapa hari ti keterubah, sida sebilik balat tusah ati tiap kali meda tanah rumah sida suba. Tang lebuh sida meda rumah sida didirika baru, sida belubah-lubah berasai lantang baru. Pengerindu enggau penyayau ke diayanka bala menyadi ke datai meri bantu nulung sida tan natka penusah tu. Pengalaman tu negu ati sida sebilik, lalu sida diperansang nulung bala menyadi nirika baru rumah ke siku menyadi bukai.

 Mayuh bala menyadi alit ati meda pengawa meri bantu. Siku menyadi lelaki madahka: “Atur Komiti Tulung Bencana Alam, ke datai ari Jehovah, amat ngalitka ati. Sehari pengudah penusah tu nyadi, sida udah datai ngemai utai ke diguna. Nya amat meransang lebuh macha pasal pengawa meri bantu ba menua bukai. Tang nya amat bebida lebuh utai nya nyadi ba nuan empu. Nuan deka beterima kasih agi ke gerempung kitai sereta bala menyadi ke neladan sifat Jehovah. Nuan mega ulih nemu bala menyadi amat ibuhka pasal utai ke diguna nuan ngambika ulih beridup, nyaga pengerai, mengkang kering ba pengarap sereta mengkang positif ba runding. Kami ulih meda pengerindu Jehovah enggau mata kami empu.”

 Makin semak pengujung dunya, makin mayuh penusah deka nyadi. (Luke 21:10, 11) Taja pia, Raja kitai ti penuh pengerindu, Jesus Kristus, ngena gerempung tu kena nunjukka iya bisi enggau kitai “nyentuk ngagai pengujung dunya.” (Matthew 28:20) Lebuh nuan meri duit pemeri enggau gerah jari ngagai pengawa ba serata dunya, enda ngira nengah donate.pr418.com tauka ngena chara bukai, nuan nunjukka diri nyukung Perintah Petara enggau Raja kitai. Pia mega lebuh nuan meri awak enggau pengering ba pengawa baka tu. Terima kasih ke pengerah jari nuan.