Ba January 2021, Raban ti Ngiring ngeluarka siti perengka baru kena belajarka Bup Kudus, iya nya, Idup enggau Lantang Belama Iya! a Nama asai ati nuan maya nuan ningaka jaku gerah nya? Matthew ari Kanada madahka: “Aku amat gagit ati! Pengagit aku majak nambah seraya ningaka cheramah enggau video ke nerangka kebuah litaricha nya digaga sereta baka ni nya udah dulu diuji ba menua bukai. Aku enda sabar deka meda sereta berengkah ngena nya.”

 Enggau bup Idup enggau Lantang Belama Iya! kitai bisi chara ti baru kena belajarka Bup Kudus enggau orang bukai. Taja pia, ukai nya aja bida entara bup baru enggau bup ke lama. Enti nuan ngena bup Idup enggau Lantang Belama Iya! edisi ke dichelak, nuan engka ngasaika keretas nya enda sama enggau bup bukai. Kena nemu mayuh agi, aram kitai meda baka ni bup nya digaga.

 Keretas ti tebal agi. Nama kebuah begunaka keretas ti tebal? Idup enggau Lantang Belama Iya! bisi lebih ari 600 gambar ti mayuh chura, nyauka sepuluh kali gandar lebih agi ari bup Ajar Kitai! Enti keretas nya nipis, gambar ke dichelak ba belakang lambar nya ulih dipeda mimit. Kena mutarka penanggul tu, bala menyadi ba Begian Nyelak Entarabansa (IPD), ba Wallkill, New York, Amerika Serikat, udah nguji empat bansa keretas ke udah dikena ba kilang nyelak kitai. Komiti Pengawa Nulis ari Raban ti Ngiring meresa tiap iti bansa keretas lalu milih keretas ti pemadu tebal. Taja pan rega keretas tu 16 peratus mayuh agi ari keretas ke suah dikena ba litaricha kitai, orang ke belajarka bup Idup enggau Lantang Belama Iya! ulih macha tiap iti lambar enggau senang sereta enda dilimpangka ketegal gambar ba belakang lambar nya.

 Kulit bup ti unik. Kulit bup baru tu enda sama enggau kulit bup ke bukai, laban nya bisi lapis ke ngelindung iya. Kulit nya enda lichin. Nya ngasuh gambar ba mua bup lebih cantik. Lapis nya mega nulung ngelindung bup ari nyadi jai laban suah dikena. Taja pia, ungkus bansa kulit tu lima kali mayuh agi ari bansa kulit ke lichin. Nyadi, sekeda pampang opis bekerejasama kena ngulihka nya enggau rega ti murah agi.

 Nama kebuah sida deka ngena keretas ti mar agi? Siku menyadi ke bekerejasama enggau begian IPD nerangka: “Kami deka nentuka bup nya manah dipeda taja pan suah dikena.” Eduardo, ke gawa ba Opis Penyelak ba pampang opis Brasil madahka: “Kami amat gaga ati ulih meda baka ni gerempung Jehovah udah ngena perengka ti bekualiti ngambika bup tu manah dipeda, ulih tan lama sereta senang dikena, lalu ba maya ti sama bejimat ngena duit pemeri.”

 Kami berengkah nyelak bup Idup enggau Lantang Belama Iya! ba Mac 2021. Maya nya bisi sekeda penanggul ketegal pandemik COVID-19. Ketegal Betel lockdown, bala pekereja Betel ke ulang-alik enda ulih nulung ba kilang nyelak lalu nadai menyadi ke ulih nyadi pekereja Betel penuh jam ke baru. Asil iya, sekeda kilang nyelak enda chukup pekereja, lalu kilang ke bukai mega patut ditutup ketegal sekat ari perintah.

 Baka ni penanggul tu diaduka? Maya dikemendarka nyelak baru, bala pekereja Betel ari begian bukai mega sementara datai nulung nyelak. Joel ke gawa ba IPD madahka: “Pengeran sereta pengeransing sida deka belajarka pengawa baru udah nulung nembuka pengawa ke patut dikereja.”

 Taja pan bisi mayuh penanggul, kami udah bisi bejuta iti bup Idup enggau Lantang Belama Iya! ke udah dichelak. Kena nyelak, kami begunaka mayuh utai, baka perengka kena nyelak, keretas, lapis ke ngelindung iya, ink, enggau gam. Dalam lima bulan ti keterubah, lebih ari $2.3 juta (U.S.) udah dikena kena nyelak aja. Kena ngelimat duit, kami semina nyelak penyampau bup ke diguna ba tiap iti eklisia aja.

 Nama asai ati pengajar Bup Kudus enggau pemelajar sida pasal perengka belajarka Bup Kudus ti baru tu? Paul, siku menyadi ari Australia madahka: “Bup Idup enggau Lantang Belama Iya! amat ngerinduka ati. Aku enda sabar ka ngena bup tu lebuh ngajar orang bukai. Bup tu ditusun enggau manah sereta meransang pengajar enggau pemelajar berandau enggau pangan diri. Bup nya mega ngembuan penerang ti terang, tanya ti ulih nyapai ati, video, gambar, charta sereta juluk ati ke pemelajar. Bup ti amat unik tu meransang aku ngemansangka chara aku ngajar.”

 Siku pemelajar Bup Kudus ari Amerika Serikat madahka: “Aku amat rinduka bup baru tu. Gambar ba bup tu nulung aku meretika batang ajar. Video negu ati aku sereta meransang aku ngaga ubah.” Pemelajar tu belajar dua kali seminggu sereta bejarit datai ke gempuru.

 Kitai agi nganti bejuta iti bup Idup enggau Lantang Belama Iya! dichelak dalam mayuh bansa jaku ba ila. Naka ke diatu, Raban ti Ngiring udah ngemendarka bup tu disalin ngagai 710 iti bansa jaku—340 mayuh agi enti dibanding enggau bup Ajar Kitai!

 Baka ni ungkus nyelak dipelanja? Tu duit pemeri nuan ngagai pengawa serata dunya ke digaga nengah donate.pr418.com. Kami beterima kasihka pengerah jari nuan ke nulung kami nyediaka perengka kena ngajar Bup Kudus ngagai sida ke deka belajar pasal Jehovah sereta deka idup enggau lantang belama iya.—Masmur 22:26.