Lebih ari 130 taun, bala Saksi Jehovah begulai ba konvensyen ninting taun. Program tu nyengkaum lebih ari 40 iti cheramah ke enda sama sereta musik, interbiu enggau video. Ngambika program nya meri penguntung sereta meransang sida ke datai, iya mesti terang “didinga sereta dipeda.” (Luke 2:20) Baka ni duit pemeri nuan udah dikena ngambika semua orang tau bulih penguntung ari konvensyen, enda ngira dini endur sida diau?

 Perengka audio/video endang udah bisi ba mayuh stadium di menua Barat. Lebuh kitai nyua stadium baka tu, nama kebuah kitai masang perengka diri empu? David, ke gawa ba Begian Penabur Berita ba Indu Opis madahka: “Kesuah iya, tuju stadium ke disua kitai nya digaga, ukai kena orang duduk bejam-jam ningaka jaku pencheramah. Ambika chunto, stadium sukan selalu ngena perengka audio semina ke jaku gerah ti pandak sereta masang musik enda lama aja. Skrin video semina ngayanka markah ba game, iklan enggau ulang tayang aja. Tang kitai dekaka orang ke datai meda video ke panjai agi sereta ningaka enggau meretika tiap leka jaku ke dikenataika ari pentas.”

 Tiap endur konvensyen nya unik. Nya kebuah perengka audio/video patut diijas nitihka gaya endur nya. Pengudah endur konvensyen nya dipilih, Begian Penabur Berita ba pampang opis mutuska dini alai orang deka duduk dalam diwan. Sida beratika penyampau orang ke deka datai sereta ni pemayuh orang ke ulih duduk dalam nya. Bala menyadi lalu ngena matematik kena ngira dini endur sepika enggau skrin video patut dipasang. Sida mega ngaga pelan baka ni deka masang wayar entara sepika enggau srkin nya, lalu ngeliska semua perengka ke diguna, ngambika semua orang ke datai ulih meda sereta ninga program nya.

 Atur audio/video nyadi tusah agi ba konvensyen enti bisi beberapa iti bansa jaku. Enti program nya disalin ngagai bansa jaku bukai, bala penyalin patut meda enggau ningaka program nya. Udah nya, utai ke disalin sida patut ditaburka ba channel radio bukai ngambika sida ke ngena bansa jaku nya ulih ninga. Lebuh video dipandang, kami ngena program komputer ti canggih ke ulih ngayanka video lalu ba maya ti sama, naburka audio nya dalam 8 iti bansa jaku bukai nengah radio tauka sepika. Ku David, “Sistem tu amat tusah lalu bala menyadi patut dilatih enggau manah ngambika nemu chara ngena iya.”

 Mayuh pampang opis meli kediri empu perengka audio/video ngambika ulih dikena ninting taun. Enti pia, bala menyadi ngatur semua perengka nya ngambika ulih diangkut ari endur konvensyen siti ngagai konvensyen siti. Pampang Opis Amerika Serikat aja udah ngena lebih ari 200,000 dolar a (kira-kira RM940,000) ninting taun kena ngangkut perengka ke dikena ba konvensyen. Taja pia, enti ka meli enggau ngerepair mayuh agi perengka, ke enda ibuh diangkut, nya sigi mar agi. Ku Steven, ke ngemataka audio/video ba konvensyen di Kanada madahka, “Tim audio/video kami enggau naka ulih nentuka tiap iti perengka, nyengkaum paku, sekeru enggau pala sekeru sereta tali wayar dikira, dijaga lalu dibungkus enggau manah, ngambika nya ulih dikena ba konvensyen pengudah tu.”

 Nyua perengka audio/video amat mar, lalu perengka tu kesuah iya nadai kualiti sereta enda dijaga enggau manah. Nya kebuah kesuah iya kami meli perengka ke diguna. Ke diatu, ungkus siti skrin video LED ke dikena dalam diwan enggau peninggi 3 meter enggau buka iya 5 meter nya kira-kira 24,000 dolar (kira-kira RM113,000.) Indah siti aja tali mikrofon enggau pemanjai 15 meter, ungkus iya 20 dolar (kira-kira RM94.) Nyadi, Begian Penabur Berita bekerejasama enggau Begian Meli Utai “ngira ungkus utai nya” sebedau sida meli sebarang perengka. (Luke 14:28) Ambika chunto, sida nanya diri empu, ni pemayuh orang bulih penguntung ari perengka tu? Kati meli perengka baru nya chara ti pemadu manah? Kati bisi setor ti sesuai kena nyimpan barang nya, lalu ngambika ulih maintain utai nya, kati kitai bisi chukup perengka sereta menyadi ke dilatih ba pengawa nya?

 Enti perengka audio/video nya tan lama, tu ulih ngelimat belanja. Nya kebuah kami selalu ngerepair perengka nya secara elektronik enggau mekanikal. Kami mega nganjung perengka nya dalam kutak ke kering kena nyaga barang nya ari rusak, lalu indah kutak nya pan direpair enti patut.

 Orang ke ukai Saksi alit ati enggau kualiti audio/video konvensyen kitai. Ambika chunto, ba siti konvensyen, siku orang ke gawa ba siti kompeni penabur berita ti pemadu besai ba dunya madahka diri alit ati enggau kualiti program kitai sereta chara nya dikenataika. Jonathan, ke nulung masang sereta nyaga perengka audio/video ba konvensyen kitai madahka: “Iya amat alit ati lebuh iya nemu bala menyadi kami ukai professional tang bala sukarela aja. Iya madah, ba kompeni iya begunaka lima hari kena masang semua perengka ke dipasang kami dalam sehari setengah aja.” Ba siti agi konvensyen, manager diwan nya madahka: “Bisi mayuh orang ke professional ba bidang video enggau musik ke kala kitu, tang sida enda sepandai enggau seprofessional baka kita!”

 Kala nuan ngasaika penguntung ari sistem audio/video ba konvensyen? Nuan engka baka David, ke diau ba England. Iya madahka: “Umur aku 88 taun, lalu aku udah datai ngagai konvensyen sepemanjai idup aku. Lalu diatu aku senang agi ari suba deka fokus ba program nya. Ketegal bisi video ti manah, program nya asaika baka jampat agi, lalu poin iya terang agi.” Micheal, ke diau ba Nigeria, nyebut, “Ketegal bala menyadi enda agi tusah ningaka pencheramah, tauka tusah meda video, sida ulih fokus agi lalu runding sida enda limpang maya program benung bejalai.”

 Seraya nuan enggau konvensyen pelilih menua sereta konvensyen spesial taun tu ke betajuk “Nusui Berita Manah!”, uji ngetu lalu berunding naka ni pemayuh pengawa ke udah digaga bala menyadi ngambika nuan ulih meda enggau ningaka program enggau manah. Semua utai tu ulih nyadi ketegal duit pemeri ke diberi nuan enggau gerah jari, nyengkaum duit ke diberi nengah donate.pr418.com. Terima kasih.