Raban ti Ngiring keran deka nyediaka bengunan ti nyukung pengawa nginjil kitai. Ambika chunto, sekumbang taun nginjil 2023, kompeni ke direjista gerempung Saksi-Saksi Jehovah nitihka undang-undang, ngena lebih ari 500 juta dolar (kira-kira RM2.3 biliun) kena meli, nirika, nyeruri sereta ngaduka Palan Gempuru enggau Palan Gempuru Besai ba serata dunya. a Penyampau duit tu bedau agi nyengkaum duit ke dikena raban gempuru ba serata dunya kena nyaga Palan Gempuru sida.

 Kelimpah ari nya, duit pemeri mega dikena nirika sereta nyaga bengunan pampang opis ti ngatur sereta nyukung pengawa nginjil ba serata dunya. Kami udah ngubah sekeda atur ba pampang opis ngambika ulih bejimat belanja lalu ngena mayuh agi duit pemeri kena nyeruri sereta nirika Palan Gempuru enggau Palan Gempuru besai. Taja pia, pengawa nyeruri, ngaduka tauka mindahka pampang opis agi begunaka mayuh duit. Nama kebuah projek tu penting? Baka ni pampang opis nyukung pengawa nginjil? Aram ngiga saut iya.

 Mayuh bengunan pampang opis udah dikena lebih ari 30 tauka 40 taun! Nicholas, ke gawa ba Opis Ngaga Pelan/Nirika Bengunan ba Serata Dunya, madah: “Taja pan sesiti bengunan dijaga enggau manah, tang nyau kelama mega iya deka belubah-lubah nyadi jai. Tang enti bengunan nya udah diseruri, iya ulih tan lama agi.”

 Utai ke diguna gerempung sigi seruran berubah, nya alai bengunan pampang opis mega patut berubah. Penyampau penginjil ba serata dunya majak niki kenyau ari mayuh pampang opis didirika. Nyadi ketegal bala penginjil majak mayuh, kitai begunaka mayuh agi sukarela ke gawa ba Bethel. Ketegal tu, bengunan pampang opis ke chukup besai suba diatu nyau enda chukup!

 Kitai mega patut berundingka pengelikun. Ketegal kitai diau ba hari ti penudi, kitai deka napi mayuh macham bencana alam ke ulih nganu nyawa. (Luke 21:11) Enti kitai ngena chara ti baru kena nyeruri bengunan, kitai ulih nentuka bengunan nya likun ngagai sida ke gawa ba dia. Pia mega, bengunan ke tegap tu ulih nyadi endur alai ngatur pengawa meri bantu lebuh bencana alam nyadi sereta ulih nyukung pengawa nginjil.

 Sekumbang taun nginjil 2023, ba baruh iring Raban ti Ngiring, projek nirika bengunan dipejalaika ba 43 bengkah pampang opis, iya nya nyauka setengah ari semua pampang opis ba serata dunya. Aram kitai beratika sekeda chunto ti nunjukka kebuah pengawa nirika bengunan tu penting.

 Angola. Matt, siku ari Komiti Pampang Opis Angola madah: “Kami amat gaga ati ulih meda jaku benabi ba Hagai 2:7 dikeamatka. Dalam sepuluh taun aja, penyampau bala penginjil majak nambah 60 peratus! Kena nyukung bala penginjil ti majak mayuh tu, Kami begunaka tiga kali gandar mayuh agi bala sukarela ke gawa ba Bethel. Tang, ketegal bengunan pampang opis enda chukup besai, nya alai kami enda ulih mai mayuh agi orang gawa ba Bethel baka ke diguna kami. Ketegal nya, mayuh menyadi ke gawa ba Bethel patut megai mayuh agi tanggung pengawa sereta patut ngambi overtime.”

 Sekeda bala menyadi lelaki diasuh berundingka chara kena ngaga pampang opis besai agi. Keterubah iya, sida ngasaika chara ti pemadu jampat sereta senang nya, nyeruri bengunan ke udah bisi. Tang, pengudah sida mansik pasal nya, sida sedar nya ukai chara ti manah ngena duit pemeri. Nyadi, sida madah ngagai Komiti Pampang Opis sida deka meli lalu nyeruri bengunan ke semak enggau bengunan ti lama. Ku Matt nerangka: “Lebuh sida madah ngagai Komiti Pampang Opis pasal pelan sida ke deka meli sereta nyeruri bengunan ke bukai, kami irau sekalika bengunan nya sesuai baka bengunan ke didirika kami empu tauka enda. Tang diatu kami nemu bengunan nya amat ngam ba kami. Jehovah udah merekatka pemutus tu.”

 Ba dudi hari, bengunan pampang opis Angola engka patut dikemesaika agi. Tang ke diatu, sida bisi bengunan baru, pia mega rumah ke senang diubah sereta apartment ke disua enda jauh ari Bethel. Tu ulih nulung sida ke gawa ba pampang opis terus nyukung pengawa nginjil ti majak mansang ba Angola.

 Jepun. Bengunan pampang opis utama udah didirka nyauka 40 taun suba, sereta nadai mayuh diseruri ngelama tu. Taja pan bala menyadi bebendar nyaga bengunan nya, tang biasa nya, bengunan ke baka tu enda ulih terus dikena bepuluh-puluh taun. Nya kebuah projek nyeruri ti amat besai benung dipejalaika ba bengunan tu.

 Gaya pengidup ba Bethel mega udah berubah beberapa taun tu. Ambika chunto, sebedau taun 2015 semua pemakai udah disediaka ngagai semua bala menyadi ke gawa ba Bethel. Nyadi, mayuh bilik ba Bethel Jepun semina bisi dapur ti amat mit aja. Tang diatu, semua bala menyadi ke gawa ba Bethel nyediaka pemakai kediri empu. Nyadi lebuh bengunan Bethel diseruri, bilik alai bala menyadi diau bisi nyengkaum dapur ti chukup besai ngambika sida ulih nyediaka pemakai kediri empu. Kumiko, siku menyadi ke gawa ba pampang opis Jepun madah: “Dapur ti chukup besai tu ngasuh aku selesa agi ba bilik tu, lalu nya nulung aku nyukung atur baru ba Bethel.”

 Pengawa ke digaga ba pampang opis Jepun amat penting kena nyukung pengawa nginjil ba serata dunya. (Matthew 28:19, 20) Pengawa nyelak Bup Kudus enggau penuh semina ulih digaga ba dua iti pampang opis, siti ari nya ba Jepun. Nyadi siti ari utai ke patut digaga lebuh nyeruri pampang opis nya, masang perengka kena ngumpul debu enggau laluh keretas ke udah diputung. Tu ulih nyaga pengelikun enggau pengerai sida ke gawa ba kilang nyelak bup. Ungkus kena meli lalu masang perengka tu nyauka sejuta dolar (kira-kira RM4.7 juta.) Tang enggau tu, pampang opis ulih terus nyelak sereta nganjung litaricha enggau Bup Kudus ke ulih ngeringka pengarap kitai.

 Sepemanjai projek tu, pengawa ngasilka Bup Kudus tetap dipejalaika sereta dikemeratka. Trey, siku ari Komiti Pampang Opis Jepun, madahka: “Lebuh projek tu dipejalaika, gerempung kitai ngeluarka Bup Kudus dalam mayuh bansa jaku lalu majak mayuh Bup Kudus ke patut dichelak. Mayuh begian Bethel enggau orang bukai patut bekerejasama ngambika pengawa masang perengka ti baru sereta pengawa nyelak litaricha ulih diatur enggau manah.” Taja pan bisi mayuh penanggul ke baka tu, entara bulan Mac ngagai bulan Ogos 2023 nyauka 220,000 iti Bup Kudus udah dichelak tiap bulan, lalu tu maya ti amat sibuk dalam projek nyeruri kilang nyelak bup. Semua pengawa tu ulih dikereja enggau mujur lalu enda nambahka ungkus ba projek tu.

 Siti agi pengawa ti penting ba projek tu iya nya, ngelimat tenaga ke dikena. Solar deka dipasang ba bengunan baru tu lalu tu ulih ngurangka kos tenaga kira-kira $120,000 (kira-kira RM566,000) tiap taun. Cheremin kaca ke belapis tiga mega deka dipasang ngambika ulih ngelimatka tenaga ke diguna lalu tu deka ngurangka kos tenaga kira-kira $10,000 (kira-kira RM47,000) ninting taun. Taja pan perengka tu amat mar, tang kitai ulih ngelimat kira-kira 3.5 juta dolar (kira-kira RM16.5 juta) pengelama betaun-taun. Perengka tu mega nadai mai kesan ti negatif ngagai alam sekitar.

 Dua iti projek tu nunjukka mayuh pengawa ke patut digaga ngambika pampang opis ulih terus nyukung pengawa nginjil. Taja pia, pengawa nya bedau tembu. Aaron ke gawa ba Opis Ngaga Pelan/Nirika Bengunan ba Serata Dunya madah: “Bala menyadi udah bebendar ngereja mayuh pengawa, tang agi mayuh pengawa ke patut digaga.” Baka ni pengawa tu ulih tembu? Ku iya nampung: “Kelimpah ari duit pemeri ke diberi enggau gerah jari, kami mega amat beterima kasihka semua bala menyadi ke sanggup nulung suba sereta sida ke benung ngaga pelan ngambika ulih nulung dudi hari. Semua tulung ke diberi bala menyadi ari segi fizikal enggau duit nunjukka berekat ari Jehovah ngagai projek tu.”—Masmur 110:3.

 Semua pengawa nirika sereta nyeruri bengunan tu disukung duit pemeri lalu mayuh pemeri nya diberi nengah donate.pr418.com. Kami amat beterima kasihka pengerah jari kita.