Lebih ari 10 taun, troli litaricha kitai udah nyadi sebagi ari pengawa nginjil kitai. Ba serata dunya, troli tu ngasuh orang nemu pasal kitai. Troli nya ukai semina lawa dipeda tang mega senang dikena. Nuan mega engka setuju enggau Asenata, iya nya siku Menyadi indu ke ari Poland madah, “Troli nya senang dibai sereta enda mayuh utai dilekat. Iya senang dipasang sereta dibai kulu kili.”

 Kati nuan kala berunding baka ni troli nya digaga?

 Kena 2001, pengudah Raban ti Ngiring ngemendarka, bala menyadi ba Perancis berengkah nguji chara ti bebida ba pengawa nginjil ba mua orang mayuh, nyengkaum nginjil ngena troli. Sida nguji beberapa iti chara ti enda sama. Ngambika chunto, sida ngaga bik ke bisi roda enggau troli ke dikena orang bebelika barang nyadika troli litaricha. Ujung iya, pampang opis Perancis ngaga siti gaya troli litaricha ke ulih dikena penginjil betaun-taun.

 Bala menyadi ba Perancis amat gaga ati enggau asil ari nginjil ba mua orang mayuh keterubah kali. Nya alai kena 2011, Raban ti Ngiring ngemendarka pengawa nginjil ba orang mayuh ngena troli, dipejalaika ba bandar New York Amerika Serikat. Pengerintis ke enggau pengawa tu ngasaika nginjil ngena troli mai mayuh penguntung, laban iya senang dibai kulu-kili. Pia mega, bala pengerintis bisi meri cadangan chara ngemanahka agi gamal troli litaricha kitai. Troli keterubah nya digaga ari kayu, lalu iya mimit berat. Nyadi troli tu tusah dibai kini-kini kelebih agi maya nurun niki tangga. Nya alai, sida deka ngaga iya nyadi lempung agi. Tang enda ga kelalu lempung nyentukka iya senang tumbang maya dipuput ribut. Gamal troli ke baru tu ngembuan roda ti besai agi sereta tan agi. Ngambika iya nakal lebuh nujah jalai ke enda rata. Pia mega, troli tu bisi kutak mit ba belakang kena nyimpan laluh litaricha.

 Pengawa ke dipejalaika nya mujur! Kena 2012, Raban ti Ngiring ngemendarka gerempung ba serata dunya berengkah nginjil ngena troli. Udah nya, bala menyadi tetemuka kilang ke ulih ngaga troli tu enggau penyampau ti mayuh enggau gaya ti lempung sereta tan.

 Beberapa taun udah nya, gaya troli nya bisi diubah mimit. Ngambika chunto, kena 2015, iya digaga enggau penutup mua ari depan enggau plastik ti lutsinar. Dina, ke diau ba Georgia amat rinduka gaya ti baru tu. Ku iya madah, “Troli tu bisi ‘baju ujan’ kena ngelindung litaricha.” Kena 2017, poster ke bisi magnet udah disediaka dalam beberapa iti bansa jaku. Tomasz siku menyadi lelaki ari Poland madah, “Poster ke sebedau tu tusah diubah laban iya ukai magnet. Nya alai poster ke baru tu amat manah.” Kena 2019, mayuh agi ubah digaga ngambika troli nya ulih tan lama.

 Siti kilang ngaga sereta nganjung semua troli litaricha tu ngagai raban gempuru ba serata dunya. Baru-baru tu, ungkus siti troli nya $43 U.S (RM192.40), enda nyengkaum kos penghantaran sereta kos ke bukai. Nyentukka diatu, lebih ari $16 million U.S (RM71,592,000) udah dikena ngaga troli litaricha, lalu lebih ari 420,000 udah dianjung ngagai raban gempuru ba serata dunya.

 Ngambika duit pemeri enda dibasau, troli litaricha di-order mayuh dalam sekali. Nambahka nya, raban gempuru ulih order spare part lalu ngerepair troli nya ari ke terus meli ke baru.

 Penginjil ba serata dunya rindu nginjil ngena troli litaricha. Martina ari Ghana madah, “Kesuah iya, kitai ke mansang ngagai orang lebuh nginjil. Tang ba pengawa nginjil ba mua orang mayuh nya, sida empu ke mansang ngagai kitai. Indah kitai pan udah meri saksi ngagai orang ke mansa aja.”

 Ba menua Afrika ke bukai, siku lelaki mansang ngagai troli lalu ngambi litaricha ke dalam bansa jaku iya. Seminggu udah nya iya datai baru lalu madah, “Aku udah macha semua litaricha. Penerang nya amat beguna. Aku deka bekunsika nya enggau diri sebilik aku lebuh aku pulai ke menua aku.” Penyauh menua iya kira 500 kilometer (311 batu) ari endur nya. Dua bulan pengudah nya, iya pulai baru lalu ku iya madah, “Bala ke ari menua aku udah macha semua litaricha nya, lalu sida gaga ati enggau penerang dalam litaricha nya. Sida ka nyadi Saksi Jehovah. Tang sida bisi tanya. Ngambika chunto, sida nemu enti deka dibaptisa, sida patut diselamka dalam ai. Tang, ba endur kami nadai sungai. Kati kami patut datai kitu ngambika ulih dibaptisa?” Penginjil ngasuh iya berandau enggau siku pengerintis ke nemu bansa jaku iya empu. Kenyau ari nya, sida bisi randau ti amat manah.

 Amat gaga ati ulih meda troli litaricha kitai ulih dikena nginjil ngagai “semua bansa.” (Matthew 24:14) Baka ni ungkus kena ngaga troli litaricha nya dibayar? Iya nya nengah pemeri sukarela ba serata dunya, ke ulih digaga nengah donate.pr418.com. Terima kasih ke semua pengerah jari kita.