Kenyau ari mit, aku endang udah rinduka pemendar. Aku deka nyerahka diri ngagai Jehovah lalu dibaptisa. Maya aku beumur 13 taun, aku amat gaga ati laban ulih nyapai juluk ati tu. Maya aku beumur 14 taun, Menyadi Helga Linck  a nanya aku, sekalika aku bisi ati deka nyadi pengerintis. Aku seruran ingatka tanya iya tu. Taja pan apai indai aku kala nyadi pengerintis sementara (diatu dikumbai pengerintis sukung), tang aku enda nemu nama utai ke diguna enti deka nyadi pengerintis. Tang tanya ari Menyadi Linck meransang aku bisi pengeran deka ngereja mayuh agi pengawa ke Jehovah.

 Kena 1974, penanggul politik ba Etiopia ngujungka mayuh orang ditangkap, dibunuh, lalu mayuh penyarut nyadi ba dini-dini endur. Enda lama udah nya, kami enda ulih nginjil ari rumah ke rumah, lalu kami semina ulih begempuru dalam raban ti mit. Apai indai berengkah nulung kami semadi besedia napi pemerinsa ke bukai. Prinsip Bup Kudus nulung kami faham agi reti neutral. Kami belajar, Jehovah tentu deka nulung kami nyebut utai ke patut enti kami ditasat, enggau meri kami penemu-dalam ngambika kami nemu ni maya kami patut enda bejaku.—Matthew 10:19; 27:12, 14.

 Pengudah aku badu sekula, aku bekereja ba Syarikat Penerbangan Etiopia. Bisi sekali, maya aku datai kereja, orang ke enggau aku gawa ngucap tahniah ngagai aku, laban aku dipilih nyadi ketuai ba acara perarakan kena ngintu ulang taun perintah Etiopia. Enggau jampat aku madahka supervisor kami, aku enda ulih enggau pengawa nya ketegal aku enda masuk champur ba politik.

 Ba hari siti, maya aku benung gawa ba padang bilun, ari jauh aku meda beberapa iku lelaki mai senapang mansang nuju ngagai kaunter tiket. Kumbaiku, sida deka nangkap sesiku orang ke nguji ngerarika diri ari menua. Tang, iya ke amat sida mansang ngagai aku! Aku iran ati nama kebuah sida merening aku? Kenyau ari sehari nya, pengidup aku pan berubah.

 Bala soldadu nya mai aku ngagai bilik opis lalu nasat aku pengelama bejam-jam. Sida mejal aku nyaut, “Sapa ke mayar bala Saksi-Saksi Jehovah? Kati nuan gawa ke Barisan Pembebasan Eritrea? Kati nuan tauka apai indai nuan gawa ke perintah Amerika Serikat?” Taja aku berasai tetekan, aku agi beterima kasih, laban ari bantu Jehovah aku ulih tenang.—Pilipi 4:6, 7.

 Pengudah aku ditasat, aku dibai ngagai siti rumah ke udah diubah nyadi rumah jil. Aku ditepu dalam siti bilik ke besais 28 meter persegi, lalu bilik nya penuh enggau 15 iku da agi bala indu ke agi biak. Sida dijil ketegal sida ngereja pengawa politik ke enda sejalai enggau atur perintah.

 Malam nya, aku agi bekenaka gari seragam kereja lalu gali ba lantai. Aku irau, laban aku nemu apai indai sereta bala madi aku tentu tusah ati enggau utai ke nyadi tu. Sida nemu aku ditangkap, tang sida enda nemu dini aku. Aku minta ngagai Jehovah, ngambika Iya nulung diri sebilik aku nemu dini alai aku dijil.

 Maya aku dani ba pagi hari siti, enda memukai aku betemu enggau siku lelaki ke dikelala aku. Iya berupai tekenyit lalu ku iya, “Aster, baka ni nuan tau ditu?” Aku minta iya ngagai rumah apai indai aku lalu madahka dini alai aku. Ba hari ti sama, apai indai aku nganjung pemakai enggau gari ngagai aku. Au, pegawai jil nya udah madahka diri sebilik aku, dini alai aku. Jehovah nyaut sampi aku! Utai ke nyadi tu ngasuh aku yakin agi, aku enda kediri.

 Aku enda dikemendarka ngembuan Bup Kudus tauka litaricha ke bukai. Diri sebilik sereta bala kaban aku mega enda ulih ngabas aku. Tang, Jehovah meri aku peransang nengah orang tangkap ke bukai. Ninting hari aku nginjil ngagai sida, lalu sida pan alit ati enggau pemendar pasal Perintah Petara. Sida selalu meransang aku, “Kami belaban kena ngetanka perintah mensia, tang nuan belaban ketegal ngetanka Perintah Petara. Anang ngalahka diri, taja pan sida ngemba deka munuh nuan!”

 Kekadang, bala pegawai rumah jil deka nasat lalu malu bala orang tangkap. Bisi sekali, dalam urung pukul 11 malam, sida datai ngiga aku. Lebuh kami datai ba siti bilik ke endur nasat, sida nuduh aku macham-macham. Sida ngumbai aku enda nyukung perintah menua. Maya aku enggai nyebut slogan politik, dua iku pegawai lelaki malu aku. Bekali-kali sida ngena chara ti sama lebuh sida nasat aku. Lalu tiap kali nya, aku bebendar besampi ngagai Jehovah, lalu aku amat ulih ngasaika sukung Iya.

 Pengudah tiga bulan, siku ari pegawai jil datai lalu madahka aku bibas. Taja pan tekenyit tang aku gaga ati. Aku mega mimit asa ati laban aku benung ngasaika pengaga ati ketegal ulih bekunsika harapan Perintah Petara, ngagai orang tangkap ke indu ba rumah jil nya.

 Beberapa bulan pengudah aku pansut ari jil, bala soldadu nangkap semua bala nembiak ba diri sebilik kami! Sida nangkap dua iku madi indu aku, enggau siku ari madi lelaki aku maya aku nadai ba rumah. Maya tu, aku pan mutuska deka ninggalka menua tu. Taja pan aku tusah ati laban beserara baru enggau diri sebilik aku, tang indai meransang aku tetap tan ati lalu andalka Jehovah. Enda lama udah nya, aku nepan bilun ke Amerika Serikat. Ba hari ti sama, bala soldadu datai ke rumah aku lalu ka nangkap aku kali kedua. Lebuh sida nadai tetemuka aku ba rumah, sida terus ngagai padang bilun. Tang maya sida datai dia, aku udah mupuk.

 Lebuh aku sangkai ba Maryland, aku terus dikelaluka Haywood enggau Joan Ward, sepasang laki bini ke pengerintis seberai tasik, ke ngajar apai indai aku. Lima bulan pengudah nya, aku pan nyapai juluk ati aku nyadi siku pengerintis. Anak indu sida, Cyndi, nyadi kaling ngerintis aku. Kami amat gaga ati begulai enggau pangan diri ba pengawa nginjil.

 Kena 1979, iya nya maya musin angat, aku ngelawa Bethel ba New York. Tu meh maya aku betemu enggau Wesley Parker. Aku rinduka mayuh sifat iya ti manah, lalu iya mega deka ngereja mayuh pengawa ke Jehovah. Kena taun 1981, kami pan kawin, lalu aku pindah ke Wallkill, New York, lalu sama gawa enggau Wesley ba Bethel. Aku nulung ba Begian Meresi sereta Dobi. Udah nya, nulung ba Begian Komputer ba baruh begian MEPS. Gawa ba Bethel nyadika peluang alai aku ngena pengidup diri gawa penuh jam ke Jehovah. Aku mega ulih ngelala bala menyadi ke sama gawa ditu, lalu ulih nyadi kaban kami nyentukka seharitu.

 Tang diri sebilik aku ke agi ba Etiopia balat diperinsa. Tu ngasuh aku amat tusah ati. Tiga iku menyadi aku ke ditangkap agi dijil.  b Ninting hari, indai aku patut nyedia lalu nganjung pemakai ke sida laban rumah jil nya nadai nyediaka pemakai.

 Ba maya ti tusah nya, Jehovah meh nyadika endur aku belindung lalu ruang bilik Bethel ngelantang sereta nyukung aku. (Mark 10:29, 30) Bisi sekali, Menyadi John Booth madah ngagai aku, “Kami amat gaga ati meda nuan gawa ba Bethel. Enti nadai berekat ari Jehovah, engka nuan enda ulih ditu.” c Jaku ti manah tu ngasuh aku andal, Jehovah udah merekatka pemutus aku ninggalka Etiopia, lalu Iya deka nyaga diri sebilik aku.

 Kena bulan Januari 1989, kami nerima berita, aku bisi tubuh. Keterubah, kami amat tekenyit! Tang beberapa hari udah nya, pengirau kami nyadi pengaga ati. Taja pia, kami agi berunding kati kami ulih nyadi apai indai ke manah, dini alai kami diau, lalu baka ni kami ngidupka diri pengudah pansut ari Bethel.

 Kena 15 April 1989, kami nusun barang kami lalu mansang ke Oregon. Ditu, kami merambu deka terus gawa penuh jam nyadi pengerintis. Tang enda lama pengudah kami datai, sekeda kaban kami bisi ati deka nulung, lalu madahka kami enda patut ngerintis. Amat, kami nadai mayuh duit lalu kami mega deka bisi anak enda lama da agi. Nya alai, baka ni ka ngerintis? Udah nya, tuai ti ngabas iya nya Menyadi Guy Pierce, enggau bini iya Penny d datai ngabas kami. Sida meransang kami terus nyapai juluk ati tu. Nya kebuah, kami pan berengkah ngerintis lalu pechaya Jehovah tentu mantu kami. (Malaki 3:10) Kami terus ngerintis pengudah anak tuai kami Lemuel, enggau anak kedua kami Jadon ada.

 Ngerintis enggau bala anak kami maya sida agi mit, siti pengalaman ti berega ba kami. Pengawa tu meri kami mayuh peluang kena nerangka pemendar Bup Kudus, ukai aja ngagai mayuh orang, tang pia mega ngagai bala anak kami. (Ulang Adat 11:19) Tang pengudah anak kami ketiga ada, iya nya Japheth, kami patut ngetu ngerintis enda lama.—Mikah 6:8.

 Kami sedar, tanggungjawap ke pemadu penting sebagai apai indai nya, ngasuh Jehovah nyata ba bala anak kami, lalu nulung sida ngembuan kaul ti rapat enggau Jehovah. Nya alai, kami nguji nyadika pengawa belajarka Bup Kudus enggau diri sebilik nya utai ti diantika sida. Maya sida agi mit, kami macha begulai bup Dengarlah Cakap Guru Agung dan Buku Cerita Bible Saya. Indah, kami ngelakunka sekeda watak dalam Bup Kudus. Ketegal aku aja ke indu ba ruang bilik kami, aku belakun nyadi Jesebel maya kami berandauka cherita tu. Bala anak kami amat rindu, lebuh sida pepura nulak aku ari bangku, udah nya sida pan belakun nyadi bala ukui! Kelimpah ari belajarka Bup Kudus enggau diri sebilik, Wesley pan ngajar Bup Kudus ngagai tiap iku anak kami.

 Kami sayau sereta nyaga bala anak kami. Kami mega besampi, ngambika kaul kami diri sebilik rapat. Maya sida mansang besai, kami ngajar sida sekeda pengelandik. Sida belajar nuchi pinggai, meresi bilik diri empu, enggau nuchi baju. Sida mega belajar bepanduk.

 Tang ukai semina bala anak kami aja ke belajar. Sebagai apai indai, kami pan ulih belajar. Bisi maya, kami bisi ngayanka ulah tauka nyebut utai ke enda manah ngagai bala anak kami tauka ba entara kami empu. Ba situasi ke baka tu, kami ngayanka pemaruh ati lalu minta ampun.

 Kami ngayanka pengerah jari lalu selalu mai bala menyadi ba raban gempuru datai ke rumah kami, nyengkaum sida ke datai ngelawa Bethel, pengerintis seberai tasik, tuai ti ngabas, sereta sida ke gawa ba endur ke begunaka bantu. (Rome 12:13) Maya kami ngintu temuai, kami enda ngasuh anak kami bemain dalam bilik aja. Sida sama begulai enggau kami, lalu ningaka pengalaman bala menyadi. Suah iya, bala anak kami ingatka cherita ke didinga sida ari aku enggau laki aku.

 Aku enggau Wesley bebendar nyadika pengawa kami ke Jehovah manah agi. Chunto iya, aku ngaga pelan lalu nyimpan duit, ngambika maya chuti kami ulih ngagai menua bukai. Ba tiap iti pejalai, kami deka ngabas pampang opis, datai begempuru, enggau nginjil. Tu ngasuh kami ngasaika pengerindu ari bala menyadi ba serata dunya, lalu ngerapatka agi kaul kami sebilik.

 Kami berati, mayuh orang ngena jaku Sepanyol ba kawasan kami, tang nadai orang nginjil ngagai sida. Nya alai, maya anak kami agi mit, kami nanya runding Menyadi Pierce pasal pelan kami ke deka pindah ngagai raban ke ngena bansa jaku Sepanyol. Enggau tuchum besai iya nyaut, “Enti nuan orang ke berikan, nuan deka ngagai endur ke bisi ikan.” Pengudah ninga jaku peransang nya, kami pan pindah ke raban bansa jaku Sepanyol ba Woodburn, Oregon. Kami amat gaga ati laban ulih berengkah ngajar orang Bup Kudus, lalu sida pan ulih ngaga pemansang. Kami mega nulung sekeda orang dibaptisa, lalu meda baka ni raban bansa jaku Sepanyol ke mit nyadi siti raban gempuru.

 Bisi siti maya, Wesley lenyau kereja lalu kami patut pindah ke California ketegal kereja baru iya. Dua taun udah nya, aku, Lemuel, enggau Jadon pan berengkah ngerintis. Kena taun 2007, aku amat gaga ati laban ulih enggau Sekula Pengerintis begulai enggau anak aku. Enda lama pengudah enggau sekula nya, kami sedar bisi mayuh orang ngena jaku Arab ba endur kami nginjil. Nya alai, kami sebilik pan mutuska deka enggau raban gempuru bansa jaku Arab pengudah 13 taun ba kawasan nginjil bansa jaku Sepanyol. Kami amat gaga ati nginjil ngagai orang ke ngena jaku Arab ba endur kami, pia mega lebuh bisi kimpin ti spesial ba menua bukai. Kami terus ngerintis ba kawasan nginjil bansa jaku Arab di San Diego, California.

 Wesley siku laki sereta kepala diri sebilik ti amat manah. Iya amat bebasaka gerempung Jehovah. Iya enda kala nyebut utai ti negatif pasal Bethel tauka atur ba gempuru. Tang, iya selalu nyebut utai ti positif. Iya besampi enggau aku sereta besampi ke aku, nyengkaum maya kami napi situasi ti tusah. Sampi iya ngelantangka ati aku, lalu nulung aku mengkang tenang.

 Lebuh aku ngenang baru pasal pengidup kami, kami udah kala gawa penuh jam, ngemesaika bala anak, sereta nulung ba raban gempuru ke begunaka mayuh bantu. Kami udah meda Jehovah merekat orang ke ngemeratka Iya, lalu kami nadai kala kurang nama-nama utai. (Masmur 37:25) Aku andal, pemutus aku ke deka gawa enggau pengabis ati ngagai Jehovah nya, pemutus ti pemadu manah.—Masmur 84:10.