Enti nuan kelalu irau, tu ulih ngachau pengerai tubuh sereta emosi. Lalu, tu pan engka ngujungka penanggul ti besai agi, ari ke dikeirauka nuan sebedau tu.

•  Natak diri ari kelalu meda, macha, tauka ningaka berita ti enda manah. Nuan enda ibuh kelalu silik nemu pasal tiap iti berita. Enti nuan meda, macha, tauka ninga kelalu mayuh riput ke enda manah, nuan nyadi takut agi, sereta ngasaika nya nadai pengadang.

   Prinsip Bup Kudus: “Ati ti tusah ngasuh pengering lenyau.”—Jaku Dalam 17:22, NWT.

   “Kekadang, kitai jampat gian ka meda penerang ba internet pasal berita ti baru sereta ngenakutka. Tang nya enda manah ke kitai. Lebuh aku ngurangka diri ari kelalu nemu pasal berita ke enda manah, pengirau aku pan kurang.”—John.

   Tanya ti patut diperunding: Ni penyuah iya nuan patut nemu semua berita ke baru?

•  Tetapka. Dani ba maya ti sama, makai pagi, ngereja sekeda pengawa, lalu tinduk ba maya ti sama ninting hari. Enti nuan bisi jadual ba semua utai, nuan enda kelalu irau, taja pan chara pengidup kitai ke diatu bisi ubah.

   Prinsip Bup Kudus: “Bejimat lebuh nuan ngaga pelan, nya baru nuan deka bulih mayuh utai.”—Jaku Dalam 21:5.

   “Lebuh penyakit corona virus tu berengkah, aku terus enda betatika jadual diri ninting hari, lalu masau mayuh jam ba pemerindang ti enda entu menuku. Nyadi, aku ka jam aku dikena ba utai ti menyana agi sereta patut dikereja, nya alai aku ngaga jadual.”—Joseph.

   Tanya ti patut diperunding: Kati nuan bisi jadual ti ngasuh nuan ngasaika diri udah ngereja utai ti menyana sereta beguna?

•  Peratika utai ti manah ba pengidup nuan. Enti runding nuan majak lekat ngagai utai ke ulih digaga nuan suba, lalu mandingka nya enggau utai ke digaga nuan diatu, nuan ka balat agi irau. Nyadi, uji perundingka dua tauka tiga iti pekara ke ngasuh nuan gaga ati.

   Prinsip Bup Kudus: “Seruran beterima kasih.”—Kolosi 3:15.

   “Lebuh aku macha Bup Kudus, aku ngisi runding diri enggau penemu ti manah, ukai riput berita ti enda manah. Tu nulung aku positif agi. Taja pan pengawa tu senang aja, tang penguntung iya besai.”—Lisa.

   Tanya ti patut diperunding: Kati nuan suah agi berundingka utai ti enda manah ba pengidup nuan, lalu muai ketisi utai ti manah?

•  Berunding pasal orang bukai. Lebuh nuan irau, nuan sigi ka agi kediri. Tang, ari ke kelalu berundingka asai ati diri, uji perundingka, baka ni nuan nulung orang bukai ke begunaka bantu?

   Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.

   “Lebuh aku ngagaka orang bukai, aku empu pan gaga. Aku nguji ngereja sesiti pengawa ke ngasuh sida berasai nyamai agi, lalu tu pan ngurangka pengirau aku empu. Ketegal kisuk nulung orang bukai, aku nadai awak berundingka pengirau diri.”—Maria.

   Tanya ti patut diperunding: Ba orang ke dikelala nuan, sapa ke amat begunaka bantu, lalu baka ni nuan meri bantu?

•  Jaga pengerai. Giga awak sesais enggau belelak. Makai pemakai ti manah ke pengerai. Enti pengerai nuan dijaga, nuan deka ngasaika diri nyamai agi, lalu pengirau nuan pan kurang.

   Prinsip Bup Kudus: “Matihka tubuh beguna.”—1 Timoti 4:8.

   “Anak lelaki aku ke beumur 16 taun, enda ulih sesais ba luar baka selama. Nyadi kami ngaga jadual ti tetap, sesais dalam rumah. Tu ngasuh kami berasai gaga, manah enggau pangan diri sereta sabar enggau pangan diri.”—Catherine.

   Tanya ti patut diperunding: Kati nuan ngasaika diri patut makai pemakai ti manah ke pengerai, lalu ngiga awak suah agi sesais?

 Kena nambahka agi penemu pasal chara ngurangka pengirau, mayuh orang bulih mayuh penguntung, lebuh sida belajarka semaya ti ulih dikearapka jemah ila. Peda meh artikel ke betajuk, “Nama Utai ke Nyadi Lebuh Perintah Petara Merintah?”