Baru-baru tu bala pemerintah, bala saintis sereta bala pakar teknologi madahka runding sida pasal teknologi AI. a Sida setuju teknologi AI ulih mai penguntung, tang sida mega irau orang deka salah guna teknologi tu.

•   “Teknologi AI nya amat pintar sereta ulih ngenyenangka pengidup orang . . . Tang ba maya ti sama, teknologi AI ulih ngachau pengelikun, ngelanggar hak mensia sereta ngasuh orang kurang agi andalka perintah demokratik.”—Kamala Harris, naib presiden Amerika Serikat, 4 Mei 2023.

•   “Taja pan teknologi AI ulih mai penguntung ari segi chara berubat, tang teknologi tu mega ulih ngachau pengerai ba fisikal sereta emosi mensia,” ku seraban lutur enggau pakar berubat nulis dalam artikel ke dikeluarka kena 9 Mei 2023 dalam majalah BMJ Global Health. Dr. Frederik Federspiel ke ngulu pengawa sida. b

•   “Indah diatu, teknologi AI udah dikena orang ngerembaika penerang ti pelesu. Enda lama agi, orang mega engka lenyau kereja ketegal teknologi tu. Sekeda orang ke gawa ba teknologi amat irauka teknologi AI deka mai penusah ti besai ngagai mensia dudi hari.”—The New York Times, 1 Mei 2023.

 Seraya masa belalu, kitai deka meda sekalika teknologi AI deka mai penguntung tauka ngenusahka mensia. Nama utai ti dipadah Bup Kudus pasal tu?

 Bup Kudus madahka kebuah mensia enda ulih gerinti teknologi ke digaga sida deka semina mai penguntung aja lalu nadai kesan ti enda manah.

1.  1. Taja pan mensia bisi tuju ati ti manah, tang sida enda nemu semua kesan ti enda manah ke datai ari pengawa sida.

   •   “Jalai ti dikumbai nuan jalai ti ngena, tau nuju ngagai pemati.”—Jaku-Dalam 14:12.

2.  2. Nadai orang ulih ngawal pengawa orang bukai. Indah sekeda orang salah guna teknologi ke udah digaga orang bukai.

   •   “Utai ti udah digaga, enggau utai ti udah ulih aku, sigi nadai reti ba aku, laban aku nemu, aku deka ninggalka utai nya ke orang ke ngentudika aku, lalu iya nyangka bepenemu-dalam, tauka beli. Nadai kitai nemu. Tang taja pia, iya deka bempu semua utai ti udah ulih aku, semua utai ti udah ulih aku di dunya tu ngena penemu-dalam aku. Semua utai nya nadai guna magang.”—Pengajar 2:18, 19.

 Endang amat, mensia begunaka iring ari Petara.

 Penempa kitai besemaya Iya enda sekali-kali nejuka mensia (tauka teknologi ke digaga mensia) ngerusak bumi tauka ngemunaska mensia.

•   “Dunya mengkang enda berubah.”—Pengajar 1:4.

•   “Orang ke lurus deka bempu menua tu lalu diau ditu belama iya.”—Masmur 37:29.

 Ba Bup Kudus, Penempa kitai udah meri iring ke ulih nulung kitai ngembuan pengidup ti lantang sereta likun jemah ila. Kena nemu mayuh agi pasal ajar Bup Kudus, bacha meh artikel “Nama Utai ke Ulih Ngiring Kitai Ngembuan Pengidup ti Manah Jemah Ila?” enggau “Pengadang ti Bendar Pasal Jemah Ila.”