Ba serata dunya mayuh orang merinsa ketegal cuaca ti balat angat sereta penusah ketegal pengangat cuaca nya. Peratika sekeda riput ba baruh tu:

•   “Kenyau ari mensia berengkah ngerikut suhu ba serata dunya (174 taun suba,) enti dibandingka enggau bulan Jun ba taun ke bukai, taun tu meh ke pemadu angat.”—National Oceanic and Atmospheric Administration, U.S. Department of Commerce, 13 Julai 2023.

•   “Menua Itali, Sepanyol, Perancis, Jerman sereta Poland ditinggang cuaca ti amat angat. Kami nyangka suhu cuaca ba pulau Sicily enggau Sardinia deka manggai 48°C. Tu engka rikut suhu ti pemadu tinggi ba Eropah.”—European Space Agency, 13 Julai 2023.

•   “Seraya cuaca ba bumi majak angat, kami nyangka ribut ujan deka suah agi nyadi lalu tu deka ngasuh banjir mega suah nyadi.”—Stefan Uhlenbrook, pengarah begian hidrologi, ai enggau kriosfera ba World Meteorological Organization, 17 Julai 2023.

 Kati nuan irau lebuh ninga riput pasal cuaca ti balat angat tu? Peratika utai ti dipadah Bup Kudus pasal topik ti berat tu.

 Au. Cuaca ti balat angat sereta bencana alam ke bukai ke nyadi kemayaharitu sejalai enggau utai ke dipadah Bup Kudus pasal jeman kitai. Ngambika chunto, Jesus udah madah kitai deka meda “utai ti ngenakutka.” (Luke 21:11) Ketegal suhu ba serata dunya majak niki, mayuh orang takut mensia deka ngerusak bumi tu.

 Enda. Petara ngaga bumi tu endur kitai diau belama iya. Iya enggai nejuka mensia ngerusak bumi. (Masmur 115:16; Pengajar 1:4) Tang Iya besemaya deka “ngemunaska orang ke nganchurka dunya.”—Pemandang 11:18.

 Bup Kudus madahka Petara ulih sereta deka ngelindung bumi tu ari abis dirusak.

•   “[Petara] ngasuh biaubalai teduh lalu gelumbang pen badu agi besegum.” (Masmur 107:29) Petara bisi kuasa kena ngawal kuasa alam. Iya ulih mutarka penanggul ba alam sekitar ti ngujungka orang merinsa ketegal cuaca angat.

•   “Nuan ngayanka diri sinu ati ke menua lebuh Nuan ngasuh hari ujan. Nuan ngasuh menua ami.” (Masmur 65:9) Enggau berekat ari Petara, bumi tu deka nyadi Paradais.

 Kena nemu mayuh agi semaya Bup Kudus pasal bumi tu deka diaduka baru, bacha artikel “Sapa ke Deka Nyelamatka Bumi?”