Nama Dipadah Bup Kudus pasal Gaya Pengidup Vegan?
Ba serata dunya mayuh orang beminat enggau gaya pengidup vegan. a
“Veganisme nya siti falsafah sereta gaya pengidup ti meransang orang enggau naka ulih nyeliahka diri ari ngemedis tauka bekenaka jelu nyadika pemakai, gari tauka sebarang utai.”—The Vegan Society.
Sekeda orang ke nitihka gaya pengidup vegan ukai semina ibuhka pasal jelu tang sida mega deka nyaga alam semulajadi tauka pengerai diri tauka ketegal pengarap sida.
“Veganisme enda sama baka diet bukai. Orang mayuh ngumbai gaya pengidup vegan nya bisi kaul enggau utai ke dipechaya sida sereta hal moral lalu nya mega siti chara sida deka ngubah dunya nyadi manah agi.”—Britannica Academic.
Ulih veganisme mutarka penanggul ke nyadi ba bumi tu? Nama dipadah Bup Kudus pasal tu?
Runding Petara pasal mensia enggau jelu
Bup Kudus madahka Petara Jehovah b ngumbai mensia penting agi ari jelu lalu Iya meri mensia kuasa atas jelu. (Pemungkal 1:27, 28) Nyau kelama Petara ngemendarka mensia makai dagin jelu. (Pemungkal 9:3) Taja pia, Iya nagang mensia merinsaka jelu.—Jaku-Dalam 12:10.
Nitihka Bup Kudus, sekalika kitai deka makai dagin jelu tauka enda, tu pemutus diri empu. c Petara enda ngumbai kitai manah agi ari orang bukai ketegal pemutus ke digaga kitai. (1 Korint 8:8) Kitai enda ulih ngakim pemutus ke digaga orang bukai pasal pemakai ke dipilih sida.—Rome 14:3.
Chara ti pemadu manah mutarka penanggul
Bup Kudus madah, gaya pengidup ke dipilih kitai enda ulih mutarka penanggul ke nyadi ba dunya. Mayuh penanggul ke ditapi kitai bepun ari isu politik, sosial sereta ekonomi ti enda ulih diputarka kitai. Bup Kudus madah:
“Nuan enda ulih beruruska utai ti bingkuk.”—Pengajar 1:15.
Petara deka mutarka penanggul ke ditapi kitai. Bup Kudus ngena sempama kena nerangka utai ke deka digaga Iya.
“Aku meda langit ti baru enggau dunya ti baru. Langit ti lama enggau dunya ti lama udah lenyau, lalu tasik pan nadai agi.”—Pemandang 21:1.
Petara deka nganti perintah mensia, tauka “langit ti lama,” enggau “langit ti baru,” iya nya Perintah Iya ba serega. Perintah Iya deka muai “dunya ti lama,” iya nya orang ke jai. Iya deka merintah atas “dunya ti baru,” tauka orang ke deka nyadi rayat Perintah nya.
Semina ba baruh Perintah Petara aja mensia ulih idup bebaik enggau bala jelu sereta alam sekitar.—Isaiah 11:6-9.
a Orang ke nitihka gaya pengidup vegan nyeliah ari makai dagin jelu sereta sebarang pemakai ke digaga jelu, ngambika chunto telu, susu enggau ai manyi. Sida mega nyeliah ari ngena gari tauka perengka ke digaga ari jelu baka kulit jelu tauka bulu jelu, pia mega enggau produk ke diuji ba jelu.
b Jehovah nya nama Petara.—Pemandang 4:11.
c Bup Kudus ngasuh kitai “nyeliah ari. . . darah.” (Surat Kereja Rasul 15:28, 29) Tu reti iya kitai enda patut ngirup darah tauka makai dagin jelu ke agi bisi darah. Pia mega kitai enda patut makai pemakai ke ditambah darah.
Nuan Engka Rindu Meda Tu
TOPIK BUKAI
Pengadang ti Bendar Pasal Jemah Ila
Nama kebuah semaya ke ditulis dalam Bup Kudus ulih dikeandalka ari jaku orang ke bedau temu betul enda?
ESSENTIAL BIBLE TEACHINGS
Nama Kebuah Petara Ngaga Dunya?
Dunya kitai penuh enggau mayuh utai ti manah. Dunya diengkah enggau penyauh ti ngena ari mata panas, iya disingitka nitihka penuduk ti ngena, lalu bepusin ba pengelaju ti ngena. Nama kebuah Petara ngaga dunya ke manah tu enggau bebendar?
TOPIK BUKAI
Sapa ke Deka Nyelamatka Bumi?
Nitihka sekeda pemansik alam sekitar, ulah mensia ulih ngerusak alam semula jadi sereta bansa jelu ke idup ba bumi. Lalu pengawa sida kemayaharitu balat agi ari ke suba.
