Kena 9 Oktober 2024, World Wildlife Fund ngeluarka siti riput ti ngenyinuka ati pasal kesan ari utai ke dikereja mensia ngagai hidupan liar. Riput nya nunjukka, “dalam 50 taun ti udah (1970-2020), purata penyampau hidupan liar ke dikira udah bekurang 73 peratus.” Riput nya nangkan: “Kami enda ngelangkung lebuh madah, utai ke deka digaga lima taun ila deka nentuka utai ti idup ba bumi tu dudi hari.”

 Mayuh orang tekenyit lebuh ninga riput ti baka tu. Kitai sayauka bumi tu lalu enggai meda hidupan liar merinsa. Kitai berasai baka tu laban Petara ngaga kitai kena nyaga jelu.—Pemungkal 1:27, 28; Jaku-Dalam 12:10.

 Nuan engka berunding, ‘Kati kitai ulih ngelindung hidupan liar ba bumi tu? Nama dipadah Bup Kudus pasal tu?’

 Enda ngira naka ni pemendar kitai nguji nyelamatka jelu, semina Petara aja ke amat-amat ulih ngelindung sida. Nitihka Pemandang 11:18, Bup Kudus madahka Petara deka “ngemunaska orang ke nganchurka dunya.” Ayat nya ngajar kitai dua iti utai:

1.  1. Petara enda ngelakka bumi abis dirusakka mensia.

2.  2. Petara deka betindak enda lama da agi. Baka ni kitai nemu? Laban diatu, risiko bumi tu deka dirusakka mensia jauh balat agi ari ke sebedau tu.

 Nama deka digaga Petara kena mutarka penanggul tu? Iya deka ngasuh Perintah Iya ba serega merintah atas dunya. (Matthew 6:10) Ba baruh Perintah tu, semua orang ti ngasi deka diajar sereta dilatih ngambika ulih nyaga enggau ngelindung hidupan liar.—Isaiah 11:9.