Maya Sukan Olimpik Musin Panas 2024, dijangka bisi kira-kira lima biliun iku orang deka meda bala atlet ari 206 iti menua bepekit. Thomas Bach, presiden Komiti Olimpik Entarabansa madahka: “Kitai sebagi ari pengawa ke deka mai penyerakup ba dunya. Aram meh kitai nyukung tuju sukan tu, iya nya semua mensia patut idup enggau lantang sereta beserakup, taja pan semua kitai bebida ari pangan diri.”

 Kati sukan Olimpik amat ulih nyapai tuju nya? Kati kitai amat ulih bisi pemaik sereta penyerakup?

 Sukan Olimpik taun tu udah ngasuh orang berunding ukai aja pasal sukan. Sukan tu udah ngasuh isu politik enggau sosial ti mechah-belahka orang tampak agi. Isu tu nyengkaum hak mensia, sereta pengawa bepilih mata nitihka bansa, agama, enggau jantina.

 Sukan ba peringkat entarabansa baka Olimpik merindang ati orang. Taja pia, sukan ke baka tu mega ngasuh orang berunding sereta ngereja utai ti mechah-belahka pangan diri. Lalu pengawa ke baka tu meransang orang majak agi berunding sereta ngereja utai ti mechah-belahka sida, ari ke mai pemaik sereta penyerakup.

 Bup Kudus udah madahka orang deka ngembuan ulah ti ngasuh mensia tusah deka beserakup. (2 Timoti 3:1-5) Kena nemu mayuh agi pasal utai ti dipadah Bup Kudus bekaul enggau utai tu, bacha meh artikel “Kati Ulah enggau Runding Orang Kemayaharitu Mina Ramalan ari Bup Kudus?”

 Bup Kudus ngembuan harapan ti bendar ke mai pemaik enggau penyerakup ba serata dunya. Bup Kudus besemaya, semua orang deka beserakup di baruh perintah ba serega ke dikumbai “Perintah Petara.”—Luke 4:43; Matthew 6:10.

 Jesus Kristus, Raja Perintah nya, deka mai pemaik ngagai serata dunya. Bup Kudus madahka:

•   “Awakka pengelurus ngerembai ngagai semua endur seumur raja, lalu awakka pengaya [tauka, pemaik] tan.”—Masmur 72:7.

•   “Iya ngelepaska orang ke seranta, ke ngangauka iya, . . . iya ngelepaska sida ari orang ke nekanka pengidup sida, enggau ari orang ke mangah.”—Masmur 72:12, 14.

 Indah diatu, ajar Jesus udah nyerakupka bejuta iku orang ari 239 iti menua. Laban sida nitihka ajar Jesus, Saksi-Saksi Jehovah ba serata dunya udah belajar idup bebaik enggau orang bukai. Kena nemu chara iya, bacha meh majalah Menara Jaga ke betajuk “Buai Ati ti Begedi.”