Lebuh kitai meda berita, bisi mayuh riput pasal orang ke bejaku jai tauka ngemediska orang ari sesiti raban, tauka nyerang orang ketegal enda sama bansa, lalu bisi mega mayuh riput pasal perang.

•   “Ba media sosial mayuh agi kes orang mandangka pemenchi sida ari ke suba, lalu tu majak nyadi ketegal perang entara menua Israel enggau Gaza pia mega laban orang ke nyungkak orang bukai belaya sereta ngemediska pangan diri.”​—The New York Times, 15 November 2023.

•   “Berengkah ari 7 Oktober, dunya kitai majak penuh enggau jaku jai sereta ulah ti ganas ke dipandangka orang ke begedika orang bansa bukai.”—Dennis Francis, presiden Perhimpunan Agung Pertubuhan Bangsa-Bangsa Bersatu, 3 November 2023.

 Jaku ti begedi, penganas sereta perang ukai pekara ti baru. Indah Bup Kudus udah madah pasal orang kelia ke “ngesuhka jaku ti jai baka laja” sereta ke rindu beperang enggau penganas. (Masmur 64:3; 120:7; 140:1) Tang Bup Kudus nerangka pemenchi ke nyadi ba jeman kitai ukai pekara ti biasa.

 Bup Kudus bisi madah dua iti kebuah orang begedika pangan diri ba jeman kitai.

1.  1. Iya madahka pasal siti timpuh alai “pengerindu orang ke pangan diri deka majak kurang.” (Matthew 24:12) Ari ke ngayanka pengerindu, ulah sida ti jai deka nyungkak orang begedika pangan diri.​—2 Timoti 3:1-5.

2.  2. Pemenchi orang kemayaharitu nya datai ari Sitan. Bup Kudus madah “serata dunya di baruh kuasa Sitan.”​—1 John 5:19; Pemandang 12:9, 12.

 Bup Kudus bisi madah enda lama da agi Petara deka muai utai ti jai ke ngasuh orang begedika pangan diri. Pia mega, Petara deka nyumanka ati orang ke dikemediska ketegal pemenchi. Bup Kudus besemaya:

•   Petara “deka ngendas semua ai mata ari mata sida, lalu pemati deka nadai agi. Nadai agi balat tusah ati, nadai agi nyabak, nadai agi pedis. Semua utai ti lama udah nadai agi.”​—Pemandang 21:4.