Kati nuan enda memukai nyau sakit? Enti utai tu nyadi, nya tentu ngachau asai ati, runding, sereta belanja nuan. Baka ni nuan napi utai ke nyadi tu? Baka ni nuan nulung diri sebilik tauka bala kaban ke bisi penanggul ba pengerai? Amat, Bup Kudus ukai bup pengerai. Tang dalam Bup Kudus, bisi mayuh chara ke nulung nuan napi penanggul tu.

•   Ngiga chara berubat

   Ajar Bup Kudus: “Orang ke gerai enda begunaka lutur, tang semina orang ke sakit.”—Matthew 9:12.

   Utai ke patut digaga: Giga meh bantu ari lutur enti nuan begunaka nya.

   Uji tu: Enti nuan begunaka nya, giga meh chara berubat ti manah. Kekadang, nuan engka patut betemu enggau lebih ari seiku lutur. (Jaku Dalam 14:15) Anang belalaika sebarang utai ngagai lutur, ngambi iya nemu utai ke nyadi ba tubuh nuan. Pia mega, tentuka nuan amat mereti semua utai ke dipadahka lutur. (Jaku Dalam 15:22) Pansik pasal penyakit nuan, enggau bengkah ubat ke ngena tauka bisi ba endur ke semak nuan. Enti nuan nemu utai ke patut digaga tauka nemu agi gaya pengerai diri, tu nyediaka runding sereta ati nuan. Enggau chara tu, nuan ulih ngaga pemutus ti manah maya milih chara berubat.

•   Gaya pengidup ti bepengerai

   Ajar Bup Kudus: “Matihka tubuh beguna.”—1 Timoti 4:8.

   Utai ke patut digaga: Pilih meh gaya pengidup ti bepengerai. Chara iya, sesais.

   Uji tu: Sesais enggau tetap, milih pemakai ti manah ke pengerai, sereta tentuka nuan chukup tinduk. Ketegal penyakit, kekadang kitai patut ngaga ubah ba sekeda utai. Tang, nitihka pakar, enti kitai milih gaya pengidup ti bepengerai, nya ulih nulung. Taja pia, tentuka mega chara nya ngena enggau ubat ke benung diempa nuan, tauka enda ngachau pengerai nuan ke diatu.

•   Giga sukung ari orang bukai

   Ajar Bup Kudus: “Pangan endang seruran ngayanka pengerindu sida.”—Jaku Dalam 17:17.

   Utai ke patut digaga: Maya nuan napi sesiti timpuh ke tusah, giga meh sukung ari kaban rapat nuan.

   Uji tu: Padahka asai ati ngagai kaban rapat ke ulih dipechayaka nuan. Tu ulih ngurangka stres sereta ngasuh nuan berasai nyamai agi. Kekadang, diri sebilik tauka kaban engka deka nulung nuan, tang sida enda nemu chara iya. Nya alai, padahka meh enggau beterus-terang ngagai sida utai ke diguna nuan, tang anang ngarapka bantu ti ngelui ari ke patut. Beterima kasih meh enggau semua bantu ke diterima. Tang kingatka mega, taja pan kaban nuan deka nulung, tang anang ngasuh nya ngujungka nuan berasai lelak. Tetapka meh penyuah tauka pengelama sida ulih ngabas nuan.

•   Ngembuan runding ti positif

   Ajar Bup Kudus: “Ati ti lantang manah ke pengerai, Tang ati ti tusah ngasuh pengering lenyau.”—Jaku Dalam 17:22, NWT.

   Utai ke patut digaga: Ulah sereta runding ti positif nulung nuan sabar agi, indah lebuh nuan balat napi penanggul ba pengerai.

   Uji tu: Fokus ngagai utai ke ulih dikereja nuan, ukai ngagai pengelemi nuan. Anang mandingka diri enggau orang bukai, tauka maya nuan agi gerai. (Galatia 6:4) Tetapka juluk ati ti ulih dijapai. Tu nulung nuan ngembuan tuju ba pengidup. (Jaku Dalam 24:10) Tulung meh orang bukai nitihka utai ke ulih nuan. Nya ngasuh nuan berasai gaga agi, sereta enda kelalu meda penanggul diri.—Kereja Rasul 20:35.

 Bup Kudus nunjukka, Petara Jehovah a ulih nulung orang ke napi penanggul ba pengerai. Tang, ukai reti iya, Petara nyumanka kitai enggau pengawa ajih. Tang, Petara ulih nulung orang ke nyembah Iya. Tu sekeda utai ke disediaka Petara Jehovah:

 Pemaik. Jehovah deka meri pemaik “ti ngelui peragam mensia.” (Pilipi 4:6, 7) Pemaik tu nulung nuan enda kelalu irau. Petara deka meri pemaik tu ngagai orang ke besampi, lalu nyerahka pengirau sida ngagai Iya.—1 Peter 5:7.

 Penemu-dalam. Jehovah deka meri penemu-dalam, ngambi nuan ulih ngaga pemutus ti betul. (James 1:5) Seseiku orang ulih bulih penemu-dalam, enti iya belajar lalu nitihka lalau ari Bup Kudus.

 Pengadang jemah ila ti amat meransang. Jehovah besemaya, jemah ila nadai agi orang deka madahka diri sakit agi. (Isaiah 33:24) Pengadang tu, nulung mayuh orang ngembuan runding ti positif, indah maya sida benung balat napi penanggul ba pengerai.—Jeremiah 29:11, 12.