Kena 2023, pakar kesihatan madahka asai ati ti sunyi balat ngachau pengerai orang, lalu sida patut ngereja sekeda utai kena ngelaban tu. Ulih mensia mujur ngelaban asai ati ti sunyi?

•   Dr. Vivek Murthy madahka: “Lebuh kitai berasai sunyi sereta enda begulai enggau orang, nya amat ngachau pengerai sereta pengaga ati kitai.” Tang iya nampung: “Bisi utai ke ulih dikereja kita.” Nama utai nya? “Ninting hari kitai ulih ngereja utai mit ngambika belubah-lubah ngeringka kaul enggau orang.” a

 Orang ke berasai sunyi enda semesti iya lebuh iya kediri aja. Indah sekeda orang berasai sunyi taja pan begulai enggau mayuh orang. Enda ngira nama kebuah kitai berasai sunyi, tang Bup Kudus ulih nulung. Ba dia bisi ngembuan lalau ti beguna ke ulih nulung kitai ngeringka kaul enggau bala kaban, lalu tu ulih ngelaban asai ati ti sunyi.

 Nemu berandau. Orang ke nemu berandau ukai semina ulih mantaika asai ati diri, tang sida mega ulih ninga lebuh orang bukai madahka asai ati sida. Lebuh nuan nunjukka diri ibuhka orang bukai, kaul nuan enggau orang nya deka kering agi.

•   Prinsip Bup Kudus: “Anang semina berundingka diri empu aja, tang berunding mega ke orang bukai.”—Pilipi 2:4.

 Giga meh mayuh macham orang nyadika kaban. Nuan patut sanggup bekaban enggau orang ke tuai agi ari nuan tauka biak agi ari nuan, sereta orang ke enda sama budaya tauka menua asal.

•   Prinsip Bup Kudus: “Tukangka meh ati kita enggau besai.”—2 Korint 6:13.

 Kena nemu mayuh agi pasal chara ngemansangka kaul enggau orang bukai, bacha meh artikel “Memuaskan Rasa Lapar akan Persahabatan” dalam jaku Indonesia.