“Penusah ketegal suhu bumi berubah majak nyadi. Mayuh endur ba semak tasik nyau ampuh laban ai nya. Sekeda endur balat angat, baka ke nadai kala nyadi. Bisi mayuh ribut ti ngenakutka. Mayuh endur enda chukup bekalan ai ti beresi. Sejuta bengkah jelu enggau utai tumbuh deka nadai agi. Tu ukai jaku kelangkung. Utai ke dipadah bala saintis deka nyadi enti perintah dunya enda ngubah polisi sida.”—Jaku ari António Guterres, pengari ari Petrubuhan Bangsa-Bangsa Bersatu, pasal riput suhu bumi berubah kena 4 April 2022.

 “Bala saintis meri jaku tangkan, enda lama da agi, nyauka semua 423 buah taman negara ba Amerika Serikat deka rusak ketegal suhu bumi berubah. Utai ke idup ba taman baka tu senang mati enti suhu berubah. Penusah ke ulih nyadi nyau baka tulah ke dipadah ba Bup Kudus: utan angus enggau ai bah, ais tasik ke cair, ai tasik ke majak niki sereta cuaca ke balat angat.”—Artikel “Flooding Chaos in Yellowstone, a Sign of Crises to Come,” ari The New York Times, kena 15 Jun 2022.

 Ulih penanggul alam sekitar diputarka? Enti ulih, sapa deka mutarka nya? Peratika utai ti dipadah Bup Kudus.

 Bup Kudus madahka Petara deka “ngemunaska orang ke nganchurka dunya.” (Pemandang 11:18) Ayat Bup Kudus tu ngajar kitai tiga iti pekara:

1.  1. Utai ke digaga mensia deka ngerusak bumi.

2.  2. Pengerusak bumi deka abis.

3.  3. Ukai mensia, tang Petara deka mutarka penanggul alam sekitar.

 Bup Kudus madahka dunya deka “mengkang enda berubah,” tauka deka meruan bisi. (Pengajar 1:4) Mensia deka diau ba bumi belama iya.

•   “Orang ke lurus deka bempu menua tu lalu diau ditu belama iya.”—Masmur 37:29.

 Alam sekitar deka diaduka baru.

•   “Menua puang deka rami gaga, lalu bungai deka tumbuh di menua ti kusi.”—Isaiah 35:1.