Nama Utai ke Dipadah Bup Kudus pasal Penanggul Kurang Ai ba Serata Dunya?

TEBAH

Semua kitai begunaka ai ti beresi kena beridup. Tang Setiausaha Agung PBB ke benama António Guterres madahka, “Ba serata dunya bala mensia begunaka mayuh agi ai tang kitai napi penanggul kurang ai ti amat serius.” Bebiliun iku orang ba serata dunya udah bisi penanggul ngulihka ai ti beresi.

Strdel/AFP via Getty Images

Kati semua orang bisi chukup ai ba dudi hari? Tauka kati kitai deka semampai bisi penanggul ba kurang ai? Nama utai ke dipadah Bup Kudus?

Nama semaya Bup Kudus pasal ai ke diguna kitai?

Bup Kudus madahka, jemah ila nadai agi orang deka kurang ai. Indah kitai deka bisi chukup ai ti beresi ke belimpah-limpah.

“Ai sungai deka rarat nengah menua puang. Pasir ti angat deka nyadi danau, lalu tanah ti rangkai deka penuh laban mata ai.”—Isaiah 35:6, 7.

Nama kebuah kitai ulih andalka semaya Bup Kudus tu? Peda nama utai ke dipadah Bup Kudus pasal proses ai ke digaga Petara ba bumi tu.

Nama utai ke dipadah Bup Kudus pasal bumi tu enggau proses ai nya?

“[Petara] ngaga dunya tegap sereta tan. Iya nadai ngaga dunya nyadi endur ti sunyi nadai mensia, tang nyadi endur alai mensia diau.”—Isaiah 45:18.

Ketegal Petara ngaga bumi tu nyadika endur alai mensia diau, Iya netapka proses semula jadi ti ulih ngasilka mayuh ai ti beresi.

‘Petara ngambi ai ari dalam tanah lalu ngaga ai nya nyadi leka ujan. Iya ngasuh ujan labuh ari mua hari ti bekeberai ninggang semua mensia.’—Jop 36:27, 28.

Ayat tu nerangka pasal baka ni Petara ngaga proses ba bumi tu alai ai ulih diberesi sereta meruan bisi. Ai ari darat enggau tasik deka nyadi wap. Udah nya, iya labuh nyadi ujan. Asil iya, mensia enggau jelu seruran bisi ai ti beresi.—Pengajar 1:7; Amos 5:8.

“Aku deka ngasuh hari ujan ba maya ti patut. Tanah deka mansutka asil, lalu pun kayu ba ladang deka bebuah.”—Adat Lewi 26:4.

Mayuh orang Israel kelia bumai, lalu Petara deka merekatka sida enggau meri sida ujan enggau tetap ngambika umai enggau ladang sida mansutka asil. Iya nemu enti kitai deka bisi chukup pemakai, kitai begunaka ujan ti chukup ba maya ti patut.

Baka Iya ke merekatka orang Israel kelia, Iya deka merekatka orang ba serata dunya enda lama da agi. (Isaiah 30:23) Tang ke diatu mayuh endur ba serata dunya enda chukup ai ke beresi. Kebendar iya, bisi mayuh agi penanggul kelimpah ari kurang ujan aja. Nama agi utai bukai ke dipadah Bup Kudus pasal chara mutarka penanggul kurang ai kemayaharitu?

Chara penanggul kurang ai deka diputarka

Bup Kudus madahka, nengah Perintah Iya, Petara deka mutarka semua penanggul ke ninggang kitai ba bumi, nyengkaum penanggul kurang ai. (Matthew 6:9, 10) Perintah Petara nya siti perintah ti deka merintah ari serega atas dunya. (Daniel 2:44; Pemandang 11:15) Lalu Perintah Petara deka ngereja siti utai ke enda ulih dijapai perintah mensia kemayaharitu, iya nya muai pun semua penanggul kitai ke ngujungka kitai kurang ai beresi.

Penanggul: Ubah ba suhu bumi ngujungka musin kemarau ti balat sereta banjir ti mai pengerusak; nemuka nya ketegal ujan bangat tauka ai pasang ba tasik majak niki. Semua tu ulih ngachau proses ai semula jadi.

Chara mutarka nya: Perintah Petara deka ngaduka semua pengerusak ke udah nyadi ba bumi tu. Petara udah besemaya: “Peda! Diatu Aku benung ngaga semua utai nyadi baru.” (Pemandang 21:5) Menua ti rangkai deka nyadi ami laban chukup mayuh ai. Taja pan nadai utai ulih idup ba endur nya diatu, jemah ila endur nya deka penuh enggau utai ti idup. (Isaiah 41:17-20) Lebuh Jesus Kristus megai Perintah Petara, iya deka bekuasa atas semua kuasa alam ba bumi tu.

Lebuh iya ba dunya, Jesus neduhka ribut ti amat ngenakutka. Enggau tu, iya nunjukka pasal kuasa ke diberi Petara ngagai iya. (Mark 4:39, 41) Lebuh Jesus merintah ba Perintah Petara, semua bencana alam deka nadai agi. Semua mensia deka idup lantang sereta likun, nadai agi takutka sebarang bengkah bencana alam.

Penanggul: Mensia ke enda berundingka panjai, sereta kompeni besai ti amat amu udah ngamahka mayuh sungai, danau sereta mata ai. Tu nambahka agi penanggul kitai ke kurang ai beresi.

Chara mutarka nya: Petara deka meresika bumi tu, lalu ngasuh semua sungai, danau enggau tasik nyadi beresi. Indah darat mega deka nyadi manah baru. Dunya tu deka nyadi Paradais. Bup Kudus madahka: “Menua puang deka rami gaga, lalu bungai deka tumbuh di menua ti kusi.”—Isaiah 35:1.

Nama deka nyadi ngagai sida ke ngamahka bumi tu sereta enda ibuhka orang bukai? Petara besemaya, Iya deka “ngemunaska orang ke nganchurka dunya.”—Pemandang 11:18; Jaku-Dalam 2:21, 22.

Penanggul: Mensia ngaga atur ti enda manah lalu ngujungka ai beresi dibasau enggau jampat agi ari proses ai semua jadi ulih ngisi baru danau engau sungai.

Chara mutarka nya: Perintah Petara deka nentuka peneka Petara “nyadi . . . ba dunya,” ukai peneka mensia ti semina berundingka diri empu aja. (Matthew 6:9, 10) Di baruh Perintah nya, mensia deka diajar enggau chara ti pemadu manah. ‘Dunya deka penuh laban penemu Jehovah baka ai ti ngemenuhka tasik,’ ku Isaiah 11:9. a Enggau penemu ti tinggi nya sereta pengerindu ti dalam ke Petara, mensia deka nemu chara ngintu bumi tu enggau manah.

Kena nemu agi pasal utai ti deka dikereja Perintah Petara, bacha meh artikel “Nama Deka Digaga Perintah Petara?”
Bacha meh Isaiah bagi 35 kena nemu chara bumi tu deka berubah nyadi Paradais.
Peda meh video Nama Kebuah Petara Ngaga Dunya? kena belajar mayuh agi pasal tuju Petara ke bumi tu enggau mensia.